საქართველო ზედიზედ მეორედ! - "ზამთრის თასის" გათამაშება დასრულდა

გუშინ სამივე ტურნირის ფინალური შეხვედრები გაიმართა...

ბავშვებში  საბურთალო...

დავით პეტრიაშვილის სახელობის "ზამთრის თასის" გამარჯვებული 14-წლამდელებს შორის "საბურთალო" გახდა, რომელმაც დაძაბულ გადამწყვეტ შეხვედრაში თბილისის "დინამოს" სძლია 4:2.

აღსანიშნავია, რომ ორივე გუნდმა ფინალამდე ყველა მატჩი მოიგო. ანგარიში ჯადული იობაშვილმა ულამაზესი კომბინაციის შემდეგ გახსნა. მაგრამ საბოლოოდ, "საბურთალომ" მდგომარეობა გამოასწორა და ძლიერ, ღირსეულ მეტოქესთან დამსახურებულად გაიმარჯვა.

ლუკა მამულაშვილის დუბლის შემდეგ თავი ლუკა წულუკიძემ გამოიჩინა, რომელმაც მაყურებელი ულამაზესი დრიბლინგით მოხიბლა და მშვენიერი გოლის ავტორი გახდა.

მატჩის მიწურულს "დინამოს" ერთ-ერთმა გამორჩეულმა ტალანტმა, ლუკა ლაცაბიძემ სხვაობა მინიმუმამდე შეამცირა. მაგრამ თამაშის ინტრიგა ისევ მამულაშვილმა მოკლა, რომელმაც მეკარის მოწოდებული ბურთი კარში მაკრატელათი ეფექტურად გაიტანა, ჰეთ-თრიქი მიითვალა და საბოლოო ანგარიშიც დააფიქსირა 4:2.

ტურნირის საუკეთესო ფეხბურთელისა და ბომბარდირის პრიზი (7 გოლი) სწორედ საბურთალოელ მამულაშვილს ერგო. სპეციალურად დამზადებული თასი კი გამარჯვებულ გუნდს ქართული ფეხბურთის განვითარების ფონდის ხელმძღვანელმა ზაზა დოლიძემ და საქართველოს ფეხბურთის ფედერაციის პირველმა ვიცე-პრეზიდენტმა კახა ჭუმბურიძემ გადასცეს.

გამარჯვებულებმა შემდეგი შემადგენლობით ითამაშეს: საბა ბოჭორიშვილი, ვაჟა აბჟანდაძე, ბესო ცინცაძე, თემო გოგნაძე, ლუკა წულუკიძე, გიორგი ბართია, დავით ბერია, ნიკოლოზ ტაბატაძე, ლუკა მამულაშვილი, ლუკა ოჩიგავა, ნიკა დადიანი, ლევან იახტნიშვილი, გიორგი წოწორია, დავით გოცირიძე.


ლოკომოტივი უკონკურენტოდ...

ფინალამდე მესამე ადგილისთვის მატჩი გაიმართა. "ნორჩი დინამოსა" და "ვიტ ჯორჯიას" შეხვედრის ძირითადი დრო 5:5 დასრულდა. პენალტების სერია უკეთ დინამოელებმა შეასრულეს და მეტოქე 4:3 დაამარცხეს.

თბილისის ოლიმპიურ სასახლეში ერთმანეთს ეროვნული ლიგის "ლოკომოტივი"ლიგა 2-ში ახალგადასულ "შევარდენს" დაუპირისპირდა. ორივე გუნდმა ფინალამდე ჩინებული ფეხბურთი აჩვენა და ყველა დაძაბული მატჩის მოლოდინში იყო.

თუმცა შეხვედრა ლაშა ჭაღიაშვილის გუნდის უპირატესობით წარიმართა და მათი დამაჯერებელი გამარჯვებით დასრულდა. "ლოკომოტივმა" პირველი წუთებიდან აქტიურად შეუტია და თეიმურაზ შონიამ მე-7 წუთზე ანგარიში გახსნა.

2 წუთში დავით ოდიკაძემ ბურთი საკუთარ კარში ჩაჭრა და "ლოკომოტივმა" ორბურთიანი უპირატესობა მოიპოვა. პირველი ტაიმის დასრულებამდე გიორგი გაბაძემ მეტოქის კარში კიდევ ერთი გაიტანა 3:0. საბოლოო ანგარიში მეორე ნახევარში დაფიქსირდა, მე-18 წუთზე "შევარდენის" კარი გიორგი კიკნაძემ აიღო - 4:0.

ზამთრის თასი 2018-ის საუკეთესო მოთამაშედ თბილისის "ლოკომოტივის" კაპიტანი დავით უბილავა დაასახელეს, რომელმაც ტურნირი უმაღლეს დონეზე ჩაატარა. ბომბარდირი კი 8 გოლით თბილისის "ნორჩი დინამოს" შემტევი გიორგი ჯინიკაშვილი გახდა.

