საქართველოს ნაკრების მეტოქე ბელარუსმა ახალი მწვრთნელი დაასახელა

ბელარუსის ნაკრების ახალ მწვრთნელად მიხაილ მარხელი დაინიშნა. lelo.ge უკვე წერდა, რომ ის იყო მთავარი ალტერნატივა იგორ კრიუშენკოს წასვლით შექმნილ ვაკანტურ პოსტზე.

52 წლის მარხელი სხვადასხვა ბელარუსულ კლუბში თამაშობდა. ბოლოს ოცნება აისრულა და მოხვდა მინსკის "დინამოში", სადაც ითამაშა კიდეც საბჭოთა კავშირის ბოლო 3 ჩემპიონატი და გაიტანა 12 გოლი.

მალე საბჭოთა კავშირის ჩემპიონატი ისტორიის კუთვნილება გახდა და მარხელმა ჯერ იუგოსლავიურ "ბუდუჩნოსტში" ითამაშა, მერე კი უნგრეთში მოსინჯა ძალა, მაგრამ ვერანაირ წარმატებას ვერ მიაღწია. 

შემდეგ ის მოხვდა ვლადიკავკაზის "ალანიაში", სადაც 1993 წელს 14 გოლი შეაგდო. იმ დროიდან მან გადაწყვიტა მწვრთნელობა და ამ თემაზე ხშირად საუბრობდა ვალერი გაზაევთან. საჩემპიონო სეზონში ის უკვე აღარ იყო "ალანიაში". ამის შემდეგ მოსკოვის "ტორპედოში" ითამაშა.

ტრავმების გამო 30 წლის ასაკში მარხელი იძულებული გახდა, დაესრულებინა საფეხბურთო კარიერა და სამწვრთნელო ასპარეზზე გადასულიყო. "ზვეზდა", ბრესტის "დინამო" და სოლიგორსკის "შახტიორი", რომელსაც ის ჭაბუკთა ნაკრების პარალელურად მოძღვრავდა - ასეთია მისი სამწვრთნელო კარიერა.

2009 წლიდან მარხელი ბელარუსის სხვადასხვა ნაკრებში მუშაობს. წვრთნიდა ყველა ასაკობრივ გუნდს, გამორჩეული წარმატება კი 17-წლამდელებში ჰქონდა - ეს გუნდი ევროპის ჩემპიონატის ელიტრაუნდში გავიდა...

ბელარუსის ახალგაზრდულ ნაკრებს მარხელმა მხოლოდ ერთხელ უხელმძღვანელა, როცა ჟოდინოში 10 უპასუხო გოლი გაუტანა გიბრალტარს... ბელარუსები მიიჩნევენ, რომ მისი ხელმძღვანელობით ნაკრები უფრო შემტევ ფეხბურთს ითამაშებს, ვიდრე აქამდე.

თანაც, მარხელს კარგად ეხერხება ახალგაზრდებთან მუშაობა. თავის დროზე ის დაეხმარა პირველი ნაბიჯების გადადგმაში ალექსანდრ გლებს, რომელიც პოსტსაბჭოთა პერიოდის ბელარუსული ფეხბურთის მთავარი ვარსკვლავია...

697
მკითხველის კომენტარები / 1 /
თეიმურაზ რეხვიაშვილი
0
მიბაძეთ ბელორუსებს თუ გინდათ რომ მოვუგოთ
მსგავსი ამბები
რუბრიკის სხვა სიახლეები
;