საქართველო-აშშ 21:20 - რუსთავი და ამერიკა აღარ გამეორდა [VIDEO]

* ნოემბრის ტესტების სერიაში საქართველოს ნაკრებმა ორი მატჩი მოიგო და ერთი დათმო.
* გიორგი ჩხაიძემ ეროვნულ ნაკრებში მე-100 მატჩი ითამაშა.
* გიორგი კვესელაძემ და რეზო ჯინჭველაშვილმა პირველად ითამაშეს "ბორჯღალოსანთა" ძირითად შემადგენლობაში.
* საქართველო-აშშ-ის დაპირისპირებაში ანგარიში გათანაბრდა - 3:3.

საქართველოს ნაკრებმა ნოემბრის ტესტები გამარჯვებით დაასრულა. "ბორჯღალოსნებმა" სერიის ბოლო მატჩში ვაკის სტადიონზე ამერიკის შეერთებული შტატების ეროვნული გუნდი 21:20 დაამარცხეს.

ამ მატჩში ეროვნულ ნაკრებში მე-100 კეპი მოიხვეჭა "ბორჯღალოსნების" მეორეხაზელმა გიორგი ჩხაიძემ. ის საქართველოს ნაკრებში მესამე ცენტურიონია. ასზე მეტი მატჩი აქვთ გამართული ეროვნულ ნაკრებში ფულბეკ მერაბ კვირიკაშვილს და შუამარბ დავით კაჭარავას.

აშშ-ის ნაკრებთან თამაში ჩვენი ნაკრებისთვის არასდროს ყოფილა იოლი გასეირნება. მაშინ, როცა ჩვენი გუნდი უელსის ნაკრებთან უმძიმეს ბრძოლაში იყო, ამერიკელებმა ფრანკფურტში გერმანიის ნაკრებთან, ფაქტობრივად, ივარჯიშეს და მაქსიმალურად შემართულები გამოვიდნენ ივნისში განცდილი მარცხის გამო რევანშის ასაღებად.

საქართველოს ნაკრების შემადგენლობა ამ მატჩში, ცოტა არ იყოს, უჩვეულოდ გამოიყურებოდა. პირველად იდგნენ გუნდის ძირითად შემადგენლობაში მგეზავი რეზო ჯინჭველაშვილი და შუამარბი გიორგი კვესელაძე. პირველად ითამაშა თავიდან ბოლომდე გარემარბის პოზიციაზე სოსო მათიაშვილმაც. მალევე მოუწია თამაშში ჩართვამ ახალგაზრდა ცხრა ნომერ გელა აფრასიძეს, თუმცა არც ვასილ ლობჟანიძეა ხნიერი, რომელიც მე-7 წუთიდან ტრავმის გამო გამოეთიშა თამაშს. მესამედ ითამაშა ძირითად შემადგენლობაში მირიან მოდებაძემ

საქართველო
21
აშშ
20
საქართველო: (15-9) კვირიკაშვილი (მალაღურაძე 66) მათიაშვილი, შარიქაძე, კვესელაძე, მოდებაძე, ჯინჭველაშვილი, ლობჟანიძე (აფრასიძე 8); (1-8) ნარიაშვილი (ჟვანია 65), ბრეგვაძე, (მამუკაშვილი 65), ჩილაჩავა (ბეკოშვილი 66), ჩხაიძე (ნემსაძე 54), მიქაუტაძე, სუთიაშვილი (ლომიძე 54), კოლელიშვილი (თხილაიშვილი 62), ბიწაძე
3 ლ: საჯარიმო, ჩილაჩავა ბრეგვაძე; 2 გ: მათიაშვილი
სინბინი: კოლელიშვილი, ჩილაჩავა
აშშ: (15-9) სქალი, ტეო, ბრაქი, ქემპბელი (მეგი 79) მეთიასი (ოგსპერგერი 79), მაკგინთი, დევისი; (1-8) ქილიფი (მოუნგალოა 16) ტაუფეტეე (მელქომი 59) ველდრენი (რაიანი 52) პითერსონი (ბრეიქლი 63), სივეთა, ლენდრი (დურუთალო 75) ქვილი (ლემბორნი 52) მანოა
3 ლ: ტაუფეტეე (2) ქემპბელი; ს, გ: მაკგინთი
მსაჯი: პიერ ბრუსე (საფ)

ერთი სიტყვით, თითქმის მთელი მატჩის განმავლობაში უკანა ხაზში ყველაზე გამოცდილი მხოლოდ ორი, გუნდის კაპიტანი მერაბ შარიქაძე და ფულბეკი მერაბ კვირიკაშვილი იყო.

მიუხედავად ამისა, მეტოქის მხრიდან უდიდესი წნეხის პირობებში, ახალგაზრდა მორაგბეები არ გატყდნენ. მეტიც, მატჩის შემდეგ ჩვენი ნაკრების მთავარმა მწვრთნელმა სწორედ ისინი გამოარჩია და განსაკუთრებით ხაზი გაუსვა კვესელაძისა და აფრასიძის კარგ თამაშს.

