საქართველოს ჩემპიონატი. ბერძნულ-რომაულის დასავლური აქცენტი

გუშინ ოლიმპიურ პარკში მდებარე ფრენბურთის დარბაზში დაიწყო საქართველოს ჩემპიონატი ბერძნულ-რომაულ ჭიდაობაში.

გაიმართა წინასწარი შეხვედრები 5 წონით კატეგორიაში, სადაც გაირკვა ფინალური წყვილები. ამ წონებში ფინალური ბლოკი და დამამშვიდებელი წრის შეხვედრები ხვალ გაიმართება.

გუშინდელი დღის ერთ-ერთ მთავარ მოვლენად აჭარის ნაკრების წევრ ფირუზ წულუკიძის დაბრუნება იქცა, რომელიც ამჯერად 63 კილოგრამში გამოვიდა.

შეგახსენებთ, რომ ახალგაზრდებში ევროპის ჩემპიონი ეროვნულ ნაკრებშიც წარმატებით გამოვიდა, მაგრამ მერე პოლიტიკურ-აღმსარებლობით სკანდალში გაეხვია - ბათუმში მომხდარი აფეთქების შემდეგ თავის მწვრთნელთან ერთად ვაჰაბიტებთან კავშირის ბრალდებით დააპატიმრეს.

თუმცა სასჯელი მოიხადა და ჭიდაობაში საკმაოდ წარმატებითაც დაბრუნდა - ნახევარფინალშიც გავიდა, სადაც ჭაბუკებში მსოფლიოს ჩემპიონ ლერი აბულაძესთან დამარცხდა და დღეს ბრინჯაოსთვის იჭიდავებს თანაგუნდელ თემურ ბერიძესთან.

სხვა მხრივ ჩემპიონატიც საკმაოდ საინტერესოდ დაიწყო და ახალმა თაობამ თავისი ჯანსაღი ამბიცია კიდევ ერთხელ დაამტკიცა: უმეტეს წონებში სწორედ ახალგაზრდები ან ამ ასაკის ნაკრების წევრები გავიდნენ ფინალში.

აღსანიშნავია ოზურგეთის და აჭარის გუნდების კარგი გამოსვლა: ხუთი წონიდან ორივეს 3-3 ფინალისტი ჰყავს. თამამად შეიძლება ითქვას, რომ ბერძნულ-რომაული ჩემპიონატი დასავლური აქცენტით მიმდინარეობს.

ფინალურ წყვილებს ქვემოთ შემოგთავაზებთ, მანამ კი გეტყვით, რომ ყველაზე საინტერესო დუეტი მაინც ძველი ლიდერების მონაწილეობით შეიქმნა: 82 კილოგრამში გუშინ ყველა მეტოქეს სძლიეს ევროპის ორგზის ჩემპიონმა ზურაბ დათუნაშვილმა და უფროსებში მსოფლიოს პრიზიორმა ლაშა გობაძემ, რომლებიც დღეს ფინალში ერთმანეთში იჭიდავებენ.

ორგანიზატორებმა ეს ფალავნები თავიდანვე განთესეს, გობაძემ კი ერთ დათუნაშვილს გუშინ უკვე მოუგო: მეორე წრეში ზურას უმცროსი ძმა, გიორგი დათუნაშვილი 4:2 დაამარცხა.

მანამ თბილისელ ლევან არუსიასაც მოუგო, ნახევარფინალში კი გარდაბნელი აივენგო რიკაძეც დაამარცხა. დათუნაშვილი პირველ წრეში ისვენებდა, მერე კი ჯერ ოგანეზოვი დაამარცხა წმინდად - 8:0, ბოლოს კი ნერგაძესაც სძლია.

სხვა ფინალური წყვილებიდან ყურადღებას იქცევს მსოფლიოს პრიზიორ რევაზ ნადარეიშვილისა და კუკური კირცხალიას დუეტი, რომლებიც ბოლო წლებში 97-ის უპირობო ლიდერებად იქცნენ.

ესენიც განთესილები იყვნენ, ნადარეიშვილი კი შესარჩევში ისვენებდა, ხოლო მერე ზესტაფონელ გიორგი ორბელაძესა და წყალტუბოელ ირაკლი ქაჯაიას მოუგო. კირცხალიამ კი თბილისელ ნიკა პატარაიას, ბაღდათელ მათე სოფაძეს და ოზურგეთელ ვალერი მურვანიძეს აჯობა.

თუმცა ნაკლებად საინტერესო არც სხვა ფინალური წყვილებია, სადაც ისეთი წარმატებული ახალგაზრდები გამოდიან, როგორიც ხობელი ნუგზარ წურწუმია და ოზურგეთელი ზურაბ მაჭარაშვილი (ორივე - 55), ხულოელი ლერი აბულაძე და ოზურგეთელი ლევან ქავჟარაძე (63), ხელვაჩაურელი რამაზ ზოიძე და კიდევ ერთი ნიჭიერი ოზურგეთელი იური ლომაძე (72) არიან. წესით, ყველა ფინალი ძალიან დაძაბული და საინტერესო უნდა გამოდგეს.

აბულაძე-წულუკიძე უკვე გითხარით და ქავჟარაძემ ერთი ძლიერი კონკურენტი უკვე დაამარცხა - სენაკელი ხვიჩა ჭითავა. ზოიძემაც კარგ კონკურენტებს აჯობა: ბათუმელ ლევან შავაძეს, გარდაბნელ ნიკოლოზ ჭიკაძეს და ოზურგეთელ გოგა ხუჭუას.

თუმცა ამ წონაში ლომაძეს, ვგონებთ, კიდევ უფრო ძლიერი მეტოქეებმ აჯობა: სენაკელ საჩინო დავითაიას, ქუთაისელ გიორგი ბუცხრიკიძეს და დმანისელ გოგა აფრიამაშვილს.

55 კგ. ნუგზარ წურწუმია (ხობი) - ზურაბ მაჭარაშვილი (ოზურგეთი)
63 კგ. ლერი აბულაძე (აჭარა) - ლევან ქავჟარაძე (ოზურგეთი)
72 კგ. რამაზ ზოიძე (აჭარა) - იური ლომაძე (ოზურგეთი)
82 კგ. ზურაბ დათუნაშვილი (თბილისი) - ლაშა გობაძე (აჭარა
97 კგ. რევაზ ნადარეიშვილი - კუკური კირცხალია (ორივე - თბილისი)

ყოველდღიური სპორტული გაზეთი "ლელო"
379
მკითხველის კომენტარები / 0 /
მსგავსი ამბები
რუბრიკის სხვა სიახლეები