საქართველოს ნაკრების მეორეხაზელი ნოდარ ჭეიშვილი კარიერას ინგლისში განაგრძობს

საქართველოს ნაკრების მეორეხაზელი ნოდარ ჭეიშვილი კარიერას ინგლისში განაგრძობს.

ქართველმა მორაგბემ ამ ქვეყნის ჩემპიონშიპის კლუბთან "ქორნიშ პირატსთან" ერთწლიანი კონტრაქტი გააფორმა. ეს გუნდი გასულ სეზონში მე-4 ადგილზე გავიდა და სამომავლოდ სერიოზული ამბიციები აქვს.

]აღსანიშნავია, რომ ნოდარ ჭეიშვილი ინგლისში გადასვლამდე საფრანგეთის ჩემპიონატის ფედერალ-1 დივიზიონში მოასპარეზე "შამბერის" ღირსებას იცავდა.
"მოხარული ვარ ახალ გუნდში გადასვლით. მომწონს ინგლისური თამაშის სტილი. კარგ ფორმაში ვარ და კიდევ უფრო მოვუმატებ. თუ უკეთ ვითამაშებ, უფრო მაღალი დონის გუნდში თამაშის შანსიც მომეცემა. ამ შემთხვევაში უფრო მეტად შევძლებ განვითარებას." - თქვა ნოდარ ჭეიშვილმა.

"ბორჯღალოსნების" მეორეხაზელი მესამე ქართველი იქნება, რომელიც მომავალ სეზონში ბრიტანეთში იასპარეზებს. მის გარდა უელსურ კლუბებში გიორგი ნემსაძე (ოსფრიზი) და ანტონ ფეიქრიშვილი (კარდიფი) თამაშობენ. საქართველოს ნაკრების მესამეხაზელმა ლაშა ლომიძემ "ლონდონ აირიში" დატოვა და, სავარაუდოდ, კარიერას საფრანგეთში განაგრძობს.

ცნობილი გახდა, რომ საქართველოს ნაკრების შერკინების ბურჯმა კარლენ ასიეშვილმა "ბრივთან" კონტრაქტი ორი წლით გაახანგრძლივა. "ბრივს" წლეულს ელიტაში ხელი მოეცარა და მეორე დივიზიონში გადაბარგდა. ასიეშვილი გუნდიდან წასვლას გეგმავდა, მაგრამ კლუბის ხელმძღვანელებმა ის მაინც დაითანხმეს კარიერის "ბრივში" გაგრძელებაზე.

გავრცელებული ინფორმაციით, მეორე დივიზიონის "ორიაკში" გადავა საქართველოს ახალგაზრდული ნაკრების ერთ-ერთი ლიდერი, მეორეხაზელი ბექა საღინაძე. ამავე კლუბში ჩაირიცხნენ მესამეხაზელები გიორგი ჯავახია და გიორგი ცუცქირიძე. "ოიონაქსიდან" კი ორიაკელებს პირველხაზელი გიორგი ვეფხვაძე შეურთდება. შეგახსენებთ, რომ "ორიაკში" ირჯება საქართველოს ნაკრების კაპიტანი, შუამარბი მერაბ შარიქაძე.

ყოველდღიური სპორტული გაზეთი "ლელო"
335
მკითხველის კომენტარები / 0 /
მსგავსი ამბები
რუბრიკის სხვა სიახლეები