სტუმართა გუნდმა მაღალი კლასის რაგბი აჩვენა. ორჯერ ლელო იმ ხერხით გაგვიტანა, რომელიც ჩვენს გუნდს ყველაზე უკეთ გამოსდის. მოლით თამაში, ამერიკელთა მწვრთნელის თქმით, ამ მატჩისთვის საგანგებოდ დაუმუშავებიათ. თავიდან შერკინებაშიც გაგვიძალიანდნენ, მაგრამ ნელ-ნელა ამ კომპონენტში უპირატესობას მივაღწიეთ.

"ბორჯღალოსნები" ორჯერ ჩამორჩნენ მეტოქეს ანგარიშში, მაგრამ 30-ე წუთიდან, როცა 14:12 დაწინაურდნენ, მეტოქე წინ აღარ გაგვიშვია. თანაც, ჩვენმა ნაკრებმა ორი ლელო სტუმრებს კაცნაკლულმა გაუტანა.

ცხადია, იყო ხარვეზებიც. უშეცდომოდ არც მეტოქეს უთამაშია. ცუდი ისაა, რომ ხშირად ვჯარიმდებოდით. მცირე ხნით მოედანზე 13 კაცით დავრჩით. შერკინებამ, ტრადიციულად, ბევრი და ნაყოფიერად იმუშავა.

წუთი წუთზე

1-ელი წუთი: დაინიშნა პირველი დერეფანი საქართველოს ნაკრების სასარგებლოდ, რომელიც "ბორჯღალოსნებმა" სუფთად მოიგეს.
მე-2 წუთი: დაინიშნა პირველი შერკინება აშშ-ის ნაკრების სასარგებლოდ.
მე-5 წუთი: ამერიკელების მრავალფაზიანი შეტევის დროს დავჯარიმდით. მეტოქემ ბურთი აუტში გადაიტანა.
მე-6 წუთი: სტუმრებმა დერეფანი ჩვენი ლელოდან 7 მეტრში სუფთად მოიგეს, მოლი ააგორეს, მძლავრი ბიძგებით "ბორჯღალოსნებს" უკან დაახევინეს და ჩათვლის მოედანში შეაღწიეს. ლელო შერკინების კვაჭმა ჯო ტაუფეტეემ გაიტანა. მგეზავმა ეი ჯეი მაკგინთიმ ვერ გარდასახა - 5:0.
მე-7 წუთი: ამ შეტევისას დაშავდა საქართველოს ნაკრების ცხრა ნომერი ვასილ ლობჟანიძე, რომელიც ახალგაზრდა გელა აფრასიძემ შეცვალა.
მე-14 წუთი: საქართველოს ნაკრების სასარგებლოდ პირველი საჯარიმო დაინიშნა. მერაბ კვირიკაშვილმა კარში არ დაარტყა და ბურთი აუტში გადაიტანა.
მე-17 წუთი: დერეფნიდან აგორებული მოლის შემდეგ თამაში რაკში გადავიდა. სტუმრებმა თამაშის წესი დაარღვიეს და არბიტრმა საჯარიმო დანიშნა. "ბორჯღალოსნებმა" შერკინება მოითხოვეს. მეტოქეს მძლავრად მიაწვნენ და როცა ლელო გარდაუვალი იყო, ამერიკელებმა შეტევა წესის დარღვევით შეაჩერეს. არბიტრმა საჯარიმო ლელო დააფიქსირა - 7:5.
23-ე წუთი: მატჩის არბიტრმა შუბური ბოჭვისთვის ვიქტორ კოლელიშვილი გაასინბინა.
24-ე წუთი: სტუმრებმა საჯარიმოდან ბურთი აუტში გადაიტანეს. დერეფნიდან ისევ მოლი შეკრეს და ლელო ისევ ჯო ტაუფეტეემ გაიტანა. მაკგინთიმ ამჯერად გარდასახვა ზუსტად დაარტყა - 12:7.
28-ე წუთი: საქართველოს ნაკრების მრავალფაზიანი შეტევა მარჯვენა ფრთაზე გაგრძელდა. გიორგი კვესელაძემ ხაზი გაჭრა, მერე შეტევა ლევან ჩილაჩავამ განაგრძო, რაკიდან ბურთი შალვა სუთიაშვილმა აიტაცა, რომელიც ზედ ლელოს ხაზთან შეაჩერეს. ისევ რაკი, ჩილაჩავა აქაც შესანიშნავად გაისარჯა და ბურთი ლელოში გადადო. სოსო მათიაშვილმა გარდასახა - 14:12.
32-ე წუთი: არბიტრმა განზრახ უხეში თამაშისთვის ლევან ჩილაჩავა გაასინბინა.
39-ე წუთი: სტუმრების ლელოდან ხუთ მეტრში დერეფანი მოვიგეთ. გიორგი ჩხაიძემ, მეტოქისთვის მოულოდნელად, ბურთი უმალვე შერკინების კვაჭს ჯაბა ბრეგვაძეს ჩამოუგდო, რომლის შეჩერაბაც ამერიკელებმა ვერ შეძლეს. მათიაშვილმა გარდასახა - 21:12.
59-ე წუთი: სტუმართა მგეზავმა ეი ჯეი მაკგინთიმ საჯარიმო დარტყმა გაიტანა და ანგარიშში სხვაობა შეამცირა - 15:21.
66-ე წუთი: მატჩის არბიტრმა მეტოქის მორკინალი ჰულოჰოლო მოუნგალოა გაასინბინა.
67-ე წუთი: სოსო მათიაშვილმა ხელსაყრელი პოზიციიდან საჯარიმო ვერ გაიტანა.
77-ე წუთი: ამერიკელებმა შესანიშნავი იერიში წამოიწყეს და მარცხენა ფრთაზე, კიდესთან ახლოს ბრაის ქემპბელმა ლელო გაიტანა. მაკგინთიმ ვერ გარდასახა - 20:21.

