საქართველო-კვიპროსი 1:0 - მარცხიანი სერია გადავაგორეთ [VIDEO]

მსოფლიოს ჩემპიონატის შესარჩევ ეტაპზე გრძელი მოუგებელი სერიის შემდეგ გამარჯვების სიხარული ისევ ამხანაგური მატჩის მოგებით ვიგრძენით. ამასთან, გორი ჩვენი ეროვნული გუნდისთვის იღბლიანი ქალაქი გამოდგა. ეროვნულმა ნაკრებმა ამ ქალაქში პირველად იასპარეზა და კიდევ ერთხელ მისცა სტიმული რეგიონში ფეხბურთის განვითარებას. ამ სტადიონზე წლეულს ჩატარებული 19-წლამდელთა ევროპის ჩემპიონატის შემდეგ ეროვნული ნაკრების თუნდაც ამხანაგური მატჩის გამართვა მორიგი გზავნილია გორელებისთვის, რომ საორგანიზაციო თვალსაზრისით მათი სწორი მუშაობა ამ გზითაც ფასდება...

ცოტა არასასიამოვნო იყო თენგიზ ბურჯანაძის სტადიონის ბოლომდე ვერშევსებული ტრიბუნების ნახვა, მაგრამ მოდი, ამის გამო ნუ ვიქნებით ძალიან კრიტიკულები. ბოლო წლებში ეროვნული ნაკრების ქრონიკული წარუმატებლობის შემდეგ გულშემატკივარი ვერც დედაქალაქში ავსებს სტადიონს.

მოკლედ, კარგი იქნება, თუ რეგიონებში მცხოვრები ფეხბურთის ქომაგები არც მომავალში იქნებიან მათ ქალაქებში ეროვნული ნაკრების ხილვის ნატრულნი.

მატჩის შემდეგ ვლადიმირ ვაისმა თქვა - კვიპროსი ჩვენნაირი გუნდია და ასეთ მეტოქესთან მოგება უნდა ვისწავლოთო. ჩვენი მხრივ დავძენთ, რომ კარგი იქნება, თუ ამხანაგურ მატჩებში ასეთ გუნდებთან წარმატება საკვალიფიკაციო ეტაპის გადალახვის ჯერაც აუხდენელ ოცნებას რეალობად აქცევს, თორემ ამხანაგურ შეხვედრაში არცთუ დიდი ხნის წინ თვით ესპანეთიც გვყავს დამარცხებული მისსავე მოედანზე, ოღონდ, მსოფლიოს ჩემპიონატის შესარჩევში რა შედეგიც მოვაყოლეთ ამას, ყველამ კარგად ვიცით.

მატჩი
საქართველოს ნაკრების სლოვაკმა დამრიგებელმა კვიპროსთან პაექრობაში უპირატესობა 4-2-3-1 ტაქტიკურ სქემას მიანიჭა. დაცვის ცენტრში გურამ კაშია და დავით ხოჭოლავა იდგნენ, ფლანგებიდან ოთარ კაკაბაძე (მარჯვნიდან) და გიორგი ნავალოვსკი (მარცხნიდან) ირჯებოდნენ,ნახევარდაცვის ცენტრში ჯაბა კანკავასა და ნიკა კვეკვესკირის დუეტი თამაშობდა, "ვინგერებად" კი გიორგი პაპუნაშვილი (მარჯვნივ) და გიორგი მერებაშვილი (მარცხნივ). ცენტრალური თავდამსხმელის პოზიციაზე ვაისს გიორგი ქვილითაია ჰყავდა გამწესებული, ხოლო მის უკან სივრცე ვაკო ყაზაიშვილის ძირითადი სამოქმედო არეალი იყო.

