საქართველოს ჩემპიონატი ჭიდაობაში. ლოგიკური დასაწყისით

გივი კარტოზიას სპორტის სასახლეში გუშინ დაიწყო საქართველოს ჩემპიონატი თავისუფალ და ბერძნულ-რომაულ ჭიდაობებში, რომელმაც წლევანდელი ნაკრების ბირთვი უნდა გამოავლინოს.

დიდწილად, სწორედ ამ ჩემპიონატის შემდეგ გამოვლინდებიან ის ფალავნები, რომლებიც ევროპის ჩემპიონატისთვის მოემზადებიან.

ჩემპიონატი საკმაოდ ორგანიზებულად მიმდინარეობს და რაც მთავარია, კიდევ ერთხელ დადასტურდა, სპორტის ძველი სასახლე მისადგომად რამდენად მოსახერხებელია ქომაგისთვის. მათი რაოდენობა ცოტა არც დღეს ყოფილა, მაგრამ, იმედია, მომდევნო დღეებში კიდევ უფრო მოიმატებს.

რაც მთავარია, თავად ტურნირის დონეა საკმაოდ მაღალი, რადგან თითქმის ყველა უძლიერესი ფალავანი გამოდის. როგორც გითხარით, ტრავმების გამო მწვრთნელები მხოლოდ სამ ლიდერს ასვენებენ - მსოფლიოს ჩემპიონებს, ვლადიმერ ხინჩეგაშვილს (65) და ზურაბ იაკობიშვილს თავისუფალ ჭიდაობაში და 23-წლიანებში მსოფლიოს ჩემპიონ ზვიად პატარიძეს (130) ბერძნულ-რომაულში. დანარჩენ ლიდერთაგან ყველა გამოდის ორივე სტილის ჭიდაობაში.

ჩემპიონატის უკეთ ორგანიზების მიზნით საქართველოს ჭიდაობის ეროვნულმა ფედერაციამ უცხოელი მსაჯებიც მოიწვია - სამი სომხეთიდან და ამდენივე - აზერბაიჯანიდან. თანაც, ყველა მაღალი დონის მსაჯია და დაკისრებულ მოვალეობას თავი კარგადაც გაართვეს.

ბუნებრივია, შეჯიბრება ორდღიანი ფორმატით ტარდება. ამიტომ გუშინ გაიმართა წინასწარი ეტაპის შეხვედრები, ნახევარფინალების ჩათვლით, სულ შვიდ წონაში - ოთხი თავისუფალში და სამიც - ბერძნულ-რომაულში. ამ წონებში დამამშვიდებელი წრის შეხვედრები და ფინალური პაექრობები დღეს გაიმართება, მანამდე კი დღესვე - ჩემპიონატში მორიგი წონების წარმომადგენლები ჩაებმებიან.

ჩემპიონატის პირველმა დღემ განსაკუთრებული სიურპრიზების გარეშე ჩაიარა და ყველა წონაში თითქმის იმ ფალავნებმა გაიმარჯვეს, ვისგანაც სპეციალისტები ელოდნენ კიდეც ასეთ წარმატებას. ბუნებრივია, სპორტსმენები ჯერ არ არიან სათანადო ფორმაში და ამ ეტაპზე ეს არც მოეთხოვებათ, მაგრამ ბევრმა მათგანმა საკმაოდ კარგად იჭიდავა. წინასწარი შეხვედრების შემდეგ რამდენიმე ძალიან საინტერესო წყვილიც მივიღეთ. მაგალითად, საყოველთაო ყურადღებას იპყრობს თავისუფალ ჭიდაობაში 79 კილოგრამი, სადაც ერთმანეთს ისევ ძველი მეტოქეები, 23-წლიანებში მსოფლიოს მოქმედი ჩემპიონი ნიკა კენჭაძე და ტარიელ გაფრინდაშვილი შეხვდებიან. ისინი ამ ცოტა ხნის საქართველოს 3-წლიანთა პირველობის ფინალშიც გავიდნენ და მაშინ გაფრინდაშვილმა აშკარა უპირატესობით გაიმარჯვა. ვნახოთ, რა მოხდება ამჯერად.

ასევე საინტერესოა ამავე სტილით ჭიდაობაში 97 კილოგრამის ფინალი, სადაც მსოფლიოს მედალოსანი, ევროპის ვიცე-ჩემპიონი ელიზბარ ოდიკაძე  23-წლიანებში მსოფლიოს ჩემპიონ გივი მაჭარაშვილს შეხვდება. ესეც საქართველოს შარშანდელი ჩემპიონატის გამეორებაა, რომელიც ცოტა ნერვიული და ემოციური პაექრობა გამოდგა, თუმცა მაშინ ოდიკაძემ დამაჯერებლად მოიგო. სიტყვამ მოიტანა და ოდიკაძემ ახლა ნახევარფინალში გადაიხადა მძიმე ბრძოლა ბათუმელ მამუკა კორძაიასთან, ვისაც 3:0 უგებდა, მაგრამ მეტოქემ ანგარიში გაათანაბრა და უპირატესობაც მიიღო. სამაგიეროდ, დარჩენილ 30 წამში კორძაიამ მიუტევებელი შეცდომა დაუშვა, ფეხში შეუშვა ოდიკაძე, რომელმაც გარეთ გაიყვანა და 4:3 მოიგო. საკმაოდ საინტერესო გამოდგა პარალელურად მიმდინარე მეორე ნახევარფინალიც მცხეთელებს - მაჭარაშვილსა და ზურაბ ურთაშვილს შორის. ესენიც ოდინდელი მეტოქეები არიან, თუმცა ამჯერად მაჭარაშვილმა დამაჯერებლად იმარჯვა.