 

მატჩის შემდეგ
მილტონ ჰეიგი, საქართველოს ნაკრების მთავარი მწვრთნელი:
"პირველ ტაიმში მეტი ქულის მოპოვება შეგვეძლო, თუმცა ბევრი შეცდომა დავუშვით. საკუთარი შერკინება წავაგეთ და ასევე დერეფანი დავთმეთ. მეორე ნახევარში დაცვაში მოგვიწია თამაშმა და მოხარული ვარ, რომ მოგება მოვახერხეთ. რამდენიმე წლის წინათ, ასეთ თამაშს ნამდვილად წავაგებდით და წავაგეთ კიდეც რუსთავში, თუმცა ამჯერად გავიმარჯვეთ და მთავარი სწორედ ესაა...

ამ სამ შეხვედრაში ჩვენ ახალი ტალანტები ვიპოვეთ, რომლებიც ნაკრებს მსოფლიო თასზე გამოადგებიან. კვესელაძემ ძირითად შემადგენლობაში პირველად ითამაშა და ძალიან კარგადაც. ასევე მშვენივრად ითამაშა აფრასიძემაც, რომელსაც თამაშში ჩართვამ ძალიან მალე მოუწია...

ჩვენი მიზანი ნოემბრის ტესტებზე სამივე მატჩის მოგება იყო, მაგრამ ამის გაკეთება ვერ შევძელით. დავამარცხეთ კანადის და ამერიკის ნაკრებები, ხოლო წავაგეთ უელსის ნაკრებთან, რომელიც ბოლომდე წნეხში ვამყოფეთ. შემიძლია ვთქვა, რომ საქართველოს ნაკრებმა ამ ტესტებით წინ დიდი ნაბიჯი გადადგა.

მერაბ შარიქაძე, საქართველოს ნაკრების კაპიტანი:
"ამერიკის შეერთებული შტატების ნაკრები ძლიერი მეტოქეა, რომელთანაც ყოველთვის ძალიან გვიჭირს. რაც ამ გუნდის წინააღმდეგ მითამაშია, ყოველთვის რთული თამაში გამოგვდის. მცირე სხვაობით ვიგებთ ან ვაგებთ და ამჯერადაც ასე იყო. ადრე კანადასთანაც იგივე ხდებოდა, თუმცა ეს უკვე წარსულში მოვიტოვეთ და მომავალში ამერიკელებთანაც დამაჯერებლად უნდა მოვიგოთ".

დეივ ჰიუიტი, აშშ-ს ნაკრების მთავარი მწვრთნელი:
"ამაყი ვარ ჩემი მოთამაშეებით. მათ ბოლომდე იბრძოლეს, წინასწარ შემუშავებული გეგმა შევასრულეთ. საქართველოს ნაკრებს დავუპირისპირეთ ის, რაც მისივე ძლიერი მხარეა: დიდი ყურადღება გავამახვილეთ მოლზე, აუტზე, შერკინებაზე. კარგადაც გამოგვივიდა. ამის დასტურად ისიც გამოდგება, რომ ორი ლელო მოლით გავიტანეთ."

ბლეინ სქალი, აშშ-ის ნაკრების კაპიტანი:
"ისევე, როგორც საქართველო, ჩვენც პროგრესის გზაზე ვართ. მაღალი ხარისხის თამაში იყო, თუმცა არის ხარვეზებიც, სამუშაო კიდევ ბევრი გვაქვს. კმაყოფილები როგორ არ უნდა ვიყოთ, როცა ჩვენზე ძლიერ გუნდთან კარგად ვითამაშეთ და გამარჯვებასთანაც ახლოს ვიყავით".

ნოემბრის ტესტები
ესპანეთი-ბრაზილია 67:28
შოტლანდია-ავსტრალია 53:24
ინგლისი-სამოა 48:14
იტალია-სამ. აფრიკა 6:35
რუმინეთი-ტონგა 20:25
ნამიბია-ურუგვაი 34:39
გერმანია-ჩილე 10:32
უელსი-ახ. ზელანდია 18:33
ირლანდია-არგენტინა 28:19
საფრანგეთი-იაპონია 23:23
ფიჯი-კანადა 57:17.

ყოველდღიური სპორტული გაზეთი "ლელო"
1116
მკითხველის კომენტარები / 0 /
მსგავსი ამბები
რუბრიკის სხვა სიახლეები