საქართველო
1
კვიპროსი
0
10.11. გორი. თენგიზ ბურჯანაძე
გოლი: 1:0 ქვილითაია (24. კანკავას პასით)
საქართველო (4-2-3-1): ლორია - კაკაბაძე, კაშია, ხოჭოლავა, ნავალოვსკი (82. გრიგალავა) - კვეკვესკირი (82. აბურჯანია), კანკავა - პაპუნაშვილი (74. გვილია), ყაზაიშვილი (67. ს. ლობჟანიძე), მერებაშვილი (82. სიხარულიძე) - ქვილითაია (82. კაჭარავა).
სათადარიგოები: მაკარიძე, კვასხვაძე, შერგელაშვილი, გეგეჭკორი, ჯიღაური, დვალი
მწვრთნელი: ვლადიმირ ვაისი
კვიპროსი (4-5-1): გიორგალიდისი - დემეტრიუ, მერკისი, ლაიფისი, მარგასა (82. ვასიულიუ) - ეფრემი (65. კასტანოსი), კირიაკუ (73. ავრაამი), კრისტოფი (73. მიტიდისი), ლაბანი (65. ფილაკტუ), არტიმადასი (82. ეკონომიდესი) - სოტირიუ.
სათადარიგოები: გოასი, მიხაელი, დოსა, კატელარისი, ანტონიადისი, პაპაფოტისი, სტილიანუ, რუშიასი.
მწვრთნელი: რან ბენ შიმონი
გაფრთხილება: ლაბანი (25), კაკაბაძე (26), მერკისი (26), სოტირიუ (76)
არბიტრი: სურენ ბალიანი (სომხეთი)

ჩვენი ეროვნული გუნდის "პირველ ნომრად" თამაშის ხილვის ბედნიერება ხშირად არ გვეძლევა და კვიპროსთან ესეც ვნახეთ. ქართველმა ფეხბურთელებმა პირველივე წუთებიდან შეუტიეს, თუმცა მოწინააღმდეგის კართან შექმნილი დასამახსოვრებელი მომენტების სიხშირე იმაზე გაცილებით ცოტა იყო, "ჯვაროსანთა" ქომაგი რომ ისურვებდა.

ისე კი პირველად, მეტოქე გუნდის გოლკიპერი პირველივე კუთხურისას დავით ხოჭოლავას მიერ ქუსლით ეფექტური დარტყმისას შეშფოთდა, თუმცა "შახტარის" მცველს მე-4 წუთზე მიზანმა უმტყუნა.

ვერ ვიტყვით, თითქოს კუთხურებს ან საჯარიმო დარტყმებს სახარბიელოდ ასრულებდნენ ჩვენი ფეხბურთელები. ვფიქრობთ, ამ კომპონენტში მეტი ფანტაზია და სწორი გადაწყვეტილებები არ გვაწყენდა.

კვიპროსელებს მოედნის ცენტრის დათმობამ თავიდანვე მოუწიათ. აქ ორივე გუნდიდან გამორჩეული ჯაბა კანკავა იყო. თვეების მანძილზე უგუნდოდ მყოფი კაპიტანი ამ თვალსაზრისით ისევ სასიამოვნოდ აკვირვებს როგორც გუნდის თავკაცს, ისე გულშემატკივარს. მწირი სათამაშო პრაქტიკის მიუხედავად, კანკავას კლასს ზიანი არ მისდგომია და ის ამჯერადაც ნაყოფიერი იყო ნაკრებისთვის. ცალკეული ეპიზოდების სამაგალითოდ მოყვანას რომ არ მოვყვეთ, მხოლოდ გამარჯვების გოლის მომენტის გახსენებაც კმარა.

24-ე წუთზე საქართველოს ნაკრების კაპიტანმა მეტოქის მეკარის შეცდომით ისარგებლა - გიორგალიდისმა ბურთის ამოტანისას ცუდად უპასა თანაგუნდელს, რომელსაც უკნიდან კანკავა დარაჯობდა. ჯაბამ დაასწრო მეტოქეს და კარგ პოზიციაში მყოფ ქვილითაიას დაუგორა, ამან კი მეკარისგან მარცხენა დაბალ კუთხეს დაუმიზნა და ზუსტადაც მოარტყა - 1:0.

შეტევაზე ორიენტირებულ ჩვენს გუნდს იერიშებისას ფლანგებიდან მცველებიც აქტიურად ეხმარებოდნენ. იქიდან საჯარიმოში ბურთის ჩაკიდების გზით ცდილობდნენ ხეირის ნახვას, მაგრამ არც სტუმართა მცველები იყვნენ ჯაბანნი. შეტევაში თუ არა, ისინი საკუთარი კარის უსაფრთხოებისას მაინც არ ირჯებოდნენ ცუდად. შედეგიანი იყო ქვილითაიას გასანეიტრალებლად რან ბენ შიმონის გუნდის ცენტრალური მცველების მოქმედებაც.

