საქართველოს ძიუდოისტთა ნაკრები: კონსულტანტის ძიებაში

საქართველოს ძიუდოისტთა ნაკრებსა და კორეელ ოლიმპიურ ჩემპიონ კი-იონ ჯეონს შორის თანამშრომლობა ვერ შედგა კორეელის მოუცლელობის გამო, თუმცა კონსულტანტის მოწვევის საკითხი დღის წესრიგიდან არ მოხსნილა.

შეგახსენებთ, რომ ჩვენს ფედერაციას მსოფლიოს სამგზის და ოლიმპიური ჩემპიონის მოწვევა ნაკრების კონსულტანტად სურდა, კორეელი აქაც იყო ჩამოსული პირობებზე შესათანხმებლად, რაღაც კონტურებიც დაისახა, თუმცა ის საერთაშორისო ფედერაციაშიცაა დასაქმებული და პრობლემას სწორედ ეს ქმნის - ფიზიკურად ვერ იცლის აქ ჩამოსასვლელად.

საქართველოს ძიუდოს ფედერაციის პრეზიდენტ დავით ქევხიშვილის თქმით, მან თავად შემოგვთავაზა ასეთი მოდელი: ქართული მხარე გაუგზავნის ჩვენი ყველა სპორტსმენის შეხვედრას, რასაც ანალიზს გაუკეთებს თვითონ და ამის საფუძველზე გამოიტანს დასკვნებს, მოგვცემს რჩევებს, ვის სად, რაში სჭირდება მომატება, ყურადღების გამახვილება და ასე შემდეგ.

ქევხიშვილს ამ თემებზე მასთან ბუდაპეშტში, მსოფლიოს ჩემპიონატზეც უსაუბრია და ახლა სწორედ ამ მოდელის პრაქტიკულად შემოწმებაზე მიდის ფიქრი - რამდენად გაამართლებს ის. თუ გაამართლა, მაშინ კორეელთან მუშაობაც გაგრძელდება, თუ არადა, ჩვენი ფედერაცია ალტერნატიულ კადრებზეც მუშაობს. თურმე ამაში ჯეონიც აქტიურად ყოფილა ჩართული და რამდენიმე კორეელის კანდიდატურა თავადაც შეუთავაზებია ჩვენებისთვის: ლონდონის ოლიმპიადის გამარჯვებული და მსოფლიოს ორგზის ჩემპიონი კიმ-ჯაე ბუმი, ოლიმპიური ჩემპიონი ვონ-ჰეე ლეე, მაგრამ ფიზიკურად ვერც ისინი ახერხებენ საქართველოში სამუშაოდ ჩამოსვლას, ასე დისტანციურად საქმიანობას კი დიდად არც ჩვენი ფედერაცია მიესალმება.

ყოველდღიური სპორტული გაზეთი "ლელო"
997
მკითხველის კომენტარები / 0 /
მსგავსი ამბები
რუბრიკის სხვა სიახლეები
;