ფინალური მატჩის დასრულების შემდეგ დაჯილდოების საზეიმო ცერემონია გაიმართა. გუნდებსა და გამორჩეულ მოთამაშეებს კუთვნილი ჯილდოები, საქართველოს ფეხბურთის ფედერაციის გენერალურმა მდივანმა დავით მუჯირმა და ქართული ფეხბურთის განვითარების ფონდის დირექტორმა ზაზა დოლიძემ გადასცეს.

თბილისის "ლოკომოტივმა" ჩემპიონის თასთან ერთად 15 ათასი ლარი მიიღო, მეორეადგილოსან "შევარდენს" 10 ათასი ლარი გადაეცა, მესამე ადგილზე გასულ "ნორჩ დინამოს" კი - 5 ათასი.


საქართველო ზედიზედ მეორედ!

"ზამთრის თასის" 2018 წლის გათამაშება უცხოელი და ქართველი ვარსკვლავების ტურნირით დასრულდა. წლევანდელ ტურნირზე საქართველოს ნაკრებთან ერთად, ესპანეთის, იტალიის, უკრაინის, თურქეთისა და უეფას გუნდები ასპარეზობდნენ,

მათ შორის - წარსულის ვარსკვლავები - ჟან-ფრანსისკ დომერგი, კრისტიან კივუ, კოზმინ კონტრა, იონ ლუპესკუ, მილენკო აჩიმოვიჩი, მაქს ტონეტო, მაურიციო განცი,

ნიკოლა ამორუზო, სერგეი ნაგორნიაკი, სერგეი ნაზარენკო, ედუარდ ციხმეისტრუკი, ვლადიმირ ლოზინსკი, ჟოან კაპდევილა, ხოსე ამავისკა,

პედრო კონტრერასი, ვისენტე ენგონგა, კახა კალაძე, ლევან კობიაშვილი, დავით მუჯირი, ალექსანდრე იაშვილი, ზურაბ ხიზანიშვილი, მიხეილ ყაველაშვილი, გიორგი დემეტრაძე, ალექსანდრე ამისულაშვილი...

ჯგუფური ეტაპის შეხვედრები ასე დასრულდა.

A ჯგუფი

საქართველო-იტალია 7:6
იტალია-ესპანეთი 2:3
საქართველო-ესპანეთი 2:4

B ჯგუფი

უკრაინა-თურქეთი 3:2
თურქეთი-უეფა 2:3
უეფა-უკრაინა 1:4

ნახევარფინალში ერთმანეთს შარშანდელი გათამაშების ფინალისტები, საქართველო და უკრაინა შეხვდნენ. მატჩი ქართველი ფეხბურთელების სრული უპირატესობით წარიმართა და მათივე გამარჯვებით, 6:1 დასრულდა. ჩვენმა კაპიტანმა კახა კალაძემ პირველ ტაიმში "პოკერი" შეასრულა. გოლებით თავი გამოიჩინეს მიხეილ ყაველაშვილმა და ალექსანდრე იაშვილმაც.

მეორე ნახევარფინალში ესპანეთის ნაკრები უეფას დაუპირისპირდა. დაძაბული შეხვედრა ესპანელთა გამარჯვებით 3:2 დასრულდა.
ფინალურ შეხვედრაში ერთმანეთს საქართველო და ესპანეთი დაუპირისპირდნენ.

ალექსანდრე ჩივაძისა და რევაზ ძოძუაშვილის გუნდმა ჯგუფში განცდილი მარცხის გამო სრულფასოვანი რევანში აიღო, გადამწყვეტ შეხვედრაში მეტოქე 6:3 დაამარცხა და "ზამთრის თასს" ზედიზედ მეორედ დაეუფლა.

ჩემპიონთაგან ჰეთ-თრიკი კალაძემ შეასრულა, თითო გოლი კი ალექსანდრე ამისულაშვილის, ზურაბ ხიზანიშვილისა და ლევან კობიაშვილის ანგარიშზეა.

გუნდებსა და გამორჩეულ მოთამაშეებს ჯილდოები დავით მუჯირმა, პირველმა ვიცე-პრეზიდენტმა კახა ჭუმბურიძემ და კულტურის, ძეგლთა დაცვისა და სპორტის მინისტრის მოადგილემ, შალვა გოგოლაძემ გადასცეს.

საუკეთესო მოთამაშედ უეფას გუნდის წევრი, მილენკო აჩიმოვიჩი დასახელდა, 8 გოლით ბომბარდირი კალაძე გახდა, საუკეთესო მეკარის პრიზი კი ესპანელმა ხულიო იგლესიასმა მიიღო.

"ზამთრის თასი" საქართველოს ნაკრებს დავით პეტრიაშვილის მეუღლემ, ლიკა იოსელიანმა და ქართული ფეხბურთის განვითარების ფონდის გამგეობის თავმჯდომარემ ტარიელ ხეჩიკაშვილმა გადასცეს.

ყოველდღიური სპორტული გაზეთი "ლელო"
1169
მკითხველის კომენტარები / 0 /
მსგავსი ამბები
რუბრიკის სხვა სიახლეები
;