საქართველოს წყალბურთელთა ნაკრები: წილისყრამ ისრაელი გვარგუნა

გაისად ივლისში ბარსელონა წყალბურთელ ქალ-ვაჟთა ევროპის ჩემპიონატის ფინალურ ეტაპს უმასპინძლებს. მედლებისთვის 16 ქვეყნის წარმომადგენლები იბრძოლებენ.

რვა ნაკრებს წინა ჩემპიონატიდან ჰქონდა კატალონიის დედაქალაქის საგზურები დაბევებული. შარშან ბელგრადში კონტინენტის ჩემპიონობა სერბებმა მოიპოვეს, რომლებმაც ფინალში მონტენეგროს აჯობეს. მესამე ადგილისთვის პაექრობაში უნგრელებმა ბერძნები დაამარცხეს.

მეხუთე-მერვე ადგილებზე, შესაბამისად, ესპანეთი, იტალია, ხორვატია და რუსეთი გავიდნენ. სწორედ ამ გუნდებს ჰქონდათ თავი ქუდში. ვაკანტური რვა ადგილის მფლობელი 23 გუნდს შორის უნდა გარკვეულიყო.

შარშანდელი ფინალის მონაწილენი - საფრანგეთი, რუმინეთი, გერმანია, ჰოლანდია, სლოვაკეთი, საქართველო, მალტა და თურქეთი პლეი ოფში ელოდნენ კონკურენტებს. საკვალიფიკაციო პაექრობების შემდეგ გაირკვა საგზურების რვა მაძიებელი.

გასულ უქმეებზე ბუდაპეშტში პლეი ოფის წილისყრა გაიმართა. გუნდები ასე დაწყვილდნენ: საქართველო-ისრაელი, საფრანგეთი-შვეიცარია, რუმინეთი-ჩეხეთი, პოლონეთი-გერმანია, ჰოლანდია-ლიტვა, პორტუგალია-სლოვაკეთი, ბელარუსი-მალტა, უკრაინა-თურქეთი.

24 თებერვალს პირველად დასახელებული გუნდები შინ ითამაშებენ, ხოლო 3 მარტს განმეორებითი პაექრობები გაიმართება. ორი მატჩის ჯამში საუკეთესოები ბარსელონის საგზურს დაიმსახურებენ.

წილისყრით კმაყოფილი ვართ, - გვითხრა საქართველოს საწყლოსნო სახეობათა ეროვნული ფედერაციის ვიცე პრეზიდენტმა ალექსანდრე ბითაძემ. - თუმცა წინასწარვე ვიცოდით, რომ ან ისრაელს, ან პორტუგალიას უნდა შევხვედროდით. საქართველოს ნაკრებს კი მათი ძლევა და ფინალურ რაუნდში მოხვედრა არ უნდა გაუჭირდეს.

ყოველდღიური სპორტული გაზეთი "ლელო"
1486
მკითხველის კომენტარები / 0 /
მსგავსი ამბები
რუბრიკის სხვა სიახლეები
;