საქართველოს თავისუფალი სტილით მოჭიდავეთა ნაკრები, 27 თებერვალს, ბულგარეთში გამოვა

27 თებერვალს საქართველოს თავისუფალი სტილით მოჭიდავეთა ნაკრები ბულგარეთში მიფრინავს, სადაც 28 თებერვლიდან დან კოლოვისა და ნიკოლა პეტროვის მემორიალში ჩაებმება.

ესეც სარეიტინგო ტურნირია, რომელიც ევროპის ჩემპიონატისთვის მოსამზადებელი ეტაპის შემადგენელი ნაწილია, თუმცა ტრავმებისა თუ რიგ სხვა მიზეზთა გამო ჩვენი ნაკრების მთავარ მწვრთნელ გიორგი იანტბელიძეს იქ ოპტიმალური შემადგენლობა ვერ მიჰყავს.

მაგალითად, ასვენებს ევროპის სამგზის, ოლიმპიურსა და მსოფლიოს ჩემპიონ ვლადიმერ ხინჩეგაშვილს (65), ხოლო ტრავმების გამო ჯერჯერობით სათუოა რამდენიმე ლიდერის გამოსვლა.

ესენია მსოფლიოს ჩემპიონი ზურაბ იაკობიშვილი (70), ვისაც წელი სტკივა, ხოლო ხელის ტრავმებს იშუშებენ უფროსებში მსოფლიოს ფინალისტი და 23-წლიანებში მსოფლიოს მოქმედი ჩემპიონი ავთანდილ კენჭაძე (74) და ევროპის ფინალისტი, მსოფლიოს მესამე პრიზიორი ელიზბარ ოდიკაძე (97). მათი მონაწილეობა ჯერ გამორიცხული არაა - მწვრთნელს რამდენიმე დღით კიდევ შეუძლია დალოდება და დააკვირდება, შეძლებენ თუ ვერა ისინი ჭიდაობას. მათი წასვლა საბოლოოდ თუ გამოირიცხება, მაშინ მათ ნაცვლად ლევან ქელეხსაშვილი (70), ზურაბ ერბოწონაშვილი (74) და მამუკა კორძაია (97) გამოვლენ, თუმცა ეს უკანასკნელი შეიძლება, არც წაიყვანონ, რადგან მალე მას სხვა შეჯიბრება ელოდება. თითქმის გადაწყვეტილია, რომ ხინჩეგაშვილის ნაცვლად გიორგი რევაზიშვილი იჭიდავებს.

ტრავმირებულია მსოფლიოს ვიცე-ჩემპიონი და ევროპის მრავალგზის მედალოსანი ბექა ლომთაძეც (61), ოღონდ ამ წონაში მაინც გვეყოლება მონაწილე - ქვედა წონიდან ამონაცვლებული ოთარ გოგავა. სამაგიეროდ, ჯერჯერობით გაურკვეველია, ვინ იჭიდავებს 57 კილოგრამში. იანტბელიძე იქ გიორგი ღონიაშვილის წაყვანას გეგმავდა, მაგრამ ეს მისი ოჯახური პრობლემების გამო გახდა საეჭვო - ათიოდე დღის წინ ახალგაზრდა სპორტსმენს დედა გარდაეცვალა და ახლა ყველაფერი მასზეა დამოკიდებული, ექნება თუ არა საჭიდაო განწყობა.

ბულგარული შეჯიბრება სამივე საჭიდაო სტილში ტარდება - ქალებშიც და ვაჟების ორივე სტილში, თუმცა რუსეში ჩვენგან მხოლოდ თავისუფალი სტილით მოჭიდავეები გამოვლენ. იმ შეჯიბრების დასრულების შემდეგ ჩვენი ნაკრები სამშობლოში დაბრუნდება და აქ გააგრძელებს მზადებას ევროპის ჩემპიონატისთვის, რომელსაც 8-14 აპრილს ბუქარესტი უმასპინძლებს. იქ წასვლამდე ჩვენი ნაკრები ორ შეკრებას გაივლის - ბორჯომსა და დუშეთში, ისე კი გუნდი ახლაც შეკრებაზეა - ბაკურიანში, სადაც ფიზიკურად ემზადება. აქედან გამომდინარე, ბულგარეთში დიდი შედეგები არაა მოსალოდნელი და ამ ეტაპზე ფორმაში ყოფნა არცაა საჭირო.

თუმცა მარტში ნაკრებს ერთი შეჯიბრება კიდევ ელოდება - მსოფლიოს თასი, რომელიც 16-17 მარტს ციმბირში, ქალაქ იაკუტსკში გაიმართება, ოღონდ იქ ჩვენები სათადარიგო შემადგენლობით გამოვლენ. უკვე ცნობილია მსოფლიოს თასზე ჩვენი მეტოქეები მეორე ჯგუფში: მსოფლიოს თასის შარშანდელი მფლობელი აშშ, ირანი და მონღოლეთი.

ბულგარეთის ტურნირი
57 კგ. გიორგი ღონიაშვილი (ან - არავინ)
61 კგ. ოთარ გოგავა
65 კგ. გიორგი რევაზიშვილი
70 კგ. ზურაბ იაკობიშვილი (ან - ლევან ქელეხსაშვილი)
74 კგ. ავთანდილ კენჭაძე (ან - ზურაბ ერბოწონაშვილი)
79 კგ. ნიკა კენჭაძე
86 კგ. სანდრო ამინაშვილი
92 კგ. ირაკლი მწითური
97 კგ. ელიზბარ ოდიკაძე (ან - მამუკა კორძაია)
125 კგ. გენო პეტრიაშვილი

მსოფლიოს თასი სავარაუდო შემადგენლობა

57 კგ. ლაშა ლომთაძე
61 კგ. თორნიკე ქათამაძე, გოდერძი ძებისაშვილი
65 კგ. ამირან ვახტანგიშვბილი
70 კგ. მირზა სხულუხია
74 კგ. ზურაბ ერბოწონაშვილი
79 კგ. დავით ხუციშვილი
86 კგ. ტარზან მაისურაძე
92 კგ. დავით მარსაგიშვილი
97 კგ. მამუკა კორძაია
125 კგ. როლანდ ანდრიაძე

ყოველდღიური სპორტული გაზეთი "ლელო"
733
მკითხველის კომენტარები / 0 /
მსგავსი ამბები
რუბრიკის სხვა სიახლეები
;