[ექსკლუზივი იაპონიიდან] მილტონ ჰეიგი: ზოგჯერ გოლიათს დავითიც ამარცხებს

დღეს საქართველოს ნაკრები მსოფლიოს რაგბის უდიდეს ფორუმში ჩაებმება. ცხადია, რაგბის ქომაგებისთვის საინტერესო იქნება ზედ მსოფლიოს თასის დაწყების წინ საქართველოს ნაკრების ახალზელანდიელი მთავარი მწვრთნელის, მილტონ ჰეიგის მოსაზრება გუნდის მზადყოფნის შესახებ:

ბორჯღალოსნები დიდი ბრძოლის წინ. საქართველო თუ უელსი? ვინ მოიგებს?

- მსოფლიოს თასზე უკვე შვიდი მატჩი ჩატარდა, მაგრამ სენსაცია არ ჩანს. უელსთან მატჩი დღეს ერთადერთია. ამბობენ, ასე სპეციალურად გააკეთეს. სენსაციას ამ მატჩში ელოდებიან...

- ცხადია, ხუმრობთ. თუმცა, იმედი მაქვს, რომ ასეც მოხდება. მთავარია, ჩვენ ყველაფერი ზუსტად შევასრულოთ. უელსი არ არის მარტივი გუნდი, მაგრამ ხდება ხოლმე, როცა დავითი ამარცხებს გოლიათს.

- მოკლედ შევაფასოთ ნაკრების მზადების პროცესი. შოტლანდიასთან ტესტებზე ორმა მარცხმა, ცოტა არ იყოს, ცუდი ფონი შექმნა, ქომაგებში პესიმიზმმა იმატა...

- მზადების პროცესით კმაყოფილი ვარ. ახლა გუნდი გაცილებით კარგ ფიზიკურ ფორმშია ვიდრე 2015 წლის მსოფლიოს თასზე. მორაგბეების მონაცემები 25 პროცენტითაა გაზრდილი. შოტლანდიასთან ორი თამაში ჩვენთვის ძალიან სასარგებლო იყო. პირველ მატჩში ბიჭები ცოტა დაბნეულები იყვნენ. მეორეში პირველ 20 წუთში ორი ლელო გავუშვით. მერე დავლაგდით და ცუდად არ გვითამაშია. შოტლანდია პირველი დონის გუნდია. მათთთან თამაშმა ბევრი რამ დაგვანახვა და გაგვაძლიერა.

- ავსტრალიისა და ფიჯის ნაკრებმა უკვე ითამაშეს. ეს თამაში, ალბათ, უკვე გაანალიზებული გაქვთ. რა გამოჩნდა ფიჯელთა თამაშში ისეთი, რომელსაც ჩვენს სასარგებლოდ გამოვიყენებთ?

- ავსტრალიამ ფიჯის ბურთი არ მისცა და თითქმის ყველა შანსი გამოიყენა. მეტოქე მოლებითაც დაჩაგრა და ხლედხელ თამაშშიც. ზოგადად თუ არ გყავს კარგი შერკინება და მოლი მსოფლიოს თასზე ძალიან გაგვიჭირდება. ჩვენ გვყავს და ეს უნდა გამოვიყენოთ.
ზოგადად, ფიჯისთან ყველა ჯერზე მაშინ მოვიგეთ, როცა დაცვაში კარგად გავისარჯეთ - ფიჯი გვიტევდა, ჩვენს თავს ვიცავდით. ახლაც, მსგავს სტილში უნდა ვითამაშოთ. თუმცა იქამდე კი, ჯერ ორი მატჩი გვაქვს სათამაშო. მსოფლიოს თასზე სუსტი გუნდები არ არიან. ამიტომ, ურუგვაისაც ისევე სერიოზულად უნდა მივუდგეთ, როგორც სხვებს.

- საინტერესოა სათადარიგოთა შორის რატომ დაასახელეთ ექვსი მორკინალი?

- ჩვენ თუ გვინდა უელსს შევებრძოლოთ მათი შერკინების ტოლ-სწორი შერკინება უნდა გვყავდეს. შეცვლაზე ბექა საღინაძე და ოთარ გიორგაძე გახლავთ. ისინი სწორედ ის მორაგბეები არიან, რომლებიც შეგიძლია სწორ დროს დაამატო გუნდს.

- უკანა ხაზი უელსთან მატჩში შეტევზე ორიენტირებულია, რაც ჩვენი ნაკრების შემთხვევაში ხშირად არ ხდება. რატომ გადაწყვიტეთ ასე?

- უელსთან მოგება თუ გინდა, უნდა შეუტიო და ლელო გაუტანო. დაცვაზე ორიენტირებული უკანა ხაზი ამას ვერ გააკეთებს. სოსო მათიაშვილს, გიორგი კვესელაძეს და მირიან მოდებაძეს დიდი ხანია ვამზადებთ და უელსთან მატჩი მათთვის კიდევ ერთი შანსია საკუთარი შესაძლებლობები წარმოაჩინონ.

- ვიცით, რომ ახალი ზელანდიის ნაკრების ქომაგი ხართ. როგორ ფიქრობთ, "ოლ ბლექის" გარდა ვის აქვს მსოფლიოს თასის მოგების შანსი?

- ვფიქრობ, სამხრეთ აფრიკასა და ინგლისს. მაინც ამ უკანასკნელს გამოვყოფდი. ინგლისელებს ძალიან კარგი მწვრთნელი ყავთ. მას არასდროს ქონია წარუმატებლი მსოფლიოს თასი.

871
მკითხველის კომენტარები / 0 /
მსგავსი ამბები
რუბრიკის სხვა სიახლეები
;