საქართველო-კანადა 54:22 - დავიჯეროთ, რომ ჩვენც გრანდები ვართ [VIDEO]

* საქართველოს ნაკრები კანადასთან ურთიერთშეხვედრებში 4:3 დაწინაურდა.
* კანადის ნაკრებს ისტორიაში ყველაზე მეტი ქულა (54) გავუკეთეთ, ყველაზე დიდი სხვაობით (32) მოვუგეთ და ყველაზე მეტი ლელო (6) დავუდეთ.
* მომდევნო ტესტს საქართველოს ნაკრები 18 ნოემბერს კარდიფში უელსის ნაკრებთან გამართავს.

საქართველოს ნაკრების შემადგენლობაში ორი დებიუტანტი იყო. გიორგი კვესელაძეს თამაშმა მხოლოდ რვა წუთი მოუწია. დებიუტანტს მატჩის დღეს 20 წელი შეუსრულდა და როგორც კი მოედანზე გამოჩნდა, სტადიონი აგუგუნდა - გილოცავ! გილოცავ!

მეორე დებიუტანტი მირიან მოდებაძე იყო, რომელმაც თავიდან ბოლომდე ითამაშა, პირველ, ბრწყინვალე ლელოში უშუალო მონაწილეობა მიიღო და ურიგოდ ნამდვილად არ გამოიყურებოდა.

მატჩის გმირი კი ფულბეკი სოსო მათიაშვილი გახდა. ის დებიუტანტი არ გახლდათ. თუმცა, ეროვნულ ნაკრებში სულ რამდენჯერმე მოუწია თამაშმა, ისიც სათადარიგოთა სკამიდან.

სოსო 24 წლისაა, რაგბის თამაში 18 წლისამ დაიწყო. იქამდე მოთხილამურე იყო. სპორტული ცხოვრების სტილისა და დისციპლინის სიყვარულმა რაგბიშიც წარმატება მოუტანა. მან პირველად ითამაშა კანადის ნაკრებთან ეროვნული გუნდის ძირითად შემადეგნლობაში და უმალვე რეკორდი მოხსნა, რომელიც აქამდე მერაბ კვირიკაშვილის იყო. ყველაზე მეტი, 32 ქულა "მეკომ" გერმანიასთან მატჩში მოუტანა გუნდს, რომელიც 77:3 მოვიგეთ. მათიაშვილმა ეს რეკორდული ციფრი ორით გაზარდა.

სოსო მათიაშვილის 34 ქულა (2 ლელო, 6 გარდასახვა, 4 ჯარიმა) ერთ თამაშში ნაკრების ახალი რეკორდია

და ლელო? ორივე ლელო, რომელიც სოსომ გაიტანა, სუპერკლასისა იყო. პირველი, თამაშის დასაწყისშივე გატანილი ლელო, მაღალი კლასის გუნდური მოქმედების შედეგი გახლდათ. მეორე კი პირადად სოსოს ოსტატობისა და თავგანწირვის შედეგია. მატჩის საუკეთესო მოთამაშედაც სწორედ ის დაასახელეს. მის ანგარიშზე 2 ლელო, 6 გარდასახვა და 4 საჯარიმოა (34 ქულა).

საქართველო
54
კანადა
22
საქართველო: (15-9) მათიაშვილი, კოშაძე, კაჭარავა (კვესელაძე 72), შარიქაძე, მოდებაძე, ხმალაძე (ჯინჭველაშვილი 69), ლობჟანიძე (ბეგაძე 64); (1-8) ნარიაშვილი (ასიეშვილი 51), ბრეგვაძე (მამუკაშვილი 57), ჩილაჩავა (ბეკოშვილი 57), მიქაუტაძე (ჩხაიძე 53), ნემსაძე, ლომიძე, კოლელიშვილი (თხილაიშვილი 60), ბიწაძე.

