[საქართველო-ირლანდია, მზადების III დღე] ყაზაიშვილი და კაშია ჯერაც არ ჩანან...

საქართველო-ირლანდიის მეთერთმეტე დაპირისპირება "დინამო არენაზე" 12 ოქტომბერს შედგება. ჯგუფის ლიდერთან მატჩისთვის საქართველოს ნაკრები 7 ოქტომბრიდან არასრული შემადგენლობით ემზადება. მთავარი მწვრთნელის განკარგულებაში კვლავ 21 ფეხბურთელი იყო. 9 ოქტომბრის დილის ვარჯიში გუნდმა სრული დატვირთვით ჩაატარა.

ვარჯიშის დასრულების შემდეგ ფეხბურთელებმა თავისუფალი დრო გამოიყენეს და ეროვნული ნაკრების სამი გიორგი - ქვილითაია, აბურჯანია და ლორია თბილისის 157-ე საჯარო სკოლას ესტუმრნენ. ფეხბურთელებმა სკოლის მოსწავლეების კითხვებს უპასუხეს და საქართველო-ირლანდიის მატჩზე დაპატიჟეს, ბოლოს კი მოახლოებულ მატჩზეც ილაპარაკეს:

შეხვედრის დასრულების შემდეგ ეროვნული ნაკრების მოთამაშეებმა ირლანდიასა  და გიბრალტართან დაგეგმილი მატჩების შესახებ ისაუბრეს:

გიორგი ქვილითაია: "ირლანდია უხერხული მეტოქეა და სამწუხაროდ, მათთან ჯერ არ მოგვიგია. ამ წელს ბოლო საშინაო მატჩის გამართვა სწორედ მათ წინააღმდეგ გვიწევს და იმედი მაქვს, ჩვენს გულშემატკივართან ერთად ირლანდიის დამარცხებას და 3 ქულის მოპოვებას შევძლებთ.

რაც შეეხება ჩემს სათამაშო კონდიციებს, საბედნიეროდ ტრავმა აღარ მაწუხებს და ოპტიმალურ ფორმასთან ახლოს ვარ. აქედან გამომდინარე, იმედი მაქვს, ეროვნულ ნაკრებს ჩემი შედეგიანი თამაშით დავეხმარები".

გიორგი აბურჯანია: "ირლანდია ჩვენთვის რთული მეტოქეა. ვფიქრობ, დადგა დრო, ამ გუნდის წინააღმდეგ წარმატებით ვითამაშოთ და გულშემატკივარი გავახაროთ. ჯერჯერობით, სრული შემადგენლობით არ შევკრებილვართ, გურამ კაშია და ვაკო ყაზაიშვილი ხუთშაბათიდან შემოგვიერთდებიან.

წინ ორი მნიშვნელოვანი თამაში გველის, ჩვენი სურვილია, ამ წლის ბოლო საშინაო მატჩი სასურველი შედეგით დავასრულოთ. გულშემატკივარს მოვუწოდებ - მოვიდნენ სტადიონზე და მხარი დაგვიჭირონ. ეროვნული ნაკრების თითოეული ფეხბურთელისთვის მათი მხარდაჭერა ძალიან მნიშვნელოვანია".

ყაზაიშვილისა და კაშიას ჩამოსვლის შემდეგ ნაკრები სრული შემადგენლობით იქნება. ახლა რაც შეეხება მატჩისწინა დღის განრიგის:

აკრედიტებული მედიის წარმომადგენლები აკრედიტაციას 11 ოქტომბერს, "დინამო არენის" მედია-ცენტრში 12 საათიდან 17 საათამდე მიიღებენ. დამატებითი ინფორმაციისთვის დაუკავშირდით სფფ-ის პრესსამსახურს. 11 ოქტომბრის ღონისძიებები:

15:30 - საქართველოს ნაკრების მთავარი მწვრთნელის პრესკონფერენეცია (დინამო არენა)

16:30 - ირლანდიის ნაკრების მთავარი მწვრთნელის პრესკონფერენცია (დინამო არენა)

17:00 - ირლანდიის ნაკრების ვარჯიში (დინამო არენა, ღიაა საწყისი 15 წუთის განმავლობაში)

18:30 - საქართველოს ნაკრების ვარჯიში ("ზესტაფონის" თბილისის ზღვის ბაზა, ღიაა საწყისი 15 წუთის განმავლობაში).

ყოველდღიური სპორტული გაზეთი "ლელო"
1127
მკითხველის კომენტარები / 0 /
მსგავსი ამბები
რუბრიკის სხვა სიახლეები
;