საქართველოში სპორტი გაჩერდა

საქართველოში დაგეგმილი ყველა სპორტული ღონისძიება შეწყდა, სპორტულ ორგანიზაციებს კი რეკომენდაცია მიეცათ, რომ არ ჩაატარონ შეჯიბრებები, მოსამზადებელი შეკრებები, სწავლებები და სემინარები ანუ ყველაფერი, რაც ხალხმრავალ ღონისძიებას უკავშირდება და ვირუსის გავრცელების საფრთხეს წარმოადგენს.

აღნიშნულის თაობაზე განცხადებას საქართველოს განათლების, მეცნიერების, კულტურისა და სპორტის სამინისტრო ავრცელებს, მიზეზი კი ნათელია: კორონავირუსის პანდემია, რომლის თაობაზეც პრემიერ-მინისტრის ხელმძღვანელობით მოქმედი უწყებათაშორისი საბჭოსა და ჯანდაცვის სამინისტროს კონკრეტული რეკომენდაციები არსებობს.

სამინისტროს განცხადება: „ამ დროისთვის ოფიციალურად შეწყდა: საქართველოს საფეხბურთო ჩემპიონატის უმაღლესი, ასევე ასაკობრივი პირველობები, საქართველოს რაგბის ეროვნული და ასაკობრივი ჩემპიონატი, ხელბურთელთა ჩემპიონატი, ასაკობრივი საკალათბურთო პირველობების გათამაშება და ა.შ.

საქართველოს მთავრობისა და რაგბის კავშირის ერთობლივი გადაწყვეტილებით, 14 მარტს მიხეილ მესხის სტადიონზე დაგეგმილი რაგბი ევროპის ეგიდით გასამართი საქართველო-რუსეთის მატჩი უმაყურებლოდ ჩატარდება.

თბილისის ოლიმპიურ სასახლეში 27-29 მარტს გასამართი ძიუდოს გრან პრი, ძიუდოს საერთაშორისო ფედერაციის (IJF) გადაწყვეტილებით, ოფიციალურად გაუქმდა.

ამასთან, მარტში სხვადასხვა ქვეყანაში დაგეგმილი გახლდათ არაერთი საერთაშორისო ტურნირი, რომელშიც მონაწილეობა უნდა მიეღოთ ქართველ სპორტსმენებსაც, თუმცა შესაბამისი საერთაშორისო ფედერაციების გადაწყვეტილებითა და მსოფლიოს ჯანდაცვის ორგანიზაციის რეკომენდაციით, ეს ღონისძიებები გაუქმდა ან გადაიდო.

შესაბამისად, ჩვენმა სპორტსმენებმა საწვრთნელი შეკრებები შეწყვიტეს და სახლებს დაუბრუნდნენ“.

348
მკითხველის კომენტარები / 0 /
მსგავსი ამბები
რუბრიკის სხვა სიახლეები
;