6ლ: მათიაშვილი (2), ნემსაძე, ჩილაჩავა, შარიქაძე, ასიეშვილი. 6გ, 4ს: მათიაშვილი.
კანადა: (15-9) ქოუ, სთოლერი ფან დერ მერვე, ჰერნი (დიუ ტოი 64) პერისი, პარფრი, მაქი; (1-8) სირს-დურუ (ლუკა 53), ბარქვილი, (ჰოვარდი 53), ილნიცკი (ქისი 53), ლარსენი, ომსთედი (ბეილი 69), რამბოლი (გილმორი 23), ჰითონი არდრონი
3ლ: პერისი, ფან დერ მერვე, სთოლერი. 2გ, ს: სთოლერი
მსაჯი: ბენ უაითჰაუსი.

 ამ მატჩში კიდევ ერთი რეკორდი დამყარდა. ასეთი დიდი სხვაობით კანადის ნაკრები არასდროს დაგვიმარცხებია. თამაშის წინ ამას ნამდვილად ვერავინ იფიქრებდა. ამ გუნდთან ბრძოლა ყოველთვის ჭირდა. თუმცა, ჩვენი ნაკრების თამაშის სტილი ნელ-ნელა იცვლება. ასპარეზობაში უკანა ხაზიც აქტიურადაა ჩართული. ნიშანდობლივია, რომ ექვსი ლელოდან ნახევარი სწორედ მათ ანგარიშზეა. ცხადია, ეს მაქსიმუმი არ არის.

პრობლემა კი, რაც თვალნათლივ გამოჩნდა, დაცვაში მეტოქის მოულოდნელ, სწრაფ ქმედებაზე ადეკვატური რეაქციაა. ასეთ ღია თამაშში დაცვის ხაზი გადაწყობას ვერ ასწრებდა და ეს გამოუსწორებელი ხარვეზი სულაც არაა.

მატჩის შემდეგ
მილტონ ჰეიგი, საქართველოს ნაკრების მთავარი მწვრთნელი:
"ახალგაზრდებმა კარგად ითამაშეს, მაგრამ ეს არაფერს ნიშნავს. მატჩი დამთავრდა, 80 წუთი მიილია. მიუხედავად იმისა, რომ 54 ქულა მივითვალეთ, თამაშს რომ გადავხედოთ, 100%-ით კმაყოფილი არ ვარ. თუმცა, გუნდმა მართლა კარგად ითამაშა და ყველაფერს რომ თავი დავანებოთ, ივნისში რომ გვეთქვა, კანადას 54 ქულას ავართმევთო, არარეალურად ჩაითვლებოდა. აქედან გამომდინარე, პროგრესი ნამდვილად არის...

უნდა გავითვალისწინოთ, რომ ეს იყო სერიის პირველი მატჩი. ვიცით, საწყისი შეხვედრა ყოველთვის რთულია, რაც არ უნდა ვივარჯიშოთ, რადგან შეთამაშებას ძალიან დიდი მნიშვნელობა აქვს. ჩვენ დღეს ღამით ლონდონში გავემგზავრებით, გზაში მატჩის ანალიზს გავაკეთებთ და განმეორებას არაერთხელ ვნახავთ. შემიძლია იმის თქმა, რომ როდესაც ბურთს ვკარგავთ, სწრაფად უნდა მოვახერხოთ გადალაგება და ეს აუცილებლად გასაუმჯობესებელი გვაქვს...

უელსთან თამაშში ყველაფერი დამოკიდებულია მასზე, თუ როგორ მოვემზადებით მატჩისთვის. თუმცა, ერთი რამ ძალიან მნიშვნელოვანია. ჩვენ დავიღალეთ იმ მომენტით, როდესაც ამბობენ - პირველი დონის გუნდთან საქართველო უშანსოდაა და ჩვენ, უბრალოდ, მონაწილეობის მისაღებად, სტატისტიკისთვის ჩავდივართ. თუ გვინდა, რომ გრანდებთან შედეგი გვქონდეს, ბოლომდე უნდა ვიბრძოლოთ. უნდა დავიჯეროთ, რომ ჩვენც გრანდები ვართ. უელსთან მატჩში ყველაფერი შეიძლება მოხდეს."

