[საქართველო ირლანდიურ მედიაში] ვაისი გარდიანში და რივერდანსი ბარბარესთან, ანუ, როგორ დავაბინძურეთ მომხიბლავი თბილისი ჩვენი თამაშით...

საქართველოს ნაკრების მთავარმა მწვრთნელმა ირლანდიასთან მატჩამდე გამართულ პრესკონფერენციაზე ირლანდიის ნაკრების ფეხბურთი "რივერდანსის" ცნობილი სოლისტის,მაიკლ ფლეტლის ცეკვას  შეადარა...

ცნობილმა ინგლისურმა გამოცემა "გარდიანმა" ვლადიმირ ვაისის ეს სიტყვები კვირის ფრაზად გამოიტანა.

"ირლანდია ფეხბურთს ისევე თამაშობს, როგორც მაიკლ ფლეტლი ("რივერდანსის" მოცეკვავე) ცეკვავს... მისი ენერგიულობა წარმოუდგენელია. ირლანდია კარგი ქვეყანაა, მაგრამ საქართველო კარგი ქვეყანაა და ფანტასტიკური მოცეკვავეები ამ ქვეყანაშიც არიან. რომლის ცეკვა იქნება უკეთესი? ამას ჩვენ ხვალ ვიხილავთ. არ ვფიქრობთ, რომ ქართველების მწვრთნელი ირლანდიას დასცინოდა. მაგრამ ეს პრესკონფერენციაზე მის მიერ ნათქვამი ფრაზაა", - წერს გარდიანი.

შესაძლოა, ჩვენთვის ასეთი რეაქცია მოულოდნელი იყოს, მაგრამ ირლანდიელებს ვაისის ფრაზა იმიტომ გაუკვირდათ, რომ, მათი აზრით, მიკ მაკარტის გუნდი საშინელ ფეხბურთს აჩვენებს. ამიტომ სლოვაკი სპეციალისტის ეს ფრაზა არაერთ გამოცემაში ახსენეს - ზოგან ხუმრობით, ზოგან გაოცებით. "გარდიანმა" კი უბრალოდ კვირის ფრაზებში გამოარჩია.

ამის დასტური კიდევ ერთი პოსტია, რომელიც ირლანდიელ ფანს ეკუთვნის. მანამდე გეტყვით, რომ "მწვანეების" გულშემატკივრები შვეიცარიასთან წაგებითა და ევრო 2020-ზე გასვლის პერსპექტივის შემცირებით აღშფოთებულები არიან. შვეიცარიელთა მთავარმა მწვრთნელმა ვლადიმირ პეტკოვიჩმა განაცხადა, რომ ჯგუფში პირველ ადგილზე დანია გავა, ხოლო მეორეზე შვეიცარია და არა - ირლანდია. ამ საფრთხეს რომ გრძნობენ, მაკარტის ლამის ბოლო სიტყვებით აგინებენ.

მათი აზრით, ირლანდიის ნაკრებმა პირველ ადგილზე გასვლის შანსი თბილისში დაკარგა, სადაც საქართველოსთან მხოლოდ ქულა მოიპოვა და პირველობის განმტკიცების შანსი დაკარგა.

 "ტვიტერში" ჩვენ მიერ ნახსენები საინტერესო პოსტი ირლანდიელთა გულშემატკივარმა ბარი გლენდენინგმა გამოაქვეყნა, სადაც ის წერს:

"ეს ჯგუფი საკმაოდ უჩვეულოა. ირლანდია აბსოლუტური ნაგავია, ვერასდროს გაიგებ, გამარჯვებს თუ დამარცხდება. საქართველომ გიბრალტარი 3:2 დაამარცხა. გუნდი, რომელსაც ჩვენ კარში ერთხელ დავურტყით".

* * *

თბილისში მოგზაურობას ცნობილმა ირლანდიელმა ჟურნალისტმა გევინ ქუინმა წერილი მიუძღვნა:

წერილი თბილისიდან: ჯორჯ ბუშის ქუჩა და XIX საუკუნის სადილი

გევინ კუინი საქართველოდან მიემგზავრება მისი დედაქალაქით მოხიბლული და არა - ფეხბურთით. თბილისში პირველ კილომეტრებს ნახევარ აშენებულ გზატკეცილზე გავდივართ, რომელიც თბილისს აეროპორტთან აკავშირებს და აქ წავაწყდით სწორედ ჯორჯ ბუშის ქუჩას.

ქუჩას ასე მას შემდეგ შეარქვეს, რაც ჯორჯ ბუში უმცროსი 2005 წელს საქართველოს ესტუმრა და ქართველების მხარეს დიპლომატიური ჟესტით კეთილგანწყობა აჩვენა და თავისუფლების მოედანზე ათობით ათას ადამიანს მიმართა.

