საქართველოს ახალი ჩემპიონი ჰყავს: 'დელტამ' თასი 'ქუთაისში' ასწია

ფინალი
ქუთაისი-დელტა 78:82
24:23, 19:17, 14:22, 21:20
ქუთაისი: ლი (15ქ, 8პ, 5მ), ლომიძე (8ქ, 7მ), ბუსი (6ქ, 7მ), ბარბაქაძე (17ქ, 3პ), ლომოური (6ქ), დვალიშვილი (26ქ, 15მ), წივწივაძე, შენგელია, ჭეიშვილი.
დელტა: ფხაკაძე (8ქ, 3პ), მეგენეიშვილი (2ქ), ბაქრაზე, მაჩალაძე (1ქ), ნოთიჯი (8ქ, 6მ, 3პ, 3ჩ), დრამრაითი (8ქ, 5პ), ლობჯანიძე (25ქ), ბექაური (11ქ, 10მ, 3პ, 2დ), შვეცი (19ქ, 6მ).
მსაჯები: მიკოლა ამბრასოვი, მაკა კუპატაძე, მიხეილ ვართანოვი

სერია მოიგო "დელტამ" - 3:2

საქართველოს საკალათბურთო ჩემპიონატი მშვენიერი სანახაობით დასრულდა - "ქუთაისისა" და "დელტას" სერიაში გამარჯვებული საწყის ოთხ მატჩში ვერ გამოვლინდა და საჭირო გახდა მეხუთე, გადამწყვეტი შერკინება, რომელიც ქუთაისში გაიმართა.

აშკარა იყო, რომ ფინალში თანაბარი ძალის გუნდები ეთამაშებოდნენ ერთმანეთს, რაშიც კიდევ ერთხელ დავრწმუნდით მეხუთე მატჩისას. ბოლო წუთებს მცირე უპირატესობით "დელტა" შეხვდა და როგორც საქართველოს ჩემპიონს შეშვენის სტაბილური თამაშით ეს უპირატესობა შეინარჩუნა.

საბოლოოდ 82:78 თბილისელთა სასარგებლოდ.

შეგახსენებთ, რომ დელტელები საქართველოს ჩემპიონატში მეორე სეზონს ატარებდნენ, შარშან ლიგაში ადგილის შენარჩუნებისთვის იბრძოდნენ, წლეულს კი მწვრთნელმა, ლექსო ლაფანაშვილმა მონოლითური გუნდი შეკრა და უმთავრესად დაცვაში მწყობრი თამაშის წყალობით ისტორიაში უდიდეს შედეგს მიაღწია.

***
ბოლო წლებში საქართველოს ჩემპიონატის უცვლელი ფინალისტი "ქუთაისი" სერიოზული საკადრო პრობლემების წინაშე აღმოჩნდა: სეზონის მსვლელობისას სამი წამყვანი კალათბურთელი დააკლდა - საქართველოს ნაკრების წევრი ლევან ფაცაცია, გუნდის სნაიპერი დეჟან რაითი და მექულე-მომხსნელი ტერენს ტომპსონი. ასეთი დანაკლისის ფონზე კოტე ტუღუშის გაწვრთნილი გუნდი ნამდვილად არ გამოიყურებოდა ურიგოდ, თუმცა კარგად მოგეხსენებათ, რა მნიშვნელობა აქვს გრძელ სათადარიგოთა სკამს.

სწორედ ამ სამი მოთამაშის არყოფნის გამო დაკარგა "ქუთაისმა" ფავორიტის სტატუსი. მან ხომ სუპერლიგის რეგულარული ეტაპი სწორედ დაბალანსებული თამაშისა და ძალების თანაბარი გადანაწილების წყალობით მოიგო.

***
როგორც დასაწყისში აღვნიშნეთ, ფინალურ სერიაში ფავორიტი არ იყო, ისევე როგორც ფინალური სერიის მეხუთე, გადამწყვეტ შეხვედრაში.

აკი ვთქვით, "დელტას" ფინალური სერიაც და საერთოდ, ჩემპიონატიც დაცვამ მოაგებინა. მისებრი აგრესიით ბევრი გუნდი ვერ თამაშობდა. თუმცა იყო კომპონენტი, რომელმაც მეხუთე ფინალის მოგებაზე დიდი გავლენა იქონია - სამქულიანები. თავად განსაჯეთ: "ქუთაისმა" 19 სამქულიანი ისროლა და 5 ჩააგდო. ეს დაბალი მაჩვენებელია, განსაკუთრებით მაშინ, როცა მეტოქე 12 სამიანს იყენებს (31-დან).

