საქართველო-ბარბაროსები. ბოლო წამებზე ზოგჯერ, ჩვენც გვიმართლებს [ვრცელი ანალიზი+VIDEO]

საქართველო-ფრ.ბარბაროსები 16:15

საქართველო: (15-9) კვირიკაშვილი (წიკლაური 55)), მათიაშვილი, კვესელაძე, მჭედლიძე, სიჭინავა (თოდუა 60), ჯინჭველაშვილი (ხმალაძე 60), ლობჟანიძე (ხუციშვილი 55); (1-8) თეთრაშვილი (მირცხულავა 41), მამუკაშვილი (ჭყოიძე 41), მელიქიძე (ჟავნია 41), გიორგაძე (ჭეიშვილი 41), ნემსაძე, ცუცქირიძე, შენგელია (შუბითიძე 60), გაჩეჩილაძე (სუთიაშვილი 41).
2ლ: მათიაშვილი, თოდუა. 2ს: მათიაშვილი

ფრ. ბარბაროსები: (15-9) ლაუს-აზპიაზიუ, გიემენი (ბლანი 62), კლემანჩი, ლაბორდი, ამდავი, მატი (ბოსველი 65), ეკოშარი (მუსკარდი 60); (1-8) ფორლეტა (ვანე 50, დავიდი (კარბუ 64), დემეზონი (დიუმა 41), ნკენსი (სენჟე 67), გრანუიე, პლასინი, ბრაზო, ფაბრეგი
2ლ: პლასინი, მუსკარდი. ს, გ: მატი
მსაჯი: კრისტოფ რიდლი (ინგლისი)

საქართველოს ნაკრებმა ოკეანეთსა და იაპონიაში გამგზავრების წინ ეროვნულ სტადიონზე გასახურებელი მატჩი გამართა "ფრანგ ბარბაროსებთან" და დრამატულ ბრძოლაში გაიმარჯვა 16:15.

ეს მატჩი საქართველოს პირველი დემოკრატიული რესპუბლიკის დაარსების 100 წლისთავს მიეძღვნა და "ბორჯღალოსნებმა" სპეციალურად ამ ზეიმისთვის შექმნილი ფორმებით ითამაშეს.

თამაშის საწყისი ათი წუთი "ფრანგი ბარბაროსების" იერიშებში მიილია, თუმცა "ბორჯღალოსნები" დაცვაში კარგად ირჯებოდნენ და რაიმე სერიოზული საფრთხე სტუმრებს არ შეუქმნიათ.

საქართველოს ნაკრებმა მეტოქის შევიწროვება ნელ-ნელა, მეთოდურად დაიწყო და მე-20 წუთზე ანგარიშის გახსნაც მოახერხა. ფრანგებმა თამაშგარეს წესი დაარღვიეს და გარემარბად მოთამაშე სოსო მათიაშვილმა 40 მეტრიდან კარის ძელებს შორის გაატარა ბურთი - 3:0.

მორიგი იერიში ჩვენმა გუნდმა ხუთი წუთის შემდეგ წამოიწყო. სტუმრების 22-მეტრიანი ზონის მისადგომებთან მსაჯმა ჩვენს სასარგებლოდ შერკინება დანიშნა, რომელშიც ფრანგები დაჯარიმდნენ და მათიაშვილმა ამჯერად ბევრად უფრო ხელსაყრელი პოზიციიდან ანგარიში გაზარდა - 6:0.

"ბორჯღალოსნებს" ლელოს გატანაც შეეძლოთ. 34-ე წუთზე მეტოქის ნახევარზე დერეფანი მოვიგეთ და ხელდახელ შევუტიეთ. მორკინალების დარტყმებით ზედ ლელოს ხაზამდე მივედით, მაგრამ მეტოქემ წესის დარღვევით შეგვიჩერა იერიში. საჯარიმოდან ისევ აუტში გადავიტანეთ ბურთი და ისევ ლელოს მიოსადგომებთან ვუტევდით, მაგრამ ერთ-ერთ ეპიზოდში რაკიდან ბურთი აგვართვეს და ვითარება განიმუხტა.

ტაიმის დასასრულს ერთი წუთი აკლდა, როცა შერკინებაში ამჯერად ჩვენ დავჯარიმდით. ფრანგებმა ბურთი სწრაფად გაათამაშეს. ხაზი გაჭრეს და პლასინიმ ლელო გაგვიტანა. მგეზავმა მატმა გარდასახა - 7:6. ასე დასრულდა პირველი ტაიმი.

შესვენებაზე მილტონ ჰეიგმა რამდენიმე ცლილება გააკეთა. მთლიანად შეცვალა პირველი ხაზი, თითო ცვლილება შეეხო მეორე და მესამე ხაზს. თუმცა, უპირატესობას მაინც ბარბაროსები ფლობდნენ, მაგრამ ჩვენი გუნდის დაცვის რედუტების გავლას მაინც ვერ ახერხებენ. თამაში ისევ "ბორჯღალოსნების" გარემარბმა სოსო მათიაშვილმა გააცოცხლა.

56-ე წუთზე მან მარცხენა ფრთაზე ხაზი გაჭრა, იერიში შეცვლაზე შესულმა ცხრა ნომერმა ვაჟა ხუციშვილმა განაგრძო, მას პირველხაზელი ირაკლი მირცხულავა წამოეშველა. წარმოქმნილი რაკიდან ბურთი ისევ მათიაშვილს გაუტანეს, რომელმაც მეტოქის დაცვა პირდაპირ დააწიოკა, მისი შეჩერება ფრანგებმა ვერაფრით შეძლეს და სოსომ ლამაზი ლელო გაიტანა. თუმცა, გარდასახვა კიდედან არაზუსტად დაარტყა - 11:7.

