საქართველოს 18 წლამდე გოგონათა ნაკრები: ევროპის ლიგისკენ

საქართველოს 18 წლამდე გოგონათა ნაკრები ევროპის ახალგაზრდულ ლიგაზე ერთვება. ამ შეჯიბრებაში ბოლო წლებში სისტემატიურად ასპარეზობენ ვაჟთა ასაკობრივი ნაკრებები, ამიერიდან კი მასში ქართველი გოგონებიც ჩაერთვებიან.

საქართველოს 18 წლამდე გოგონათა ნაკრებმა წლეულს ევროპის ჩემპიონატის "ბ" დივიზიონში არცთუ ცუდად იასპარეზა. ის სათამაშო გამოცდილება, რასაც გოგონები ევროპის ლიგაზე ასპარეზობისას მიიღებენ, მათ კლასს მნიშვნელოვნად აამაღლებს.

2017-18 წლების სეზონის ევროპის ლიგის პირველი ეტაპი უკრაინის ქალაქ ოდესაში 20-22 ოქტომბერს გაიმართება. ტურნირში 8 გუნდი მონაწილეობს: საქართელოს ნაკრები, "პოლიტექნიკა" (პოლონეთი), "ანტვერპენი" (ბელგია), "ალვიკი" (შვედეთი), "გდინია" (პოლონეთი), "ოდესა" (უკრაინა), "ლულეა" (შვედეთი) და "ნოვა ვესი" (სლოვაკეთი).

პირველ ეტაპზე გუნდები 2 ჯგუფში გადანაწილდნენ. საქართველოს ნაკრების ჯგუფში მოხვდნენ "ანტვერპენი", "პოლიტექნიკა" და "ალვიკი". ჯგუფში I წრის შემდეგ 1-2 ადგილებზე გასული გუნდები ნახევარფინალში ითამაშებენ, ხოლო 3-4 ადგილოსნები 5-8 ადგილებს გაინაწილებენ.

მომდევნო ეტაპი 1-3 დეკემბერს ლატვიაში გაიმართება, შემდეგ პოლონეთში. 3 ეტაპის ჯამში 4 გუნდი ოთხთა ფინალში გავა და 3-6 მაისს ლატვიის დედაქალაქ რიგაში ევროპის ლიგის საპრიზო ადგილებისთვის ითამაშებს.

საქართველოს 18-წლამდელთა ნაკრები
მოთამაშე პოზიცია სიმაღლე დაბ. თარ.
ვიქტორია გეგეშიძე უკანახაზელი 176 19.04.2000
მარიამ ღარიშვილი ფორვარდი 186 12.11.2000
გვანცა ბოჭორიშვილი ცენტრი 188 15.03.2000
ანა ქავთარაძე ცენტრი 187 10.06.1999
სალომე კალანდაძე ფორვარდი 179 15.05.2000
ელენე ილურიძე ფორვარდი 177 18.01.1999
ანა ქარსელაძე ცენტრი 191 08.03.1999
მარიამ ოქროპირიძე უკანახაზელი 162 12.11.2001
ლიკა მიქიაშვილი ცენტრი 194 14.08.2001
ნანა ნავროზაშვილი ფორვარდი 175 15.01.2001
მთავარი მწვრთნელი: ნინო ყიფშიძე.

ყოველდღიური სპორტული გაზეთი "ლელო"

930
მკითხველის კომენტარები / 0 /
რუბრიკის სხვა სიახლეები