საქართველოს თავისუფალი სტილით მოჭიდავეთა ნაკრები ივან იარიგინის მემორიალში იასპარეზებს

საქართველოს თავისუფალი სტილით მოჭიდავეთა ნაკრები 26-28 იანვარს კრასნოიარსკში იასპარეზებს ივან იარიგინის მემორიალში.

ეს სეზონის ერთ-ერთი ყველაზე პრესტიჟული შეჯიბრებაა, თუმცა ჩვენები ნაწილობრივ პოლიტიკური ვითარების, ნაწილობრივ კი შორი გზის გამო (ამას ჩვენთვის არახელსაყრელი კალენდარიც ემატება - სეზონის დასაწყისში ტარდება, ამ დროს კი ჩვენს ფედერაციებს ბიუჯეტი ჯერ კიდევ არა აქვთ დამტკიცებული) მასში არ მონაწილეობდნენ.

წლეულს იქ წასვლის ვარიანტს ნაკრების ხელმძღვანელობა კი განიხილავდა, მაგრამ ისევ და ისევ ზემოაღნიშნულის გამო, გადაწყვეტილი არ იყო, თუმცა საბოლოოდ გადაწყდა და ეროვნული გუნდი გიორგი იანტბელიძის ხელმძღვანელობით წუხელ ღამე გაფრინდა ციმბირში.

იანტბელიძემ იქ სათადარიგო შემადგენლობა წაიყვანა - ძირითადად ახალგაზრდები, 20 და 23-წლამდელთა ნაკრების კანდიდატები, რადგან ლიდერებს ერთი თვის თავზე - 22-25 თებერვალს კიევში გასამართავი დიდი საერთაშორისო ტურნირისთვის ინახავს.

ტიტულოვანთაგან გუნდში მხოლოდ ევროპისა და მსოფლიოს პრიზიორი სანდრო ამინაშვილია (86), ვისი გამოსვლაც მწვრთნელებისთვის ყველაზე საინტერესოა.

როგორც გითხარით, დანარჩენები ახალგაზრდები არიან, აქედან გამომდინარე კი მწვრთნელები აქცენტს შედეგზე არ აკეთებენ, მათ უფრო მომავალი თაობის გამოცდა სურთ, რათა ისინი აქედანვე შეეჩვიონ ძლიერ მეტოქეებთან, ძლიერ ტურნირებში ჭიდაობას და მიიღონ საჭირო გამოცდილება.

საამისოდ იარიგინის მემორიალი მართლაც მშვენიერი შანსია, რადგან იქ მუდამ უძლიერესი შემადგენლობა იკრიბება და, წინასწარი მონაცემებით, გამონაკლისი არც წლევანდელი შეჯიბრებაა.

გამონაკლისი კი არა, იქნებ სხვებზე ძლიერიც გამოდგეს. რუსები, განსაკუთრებით კი მისი სამხრეთული ავტონომიები - ოსები, დაღესტნელები, ყაბარდოელები, ინგუშები, თუ სხვები `კბილებს ილესავენ" და ვალში არც ციმბირელები დარჩებიან, სადაც ორი სკოლაა - იაკუტსკისა და დიმიტრი მინდიაშვილის ხელდასმული კრასნოიარსკის (აქ იარიგინის ტურნირზე მოსახვედრად შესარჩევი შეჯიბრებაც კი ჩაატარეს).

ასევე - წმინდა რუსული რეგიონები (მოსკოვი, სანკტ-პეტერბურგი, როსტოვი, კრასნოდარი და სხვები) თუ ვოლგისპირეთის ავტონომიები... ასეთი გამალებული მზადება გასაკვირიც არაა, რადგან რუსებისთვის ეს საევროპოდ მთავარი შესარჩევი შეჯიბრებაა, თუმცა მათ სოლიდური უცხოური `ლაშქარიც" ემატება:

ამერიკელები უძლიერესი შემადგენლობით ჩადიან - თავისი ოლიმპიური ჩემპიონების, ჯეკ უორნერისა (86) და კაილ სნაიდერის (97), მსოფლიოს ჩემპიონ ლოგან სტრიბერის (65) და სხვათა თავკაცობით. პოლონელები კარგა ხანია, დაღესტანში გადიან შეკრებას, არგენტინელები სულაც იქვე იზამთრებენ, კრასნოიარსკში ჩასასვლელად ემზადებიან იაპონია, კორეა, მონღოლეთი და სხვები.

ბუნებრივია, ასეთ კომპანიაში ჩვენს სათადარიგო ნაკრებს წარმატების დიდი შანსი არ აქვს. მით უფრო, სამ წონაში - 57-ში, 74-სა და 125-ში არ გვეყოლება მონაწილე, მაგრამ ახალგაზრდებს გამოცდილების მისაღებად კი ძალიან წაადგებათ.

საქართველოს ნაკრები

61 კგ. თეიმურაზ ვანიშვილი (გორი)
65 კგ. მაგომედ საიდოვი (ყვარელი), ედემი ბოლქვაძე (სამტრედია)
70 კგ. ლევან ქელეხსაშვილი (ქარელი), რამაზან მალაკოევი (ყვარელი)
79 კგ. ტარიელ გაფრინდაშვილი (თბილისი)
86 კგ. სანდრო ამინაშვილი (გარდაბანი), ზაურ ბერაძე (ხარაგაული)
92 კგ. ნოდარ ეგაძე (გორი)
97 კგ. გივი მაჭარაშვილი (მცხეთა)

ყოველდღიური სპორტული გაზეთი "ლელო"
863
მკითხველის კომენტარები / 0 /
მსგავსი ამბები
რუბრიკის სხვა სიახლეები
;