ვიზიტის მიზანი მეორე მსოფლიო ომის დასრულების 60 წლისთავის აღნიშვნა იყო, ასევე, შეერთებულმა შტატებმა ქართველებს გარკვეული მხარდაჭერა გამოუცხადა რუსების ხელში მოქცეული ტერიტორიის დაბრუნებაში.

გაძლება - ესა არის ოპერატიული სიტყვა თბილისში მოგზაურობისას. გზის აღნიშვნა, როგორც წესი, უმნიშვნელოდ ითვლებოდა, ხოლო ინდიკატორების გამოყენება იშვიათია.

ზოგი ამერიკელი თბილისში ბუშის ქუჩაზე გაცილებით უკეთესს ახსენებს - აეროპორტიდან რამდენიმე კილომეტრზე იმოძრავეთ და ბოულინგის ხეივანთან ხართ, სახელად - "ლებოვსკი ბოული".

ფეხბურთი და ირლანდია საქართველოში

ეს თბილისში 2003 წლის შემდეგ მესამე თამაშია. ირლანდია საქართველოს წინააღმდეგ ისევ დაუმარცხებელია. ისე მეოთხე უნდა ყოფილიყო, მაგრამ 2008 წლის მატჩი მაინცში ჩატარდა, რადგან რუსეთთან კონფლიქტი ჰქონდათ - მადლობა ამისთვის, ბუშ!

ზოგიერთი ირლანდიელი ჟურნალისტის ნაცნობობა ამ ადგილებთან "დინამო არენაზე" გამოჩნდა, როდესაც სტადიონთან "ვაი ფაის" მეხსიერებაზე რამდენიმე ლეპტოპი ავტომატურად ჩაირთო.

ვლადიმირ ვაისი კიდევ უფრო კარგად იცნობს ირლანდიას, ვიდრე ამას ქართველების მთავარი მწვრთნელისგან ველოდით. იმის გათვალისწინებით, რომ ის მანამდე ორჯერ შეხვდა ჩვენს გუნდს, როცა სლოვაკეთის ნაკრებს ხელმძღვანელობდა.

აშკარაა, თამაშამდე ირლანდიის ქება-დიდება ვაისს მობეზრდა და გადაწყვიტა, მოემზადებინა ახალი სიტყვები პრესკონფერენციისთვის და მეტოქის თამაში, რატომღაც, შეადარა იმ გიჟურ, ამაღელვებელ და ენერგიულ მოძრაობებს, რომლითაც მაიკლ ფლეტლი ცეკვავს.

ფლეტლი არ არის ერთადერთი ირლანდიური სახელი, რომელიც საქართველოში მოგზაურობს. პირველი, რაც ტელევიზორის ჩართვისას ვნახე, იყო ფილმის With Me in-ის გახმაურებული ვერსია, რომელშიც დილან მორანი და დევიდ ოდოგერტი თამაშობენ.

თბილისი

თბილისი ევროპული სტანდარტებით ღარიბი ქალაქია და ამიტომ ის ირლანდიელებისთვის ძალიან იაფია. ნამდვილად კარგი საკვები 15 ევროზე მეტი არ ღირს, კათხა ლუდი კი - ევროზე ოდნავ ძვირია.

იმის გამო, რომ დალევა იაფია, ირლანდიელი გულშემატკივრების ნაწილმა ველური სცენები მოაწყო, რასაც ჩვენი ძველი მეგობარი მაიკლ ფლეტლი სოდომ-გომორს დაარქმევდა.

უცნაური, გასაოცარი გამოცდილებაა, როცა სპორტული ჟურნალისტების ხელფასით ქუჩებში დადიხარ და გრძნობ, რა აწუხებს ტანჯულ ელიტას, მაგრამ ამ გრძნობას მარტივად გააძევებთ ჟენევაში წასული - ქალაქში, სადაც გჭირდება საკრედიტო ბარათი და სესხი ვახშმის შესაკვეთად.

საუკეთესო კერძი, რომელიც დავაგემოვნე, იყო ბაქოს ქუჩაზე მდებარე პატარა რესტორანში, სახელწოდებით "ბარბარესთან", რომელიც ოთხი წლის წინ გაიხსნა, როცა კულინარმა ბარბარე ჯორჯაძის მიერ XIX საუკუნეში დაწერილი რეცეპტების წიგნი აღმოაჩინა - გარდაცვლილი ქართველი თავადის ასულის, რომელიც ქალთა უფლებების დამცველი გახლდათ.

თბილისი ძალიან მომხიბლავი ადგილია - სამწუხაროა, რომ ირლანდია კვლავ იძულებული იყო, ის თავისი ფეხბურთით დაებინძურებინა.

ყოველდღიური სპორტული გაზეთი "ლელო"
6483
მკითხველის კომენტარები / 0 /
მსგავსი ამბები
რუბრიკის სხვა სიახლეები
;