საქართველოს ჩემპიონატი. ძიუდოს კლასიკა დიღომში

გუშინ ძიუდოს აკადემიაში დამთავრდა საქართველოს ჩემპიონატი ძიუდოში, რომელმაც საკმაოდ მაღალ დონეზე ჩაიარა იმის მიუხედავად, რომ რამდენიმე ლიდერი არ გამოდიოდა, ხოლო სპორტსმენები ახლა იწყებენ მომავალი სეზონისთვის მზადებას და ჯერ შორს არიან სასურველი ფორმისგან.

ტურნირის მთავარ მოვლენად 90 კილოგრამის ფინალი იქცა, რომელშიც ერთმანეთს ორი ქარიზმატული ლიდერი შეხვდა: ევროპის ბრინჯაოს მედალოსანი ბექა ღვინიაშვილი ევროპის სამგზის და მსოფლიოს ჩემპიონ ავთანდილ ჭრიკიშვილს დაუპირისპირდა.

ეს შეხვედრა ჩემპიონატის კლასიკადაც შეიძლება, მივიჩნიოთ, თუმცა 81 კილოგრამშიც არანაკლები ამბები მოხდა: ნაადრევად დამარცხდა ევროპის კიდევ ერთი ბრინჯაოს მედალოსანი ზებედა რეხვიაშვილი,

რაც გუშინდელი დღის მთავარი მოულოდნელობა აღმოჩნდა, საბოლოოდ კი ამ წონის ჩემპიონი მისი მომგები, ახალგაზრდა ტალანტი თამაზ კირაკოზაშვილი გახდა. სანახაობრივად ამ წონის ფინალი 90-ისაზე უკეთესი გამოდგა მასსა და ევროპის ორგზის ფინალისტ ნუგზარ ტატალაშვილს შორის.

ღვინიაშვილს შენარჩუნებული ჰქონდა მასტერსზე ნაჩვენები მომზადების მაღალი დონე, ჭრიკიშვილი კი ოპერაციის შემდეგ პირველად ჭიდაობდა, რაც ფიზიკურ კონდიციებზეც დაეტყო: ღვინიაშვილმა ძირითადად "ფიზიკის" ხარჯზე მოიპოვა გადამწყვეტი უპირატესობა.

გაცილებით მძაფრი და უშეღავათო გამოდგა კირაკოზაშვილისა და ტატალაშვილის ბრძოლა, რასაც "თაობათა ბრძოლაც" შეიძლება ვუწოდოთ. საბოლოოდ ახალგაზრდობამ გაიმარჯვა, რადგან კირაკოზაშვილი შედარებით აქტიური იყო.

ერთ მომენტში მას მშვენიერი ბრუნი არ შეუფასეს, თუმცა ამ ეპიზოდს მსაჯები კარგა ხანს არჩევდნენ. სამაგიეროდ, შეხვედრის განახლებისთანავე მომავალმა ჩემპიონმა კარგად გადაიყოლა ვარდნაში ვაზარზე.

ოღონდ ტატალაშვილმაც ისეთი დონე გამოავლინა, ვეჭვობთ, ამ წონაში კიდევ ბევრს გაამწარებს - ის ხომ აქამდე ადაპტაციას გადიოდა ახალ წონაში, ახლა კი იქ დასამკვიდრებლად რეალურ ბრძოლას იწყებს.

დარჩენილი ორი წონიდან 100-ის ფინალში ლაშა ტაველურმა დამაჯერებლად მოუგო იასონ ნემსაძეს, მძიმეში კი ლევან მატიაშვილმა თავის საყვარელ ილეთზე - მოგვერდზე მოიგდო ონისე ბუღაძის ხელი და ვაზარით დაამარცხა. მატიაშვილის დაბრუნებაც ასევე საყურადღებო მომენტია, რამაც ამ წონაში კონკურენცია კიდევ უფრო უნდა გააძლიეროს.

ამით საქართველოს ჩემპიონატი კი დასრულდა, მაგრამ არა ძიუდოს სეზონი: 30 დეკემბერს ფედერაცია წლის შემაჯამებელ საღამოს მართავს.

81 კგ.

1. თამაზ კირაკოზაშვილი (საგარეჯო); 2. ნუგზარ ტატალაშვილი (გორი); ზებედა რეხვიაშვილი, კობა მჭედლიშვილი (ორივე - თბილისი).

90 კგ.

1. ბექა ღვინიაშვილი (გორი); 2. ავთანდილ ჭრიკიშვილი (გარდაბანი); 3. თორნიკე ჯუღელი (თბილისი), გიორგი პაპუნაშვილი (გორი).

100 კგ.

1. ლაშა ტაველური (თბილისი); 2. იასონ ნემსაძე (ქუთაისი); ონისე სანებლიძე, დავით ოზბეთელაშვილი (ორივე - თბილისი).

+100 კგ.

1. ლევან მატიაშვილი (თბილისი); 2. ონისე ბუღაძე (საჩხერე); 3. გიორგი ზაქარიაძე (სამტრედია), გიორგი ქავთარაძე (თბილისი).
ირაკლი თავაძე

ყოველდღიური სპორტული გაზეთი "ლელო"
2643
მკითხველის კომენტარები / 0 /
მსგავსი ამბები
რუბრიკის სხვა სიახლეები
;