მერაბ შარიქაძე, საქართველოს ნაკრების კაპიტანი:
"გამარჯვება მარტივი არ იყო. თავიდან რამდენჯერაც ქულა ავიღეთ, იმდენჯერ თავადვე გვიპასუხეს ქულებით. ამდენი ქულის აღება კი იმიტომ მოვახერხეთ, რომ მოედანზე მინიმალური დრო ვიყავით მოდუნებულები. თავად მეტოქე არ გვაძლევდა მოდუნების საშუალებას, რადგანაც, რამდენჯერაც პატარა დრო იხელთეს, ან ლელო გაგვიტანეს ან საჯარიმო, რაც კიდევ უფრო გვაფხიზლებდა და საბოლოო ჯამში ასეთი ანგარიში დაფიქსირდა...

როდესაც ლონდონში ჩავალთ, პირველ რიგში ვნახავთ ჩვენ მიერ გაშვებულ ლელოებს და არა გატანილს. ჩვენ მიერ გაკეთებული შეფასებები, განხილვები, ყოვეთვის დაშვებული შეცდომებით იწყება."

კინგსლი ჯონსი, კანადის ნაკრების მთავარი მწვრთნელი:
"ამას გუშინ ვერც კი წარმოვიდგენდი. ის რაც ჩაფიქრებული გვქონდა, მორკინალებით აქტიურად თამაში, არ გამოგვივიდა. რაგბიში მთავარია ძლიერი შერკინება გყავდეს და ბურთის შენარჩუნება მოახერხო. როდესაც ბურთი შევინარჩუნეთ, ძალიან კარგი ლელოები გავიტანეთ, მაგრამ, სამწუხაროდ, ბურთი ხშირად არ გვქონდა. შერკინებაში მოვიკოჭლებდით და დერეფანშიც ვერ ვივარგეთ...

ბევრი შეცდომა დავუშვით, როგორც გუნდური, ასევე ინდივიდუალური და ეს ყველაფერი გამოსასწორებელი გვაქვს. შერკინებაში აშკარად დავიჩაგრეთ, თუმცა დადებითი კუთხით იმის თქმა შემიძლია, რომ სწრაფი თამაში გამოგვდიოდა. კიდევ ერთხელ ვიტყვი, რომ როდესაც ბურთი გვქონდა, მაღალი ტემპის ხარჯზე მეტოქეს პრობლემებს ვუქმნიდით და დამეთანხმებით, რომ მშვენიერი ლელოები დავდეთ, რაც სამომავლოდ ოპტიმიზმის საფუძველს გვაძლევს."

ფილ მაკი, კანადის ნაკრების კაპიტანი:
"პრაქტიკულად, საკუთარ თავს ვუღალატეთ. დავბრუნდებით გასახდელში, ერთმანეთს შევხედავთ, ვისაუბრებთ და გავიაზრებთ, რა და როგორ გავაკეთეთ. მინდა ხაზგასმით მადლობა გადავუხადო საქართველოს ნაკრებს, რომელიც მთელი ძალით გვეთამაშებოდა."