ფრანგები შეტევის მომართულების მუდმივი ცვლით ცდილობდნენ ჩვენი გუნდის ლელოსთან მიახლოვებას, მაგრამ ამაოდ. თუმცა, 65-ე წუთზე "ბარბაროსებისთვის" შეუფერებელი რამ ქნეს, საჯარიმო კარში დაარტყეს და ანგარიშში სხვაობა მინიმუმამდე შეამცირეს - 10:11.

თამაშის დასრულებამდე ხუთი წუთით ადრე მეტოქის ლელოდან ხუთ მეტრში ჩვენს სასარგებლოდ შერკინება დაინიშნა. ფრანგები ამ კომპონენტში წინააღმდეგობას მეტ-ნაკლებად გვიწევდნენ, მაგრამ ამჯერად ორჯერ დაჯარიმდნენ, მესამე შერკინების შემდეგ რვა ნომრის პოზიციაზე მოთამაშე სუთიაშვილმა შეუტია.

მერე ბურთი მარჯვნივ, გრძელ ფრთაზე გამოათამაშეს. შეცვლაზე შესულმა მგეზავმა ლაშა ხმალაძემ ისევ სუთიაშვილი მოძებნა, რომელმაც მეტოქეს ცრუ მოძრაობით გვერდი აუარა დ კიდევ უფრო მარჯვნივ, კიდესკენ გარემარბ ალექსანდრე თოდუას გადააწოდა, რომლის შეჩერება ფრანგებმა ვერაფრით მოახერხეს. მათიაშვილს ისევ არახელსაყრელი პოზიციიდან მოუწია გარდასახვის დარტყმამ და ვერ გაიტანა - 16:10.

სტუმრები მატჩის გადასარჩენად დაიძრნენ. მათ "ბორჯღალოსნების" რამდენიმე შეცდომით ისარგებლეს და ჩვენი გუნდის ჩათვლის მოედანს მიუახლოვდნენ.

ქართველი მორაგბეები თავს თავდადებით იცავდნენ, შერკინებაშიც მედგრად იდგნენ და მეტოქის მიძალებასაც უმკლავდებოდნენ, მაგრამ, როცა მატჩის დრო უკვე ამოწურული იყო, ფრანგებმა შერკინებიდან ბურთი მარჯვნივ, მოკლე ფრთაზე გაიტანეს და შეცვლაზე შესულმა პეიო მუსკარდიმ გაიტანა.

ჟერომ ბოსველს, რომელიც ძალიან კარგი დამრტყმელია, გარდასახვა უნდა გაეტანა და მოგება სტუმრებს დარჩებოდათ. სტუმრების სამწუხაროდ მან ბურთი ძელებს შორის ვერ გაატარა და საქართველოს ნაკრებმა, რომელიც ექსპერიმენტული შემადგენლობით თამაშობდა 16:15.

მატჩის საუკეთესო მოთამაშედ კი საქართველოს ნაკრების გარემარბი სოსო მათიაშვილი დაასახელეს. "ბორჯღალოსნებმა" გუშინვე გეზი ფიჯისკენ აიღეს, სადაც ტონგასა და ფიჯის ნაკრებს ეთამაშებიან. მერე კი იაპონიაში გადაინაცვლებენ და "ტოიოტა სთედიუმზე" "საკურებს" დაუპირისპირდებიან.
მატჩის შემდეგ

მილტონ ჰეიგი, საქართველოს ნაკრების მთავარი მწვრთნელი:
"თამაშში ბევრ ახალგაზრდა მორაგბეს მივეცით თავის გამოჩენის საშუალება. "ფრანგი ბარბაროსები" კარგი, ბევრი ძლიერი მოთამაშეებისგან არჩეული გუნდია. მატჩმა გვაჩვენა, რომ დაცვაში გარკვეულმა სისტემებმა კარგად ვერ იმუშავა. ამ მხრივ სამუშაო ბევრი გვაქვს.

ახალგაზრდა მორაგბეების უმეტესობა ტურნეში წამოვა. ახლა ექიმები აკონტროლებენ და ვნახავთ, რომელიმე მათგანს ტრავმა ხომ არ აწუხებს. ძალიან მომეწონა გიორგი ცუცქირიძის თამაში.

კარგად ითამაშეს გიორგი თეთრაშვილმა, გიორგი მელიქიძემ და ოთარ გიორგაძემ. კმაყოფილი ვარ თამაზ მჭედლიძის თამაშით. ის ფიზიკურად ძლიერი მორაგბეა და ამჟამად კარგ ფორმაში იმყოფება. მას დიდი ხანია ნაკრებში არ უთამაშია და ახალ სათამაშო სისტემებთან სრულად ადაპტირებისთვის დრო საკმარისად არ ჰქონდა. ამიტომ, დაცვაში გარკვეული ხარვეზები შეინიშნებოდა, რაც გამოსწორებადია."

გიორგი ნემსაძე, საქართველოს ნაკრების კაპიტანი:
"ოკეანეთის ტურნესა და იაპონიაში დაახლოებით ასეთივე სტილის მეტოქეები გველოდებიან, როგორიც "ფრანგი ბარბაროსები" იყვნენ. თუმცა, ვიცით, რომ იმ გუნდების თამაშის ხარისხი უკეთესი იქნება. ამიტომ, შეიძლება ითქვას, რომ ამ მატჩმა კარგი გამოცდილება შეგვძინა".

ყოველდღიური სპორტული გაზეთი "ლელო"
2108
მკითხველის კომენტარები / 0 /
მსგავსი ამბები
რუბრიკის სხვა სიახლეები
;