მატჩში, რომელიც ქულა-ქულაში მიდის, თითოეულ სამქულიანს ოქროს ფასი ედება, ხოლო მეტოქეზე 7-ით მეტ სამიანს რომ გამოიყენებ, გამარჯვების გაცილებით მეტი შანსიც გაქვს.

ამ კომპონენტში განსაკუთრებით საბა ლობჯანიძე და არტიომ შვეცი გამოირჩნენ. პირველმა 7-დან 5 სამიანი ჩააგდო, მეორემ - 6-დან 5. საბა 25 ქულამდე ავიდა, შვეცი - 19-მდე.

"ქუთაისში" ბევრი იშრომა მეფარე აკაკი დვალიშვილმა. მან ეფექტური ორმაგი დუბლი გაიფორმა - 26 ქულა, 15 მოხსნა.

***

ასე და ამგვარად, სუპერლიგის 2018-19 წლების გათამაშებამ ახალი ჩემპიონი დაბადა. სამი წლის შექმნილი გუნდისთვის ეს ფანტასტიკური შედეგია, თუმცა სულაც არ ნიშნავს, რომ მისია შესრულებულია: საქართველოს ყველა ჩემპიონს აქვს გაცილებით მნიშვნელოვანი მისია - ევროტურნირებზე ჩვენი ქვეყნის სახელის დაცვა, რასაც ბოლო წლებია, ღირსეულად ვერავინ ახერხებს.

თუმცა საქმეს მეორე მხრიდან უნდა მივუდგეთ: ძლიერი ჩემპიონი პირველ რიგში საქართველოს ნაკრებს სჭირდება. ძლიერი კი მხოლოდ ქართულ ქვაბში ხარშვით ვერ იქნება - საჭიროა ევროტურნირებზე თამასი და სერიოზულ მეტოქეებთან ჭიდილში გამოცდილების მიღება.


ყველა ჩემპიონი

1991 დინამო (თბილისი)
1992 დინამო (თბილისი)
1993 ვითა (თბილისი)-მერანი (თბილისი) 2-0
1994 ვითა (თბილისი)-თბილისი (თბილისი) 2-1
1995 ვითა (თბილისი)-კაქტუსი (თბილისი) 2-1
1996 ვითა (თბილისი)-დინამო (თბილისი) 2-1
1997 ვითა (თბილისი)-დინამო (თბილისი) 2-0
1998 ვითა (თბილისი)-აზოტი (რუსთავი) 2-1
1999 ბასკო (ბათუმი)-აზოტი (რუსთავი) 3-1
2000 ბასკო (ბათუმი)-აზოტი (რუსთავი) 3-2
2001 ბასკო (ბათუმი)-სტუ (თბილისი) 2-0
2002 ბასკო (ბათუმი)-დინამო (თბილისი) 3-0
2003 დინამო (თბილისი)-ბასკო (ბათუმი) 3-2
2004 ბასკო (ბათუმი)-დინამო (თბილისი) 3-2
2005 სტუ-ჯეოსელი (თბილისი)-ავიამშენი (თბილისი) 3-2
2006 თბილავიამშენი (თბილისი)-აზოტი (რუსთავი) 3-2
2007 აზოტი (რუსთავი)-თბილავიამშენი (თბილისი) 3-0
2008 ენერჯი-ინვესტი (რუსთავი)-თბილავიამშენი (თბილისი) 3-1
2009 ენერჯი-ინვესტი (რუსთავი)-სსაუ (თბილისი) 3-0
2010 ენერჯი-ინვესტი (რუსთავი)-თსუ (თბილისი) 3-1
2011 არმია (თბილისი)-თსუ (თბილისი) 3-1
2012 არმია (თბილისი)-ოლიმპი (თბილისი) 3-1
2013 შსს აკადემია (თბილისი)-ოლიმპი (თბილისი) 3-2
2014 დინამო (თბილისი)-ქუთაისი 2010 (ქუთაისი) 3-1
2015 შსს აკადემია (თბილისი)-დინამო (თბილისი) 3-1
2016 ქუთაისი 2010 (ქუთაისი)-დინამო (თბილისი) 3-2
2017 დინამო (თბილისი)-ქუთაისი 2010 (ქუთაისი) 3-0
2018 ქუთაისი 2010 (ქუთაისი)-დინამო (თბილისი) 2-3
2019 ქუთაისი 2010 (ქუთაისი)-დელტა (თბილისი) 2-3

1304
მკითხველის კომენტარები / 0 /
მსგავსი ამბები
რუბრიკის სხვა სიახლეები
;