საქართველოს ნაკრებმა ამხანაგურ მატჩში კვიპროსი დაამარცხა [VIDEO]

10 ნოემბერს, საქართველოს ფეხბურთელთა ეროვნულმა ნაკრებმა ამხანაგურ მატჩში კვიპროსის ნაკრებს უმასპინძლა და მეტოქე ანგარიშით 1:0 დაამარცხა.

გორში, თენგიზ ბურჯანაძის სახელობის სტადიონზე გამართულ შეხვედრაში ანგარიში კვიპროსელთა მეკარის უხეში შეცდომის შედეგად, 24-ე წუთზე გაიხსნა. ჯაბა კანკავამ ანტონის გეორგალიდისის პასი ჩაჭრა, ბურთი კი კართან მარტო მყოფ გიორგი ქვილითაიას მიუვიდა, რომელსაც ახლო მანძილიდან გატანა არ გასჭირვებია.

თუკი შეხვედრის პირველ ნახევარში ვლადიმირ ვაისის გუნდის სათამაშო უპირატესობა მეტ-ნაკლებად თვალსაჩინო იყო, შესვენების შემდეგ სტუმრები შედარებით გააქტიურდნენ. 67-ე წუთზე მათ გოლის გატანის რეალური შანსიც ჰქონდათ, მაგრამ გიორგი ლორიამ ითამაშა ბრწყინვალედ.

მეორე ტაიმში ანგარიში აღარ შეცვლილა. მომდევნო ამხანაგურ შეხვედრას კი საქართველოს ნაკრები 13 ნოემბერს, ქუთაისში, ბელარუსის წინააღმდეგ ჩაატარებს.

საქართველოს ნაკრებმა კვიპროსთან მატჩი ამ შემადგენლობით ჩაატარა: გიორგი ლორია, გურამ კაშია, დავით ხოჭოლავა, ოთარ კაკაბაძე, გიორგი ნავალოვსკი (83, გია გრიგალავა), ჯაბა კანკავა, ვაკო ყაზაიშვილი (67, საბა ლობჟანიძე), გიორგი კვეკვესკირი (83, გიორგი აბურჯანია), გიორგი პაპუნაშვილი (74, ვაკო გვილია), გიორგი მერებაშვილი (83, ირაკლი სიხარულიძე), გიორგი ქვილითაია (83, ნიკა კაჭარავა).

1976
მკითხველის კომენტარები / 0 /
მსგავსი ამბები
რუბრიკის სხვა სიახლეები
;