[საქართველოს ჩემპიონატი. I ლიგა] დაუმარცხებელი სამი დარჩა

საქართველოს ჩემპიონატის პირველ ლიგაში ექვსი ტურის შემდეგ სამი გუნდი, ქუთაისის „არესი“, პატარძეულის „ვეფხვები“ და თბილისის „არმია“ ჯერაც დაუმაცხებლად ასპარეზობს...

საბოლოო ჯამში, როგორც ჩანს, უმაღლესი ლიგის საგზურისთვის სწორედ ეს გუნდები იბრძოლებენ. სატურნირო ცხრილს სათავეში 30-30 ქულით „არესი“ და „ვეფხვები“ უდგანან. ორივე გუნდმა მე-6 ტურში იოლად გაიმარჯვა. ქუთაისურმა გუნდმა სტუმრად სამოყვარულო კლუბი თბილისის „დევები“ დაამარცხა - 76:0. პატარძეულელებმა კი, ოზურგეთის არწივებს სძლიეს 57:7.

„არმიამ“ ახალციხის „ტაოს“ მოუგო 50:7, რომელმაც სტარტზე ზედიზედ სამ გამარჯვებას, სამი მარცხი მოუნაცვლა. სტეფანწმინდას „ყაზბეგმა“ კი, პირიქით, დასაწყისში ორი მარცხის შემდეგ ზედიზედ ოთხჯერ მოიგო. ამჯერად ყაზბეგელებმა თბილისის „დინამოს“ სძლიეს 63:5 და მეოთხე ადგილზე დამკვიდრდნენ.

მომდევნო ტურის ცენტრალური მატჩი ქუთაისში გაიმართება, რომელშიც „არესი“ თბილისის „არმიას“ უმასპინძლებს. შედეგად, სავარაუდოდ, გათამაშებას ერთი დაუმარცხებელი გუნდით ნაკლები დარჩება.

I ლიგა. VI ტური
დევები-არესი 0:76
ვეფხვები-არწივები 57:7
ბაგრატი-ივერია 20:19
ყაზბეგი-დინამო 63:5
არმია-ტაო 50:7

სატურნირო მდგომარეობა: არესი - 30 ქულა, 2. ვეფხვები - 30, 3. არმია - 29, 4. ყაზბეგი - 18, 5. ტაო - 13, 6. ბაგრატი - 8, 7. არწივები - 8, 8. დევები - 5, 9. დინამო - 1, 10. ივერია - 1

VII ტური: ივერია-დევები, არესი-არმია, ტაო-ვეფხვები, არწივები-ყაზბეგი, დინამო-ბაგრატი

*  * *

რეგიონულ ლიგაში, სადაც 12 გუნდი ორ, დასავლეთ და აღმოსავლეთ ზონებშია განაწილებული, მე-4 ტურის შეხვედრები გაიმართა. დასავლეთ ზონაში ჭიათურის „რაგბის სკოლა“ და წყალტუბოს „დინოზავრი“ დაწინაურდნენ. ჭიათურელებს, რომლებმაც ყველა მატჩი მოიგეს, 20 ქულა აქვთ და კონკურენტს ერთი ქულით უსწრებენ. მესამე ადგილზე 10 ქულით ქედას „ფირალებია“.

აღმოსავლეთ ზონაში, ასევე დაუმარცხებლად ლიდერობს თბილისის „ხვამლი“, რომელმაც 19 ქულა დააგროვა. მას სამი ქულით ჩამორჩება „თელავი“. მესამეადგილოსან გორს კი, 15 ქულა აქვს.

*  * *

ჭაბუკთა A ლიგაში დაუმარცხებლად ქუთაისის „აია“ ლიდერობს. ქუთათურებმა ექვსი თამაშიდან ექვსივე მოიგეს. ერთი მარცხი აქვს პასივში და მეორე ადგილზეა თბილისის „ლელო“. ლიდერებს კონკურენტები, რუსთავის „ხარები“, მარნეულის „არმაზი“ და თბილისის „ხვამლი“ საგრძნობლად ჩამორჩებიან.

174
მკითხველის კომენტარები / 0 /
რუბრიკის სხვა სიახლეები
;