მატჩის სტენოგრამა

მე-2 წუთი: დაინიშნა პირველი დერეფანი საქართველოს ნაკრების სასარგებლოდ.
მე-3 წუთი: ლაშა ხმალაძემ ფეხით გადაკიდა მეტოქის ლელოსკენ, ბურთი გარემარბმა მირიან მოდებაძემ დაიჭირა და იქვე მიმყოლ სოსო მათიაშვილს გაატანა, რომელსაც ლელოს გატანა არ გასჭირვებია. გარდასახვა თვითონვე გამოიყენა - 7:0.
მე-8 წუთი: საქართველოს ნაკრები დაჯარიმდა და კანადელმა ბროქ სთოლერმა საჯარიმოდან ანგარიში შეამცირა - 3:7.
მე-10 წუთი: "ბორჯღალოსნების" სასარგებლოდ პირველი ჯარიმა დაინიშნა. მათიაშვილის დარტყმა ზუსტი გამოდგა - 10:3.
მე-15 წუთი: კანადელები ისევ დაჯარიმდნენ რაკში თამაშისას. მათიაშვილმა ისევ ზუსტად დაარტყა საჯარიმოდან - 13:3.
23-ე წუთი: "ბორჯალოსნების" მიძალება სტუმრებმა ისევ წესების დარღვევით შეაჩერეს და საჯარიმოდან ისევ მათიაშვილმა დაარტყა - 16:3.
30-ე წუთი: მათიაშვილმა მორიგი საჯარიმო დაარტყა, მაგრამ კარს ააცილა.
34-ე წუთი: საქართველოს ნაკრები შერკინებაში დაჯარიმდა. კანადელებმა საჯარიმო სწრაფად გაათამაშეს და მარცხენა ფრთაზე გარემარბმა ტეილორ პერისმა ლელო გაიტანა. სთოლერმა გარდასახვა ვერ გამოიყენა - 8:16.
მე-40 წუთი: "ბორჯღალოსნებმა" მეტოქის ლელოდან რვა მეტრში საკუთარი დერეფანი მოიგეს. მოლი შეკრეს, მძლავრი ბიძგებით მეტოქეს უკან დაახევინეს და ლელო მეორეხაზელმა გიორგი ნემსაძემ მიითვალა. მათიაშვილმა გარდასახა - 23:8.
45-ე წუთი: მათიაშვილის მორიგი საჯარიმო დარტყმა და საქართველოს ნაკრები ანგარიშში კიდევ უფრო დაწინაურდა - 26:8.
52-ე წუთი: "ბორჯღალოსნებმა" დერეფნიდან ისევ მოლით შეუტიეს. მეტოქის ლელოდან ორ მეტრში თამაში რაკში გადავიდა. ყველასთვის მოულოდნელად, რაკიდან ბურთი პირველხაზელმა ლევან ჩილაჩავამ აიტაცა და ლელოში გადადო. მათიაშვილს გარდასახვა არ გასჭირვებია - 33:8.
56-ე წუთი: ქართველი მორაგბეები მოედნის საკუთარ ნახევარზე დაჯარიმდნენ. კანადელებმა საჯარიმო კვლავ სწრაფად გაათამაშეს და ლელო შუამარბმა დი თი ეიჩ ფან დერ მერვემ მიითვალა. სთოლერმა გარდასახა - 15:33.
58-ე წუთი: კანადელებმა საკუთარი 22-მეტრიანი ზონიდან ბურთის ფეხით გამოტანა სცადეს. მერაბ შარიქაძემ შესანიშნავად დააფარა, ბურთი ლელოსკენ გადაგორდა, თვითონვე მიჰყვა და დაამიწა. მათიაშვილმა ესეც გარდასახა - 40:15.
61-ე წუთი: კანადელებმა მარჯვენა ფრთაზე რიცხობრივი უპირატესობა გამოიყენეს. ბურთი ხელდახელ გაათამაშეს და ლელო ბროქ სთოლერმა გაიტანა. თვითონვე გარდასახა - 22:40.
68-ე წუთი: სოსო მათიაშვილმა ფანტასტიკური ლელო გაიტანა. მოედნის ცენტრში კანადელებმა ბურთი დაკარგეს. მას მათიაშვილი დაეუფლა. ფეხით მეტოქის ლელოსკენ გადაკიდა. მიჰყვა და ბოლო მომენტში ნახტომით დაამიწა. გარდასახვა მანვე თითქმის კიდეს ხაზიდან გაიტანა - 47:22.
79-ე წუთი: "ბორჯღალოსნებმა" მეტოქის ლელოდან ხუთ მეტრში დანიშნული შერკინებიდან შეუტიეს. თამაში რაკში გადავიდა. ბურთი პირველხაზელმა კარლენ ასიეშვილმა აიტაცა და, ჩვეულ სტილში, ლელოში შეიტანა. მათიაშვილმა ესეც გარდასახა - 54:22.


ნოემბრის ტესტები
გერმანია-ბრაზილია 45:12
იტალია-ფიჯი 19:10
შოტლანდია-სამოა 44:38
ინგლისი-არგენტინა 21:8
უელსი-ავსტრალია 21:29
ირლანდია-სამ. აფრიკა 38:3
საფრანგეთი-ახ. ზელანდია 18:38
ბარბაროსები-ტონგა 27:24.

ყოველდღიური სპორტული გაზეთი "ლელო"
2212
მკითხველის კომენტარები / 0 /
მსგავსი ამბები
რუბრიკის სხვა სიახლეები
;