გაშვებული გოლიდან შესვენებამდე კვიპროსმა უფრო მეტი ხანი დაჰყო მოწინააღმდეგის ნახევარზე, ვიდრე ანგარიშის გახსნამდე ახერხებდა, ოღონდ, ეს სათამაშო დეტალი მათ არც საგოლედ წაადგათ და არც რეალური სახიფათო მომენტის შესაქმნელად.

მეორე ტაიმში ძლიერმა წვიმამ დაასველა მოედანი და მაყურებელი. მატჩის სცენარი კი არც შესვენების შემდეგ შეცვლილა - ვაისის გუნდი გარკვეულ სათამაშო უპირატესობას ფლობდა, მაგრამ სანახაობის თვალსაზრისით არც შეხვედრის მეორე ნახევარი გამოდგა თვალისმომჭრელი.

თუმცა პირველად ვიხილეთ სტუმართა მიერ შექმნილი რეალური სახიფათო მომენტი. 66-ე წუთზე შეტევაში ჩართული რენატო მარგასა მარცხენა ფლანგიდან შეიჭრა საჯარიმოში, სადაც გრძელი დიაგონალური პასი მიიღო და კარგადაც დაარტყა კარისკენ, მაგრამ უფრო უკეთ ქართველთა კარის დარაჯი გაისარჯა - გიორგი ლორიას ამ ეპიზოდში, ფაქტობრივად, პირველად მოუწია მწვავე ეპიზოდის განმუხტვა და სასწაული რეაქციის ხარჯზე ჩინებულადაც გაართვა თავი საქმეს.

ვაისმა სათადარიგო ფეხბურთელებსაც მისცა თამაშის საშუალება - საბა ლობჟანიძე, ნიკა კაჭარავა და ირაკლი სიხარულიძე აქტიურად ცდილობნენ თამაშის გამწვავებას, თუმცა მათ მცდელობას შედეგი არ მოჰყოლია. არადა, გიორგალიდისის კართან იყო ისეთი მომენტები, როცა ქართველ ფეხბურთელებს იერიშის თუ კონტრშეტევის ბოლო ფაზაში სწორი გადაწყვეტილების მიღების შემთხვევაში შეეძლოთ, მეორე გოლითაც გავეხარებინეთ. პასის დაგვიანება, არაზუსტი გადაცემა და ზოგჯერაც ამ თვალსაზრისით სიძუნწე ხომ ყველაზე ნათლად სწორედ კომბინაციის დაგვირგვინებისას ჩანს...

ასე იყო თუ ისე, მოვიგეთ და გამარჯვების გემო ფეხბურთელებმა და გულშემატკივრებმა ერთად გავიხსენეთ. ამ მატჩში გამოჩნდა ხარვეზებიც და იმედიც, რომელზე დაყრდნობითაც ვაისმა სასურველი შედეგის მიღწევა უნდა სცადოს.

მატჩის შემდეგ

რან ბენ შიმონი (კვიპროსის ნაკრების მწვრთნელი):
- ძალიან კარგი მატჩი იყო. დღეს ჩვენ ვნახეთ საქართველოს ნაკრების სიძლიერიე. გამოჩნდა, რომ იმ ჯგუფში, სადაც შემდეგ შესარჩევში ერთად ვიქნებით, საქართველო ერთ-ერთი ძლიერი მეტოქეა. დღეს კვიპროსის ნაკრები კარგად გამოიყურებოდა საქართველოს ძლიერი გუნდის წინააღმდეგ. ეს თამაში ჩვენ კარგად წაგვადგა. გამოჩნდა, რომ კარგი სპარინგპარტნიორი შევარჩიეთ.

- რომელი ტაიმი იყო უკეთესი?
- არ გამოვყოფ რომელიმე ტაიმს. თუმცა ჩემს გუნდზე ვიტყვით, რომ იგრძნობოდა ის მებრძოლი სული, რომელიც ყველა თამაშში უნდა ჩანდეს და რომელიც გვახასიათებს. აქვე უნდა აღვნიშნო ისიც, რომ საქართველოს ნაკრებს დაეტყო ვაისის ხელი. ეს ნათლად ჩანს.