წესით, საინტერესო უნდა გამოდგეს 86 კილოგრამის ფინალიც ევროპისა და მსოფლიოს პრიზიორ სანდრო ამინაშვილსა და ახალგაზრდებში ლამის ყველა ტიტულის მფლობელ ტარზან მაისურაძეს შორის. თუმცა ამ პაექრობას თაობათა შორის ბრძოლაც შეიძლება ვუწოდოთ. გუშინ ორივემ კარგად იასპარეზა და დაველოდოთ დღევანდელ საღამოს.

ბერძნულ-რომაულ ჭიდაობაში ყურადღებას იქცევს 87 კილოგრამის ფინალი, სადაც ორი ტიტულოვანი ფალავანი შეერკინება ერთმანეთს: ევროპის მოქმედი ჩემპიონი, მსოფლიოს ორგზის ბრინჯაოს მედალოსანი რობერტ კობლიაშვილი ევროპის ორგზის ჩემპიონ ზურაბ დათუნაშვილს ხვდება. ისინი პირველად იპაექრებენ ერთმანეთში, რაკი დათუნაშვილი ახლა გადავიდა ზედა წონაში. მას ჯერ კიდევ არ გაუვლია ადაპტაცია, რაც ეტყობოდა კიდეც გუშინ, თუმცა ფინალში მაინც გავიდა.

ასევე ფინალში გავიდა წლევანდელი სეზონის აღმოჩენა, ახალგაზრდებიდან შარშან გადმოსული ევროპისა და მსოფლიოს მესამე პრიზიორი ნუგზარ წურწუმია (55). სხვათა შორის, ის გიორგი მაჭარაშვილს ხვდება და ესეც შარშანდელი ფინალის გამეორებაა.

დასასრულს, თქვენს ყურადღებას ერთ უცნაურ ფაქტზე შევაჩერებთ ბერძნულ-რომაული ჭიდაობიდან: წონა დაიკლო და გუშინ 72 კილოგრამის ნაცვლად 67-ში მოგვევლინა უნიჭიერესი ხელვაჩაურელი რამაზ ზოიძე, თუმცა ის დღეს 72 კილოგრამის ოქმებშიცაა შეტანილი! ვნახოთ, იასპარეზებს თუ არა დღესაც. მისგან უცნაურობებს მიჩვეული ვართ - ჭაბუკობისას ბერძნულ-რომაულთან ერთად „თავისუფალსაც“ ჭიდაობდა (მეტიც - ვარჯიში სულაც ამ სახეობაში დაიწყო); ჭაბუკებთან ერთად ახალგაზრდებშიც გამოდიოდა და ყველგან, ყველა ნაკრებში, ყველა სტილში წარმატებით ასპარეზობდა - ასაკობრივებში მოიგო უკლებლივ ყველა ტიტული. მისი ნიჭიერებისა დღესაც გვჯერა, თუმცა ამჯერად საქმე წონის კლებას ეხება, ასეთი მკვეთრი ცვლილება კი არა გვგონია, მის ორგანიზმს კარგად მოუხდეს.

დასასრულს გეტყვით, რომ დღეს თავისუფალ ჭიდაობაში 61, 70 და 125 კილოგრამების ფალავნები იასპარეზებენ, ხოლო ბერძნულ-რომაულში - 60, 72, 97 და 130-ის.

თავისუფალი ჭიდაობა

65 კგ. ამირან ვახტანგიშვილი (გორი) - ედემი ბოლქვაძე (სამტრედია)

79 კგ. ნიკა კენჭაძე (ამბროლაური) - ტარიელ გაფრინდაშვილი (თბილისი)

86 კგ. სანდრო ამინაშვილი (თბილისი) - ტარზან მაისურაძე (ყაზბეგი)

97 კგ. ელიზბარ ოდიკაძე (თბილისი) - გივი მაჭარაშვილი (მცხეთა)

ბერძნულ-რომაული ჭიდაობა

55 კგ. ზურაბ მაჭარაშვილი (ოზურგეთი) - ნუგზარ წურწუმია (ხობი)

67 კგ. საჩინო დავითაია (სენაკი) - მურად მიქელაძე (აჭარა)

87 კგ. ზურაბ დათუნაშვილი (თბილისი) - რობერტ კობლიაშვილი (გარდაბანი)

ყოველდღიური სპორტული გაზეთი "ლელო"
949
მკითხველის კომენტარები / 0 /
მსგავსი ამბები
რუბრიკის სხვა სიახლეები
;