- საქართველოს ნაკრების ფეხბურთელებიდან რომელს გამოარჩევდით?
- ძალიან დიდი ხნის განმავლობაში ვადევნებ თვალს საქართველოს ნაკრების თამაშს და აღვნიშნავ, რომ ის ტექნიკურად საკმაოდ დახვეწილია და საკმაოდ მაღალი დონით გამოირჩევა. დანარჩენს, ალბათ, თავად ვლადიმირ ვაისი გეტყვით.

ვლადიმირ ვაისი (საქართველოს ნაკრების მწვრთნელი):
- რასაკვირველია, გახარებული ვარ გამარჯვებით, რადგან აქამდე საკმაოდ გრძელი მოუგებელი სერია გვქონდა და კარგია, რომ ის დასრულდა. ისეთ გუნდებთან თამაში, როგორიც კვიპროსია, ჩვენ ერთ წელიწადში გველოდება. შესაბამისად, ვალდებულები ვართ, ვიყუროთ ერთი წლის იქითაც და ამის მიხედვით განვსაზღვროთ გეგმები. მომავალი საკვალიფიკაციო ეტაპი არ იქნება იოლი. აქედანვე გვმართებს დავიწყოთ შრომა ხარვეზების გამოსასწორებლად, რათა სასურველი შედეგი მივიღოთ.

- თამაშის ხარისხით რამდენად კმაყოფილი ხართ?
- ჩვენთვის დიდი პრობლემა უფრო შეტევაში თამაშია, ვიდრე დაცვაში. დღეს ქვილითაიამ კი გაიტანა გოლი, მაგრამ მე მისგან უფრო მეტს ველი. ყაზაიშვილიც ცდილობდა, მაგრამ მისგანაც უფრო მეტი უნდა მოვითხოვოთ, ისევე, როგორც ფლანგებზე მოთამაშე მერებაშვილისა და პაპუნაშვილისგან. მათ უფრო აგრესიულად უნდა ითამაშონ შეტევაში, უნდა გაამწვავონ იერიშები... ამიტომ, ბევრი უნდა ვეცადოთ და გავაძლიეროთ შეტევაში თამაში. კვიპროსის ნაკრებში მინდა გამოვარჩიო 9 (კრისტოფი) და 10 (სოტირიუ) ნომრები. ისინი კარგი ფეხბურთელები არიან.

- მომავალ შესარჩევ ციკლშიც თქვენ იქნებით საქართველოს ნაკრების მთავარი მწვრთნელი. რა იქნება თქვენი მიზანი?
- რასაკვირველია, ჩვენ ვიბრძოლებთ, ვითამაშებთ და შევეცდებით, საკვალიფიკაციო ეტაპი წარმატებით გადავლახოთ. უნდა ვისწავლოთ ჩვენი მსგავსი გუნდების დამარცხება. მათ აუცილებლად უნდა მოვუგოთ. დიდია ევროპის ჩემპიონატზე გასვლის შანსი და ის ხელიდან არ უნდა გავუშვათ.

- შეტევაზე თქვით, მაგრამ დაცვის ხაზზე არაფერი გითქვამთ. აქვე, გვაინტერესებს, აღნიშნოთ - გურამ კაშია რამდენად საჭირო ფეხბურთელია?

- ყველამ ნახა, როგორ სჭირდება ამ გუნდს ლორია, კანკავა და კაშია. ისინი გუნდის სული და გული არიან. რაც შეეხება კაშიას, მან ჩინებულად ითამაშა, საუკეთესო იყო დღეს მოედანზე. "მშრალად" რომ შევინახეთ კარი, ეს ლორიას და კაშიას დამსახურებაცაა. საოცრებაა კანკავა, რომელსაც ნახევარი წელია კლუბში თამაშის პრაქტიკა არ ჰქონია, მაგრამ მაინც საუკეთესოა თავის ამპლუაში. ასევე მნიშვნელოვანი ფეხბურთელები არიან გუნდისთვის ხოჭოლავა და ნავალოვსკი...

ბოლოს, მინდა მადლობა გადავუხადო გორს, კარგი პირობების და შესანიშნავი დახვედრისთვის. აღფრთოვანებული ვარ სტადიონით, მოედნით... მადლობა გულშემატკივრებს, გორელებს და მადლობა ორგანიზატორებს!

ყოველდღიური სპორტული გაზეთი "ლელო"
2138
მკითხველის კომენტარები / 0 /
მსგავსი ამბები
რუბრიკის სხვა სიახლეები
;