საქართველო - უელსი 2:2 - ლოგიკური ფრე

საქართველო-უელსი 2:2
03.07. თბილისი. მიხეილ მესხი
1:0 მიქელთაძე (12), 1:1 მორელი (31-პენ), 1:2 მ. ჰარისი (35), 2:2 მიქელთაძე (85-პენ)

საქართველო (3-2-3-2): ჩოჩიშვილი - მარგველაშვილი, გიორგაძე, კობოური - ცეცხლაძე, მაჭარაშვილი - ჩაბრაძე, კოხრეიძე, ლაკვეხელიანი - არველაძე, მიქელთაძე; შეცვლაზე შევიდნენ: ალთუნაშვილი, ჭიჭინაძე, შულაია, ძებნიაური, გოშთელიანი, ბუღრიძე.

მწვრთნელი: გია ცეცაძე

უელსი (4-4-2): ევანსი - კოქსი, ნორინგტონი, ფული, როდონი - კ. ჰარისი, მორელი, მ. ჰარისი, ჯეიმსი - ბაბოსი, დევისი; შეცვლაზე შევიდნენ: ლუისი, პული, მატონდო, ბროდჰედი, კულენი, ბარტონი.

მწვრთნელი: რობ პეიჯი

გაძევება: კ. ჰარისი (86)
არბიტრი: გ. ყრუაშვილი

საქართველოს ახალგაზრდული ნაკრები ექსპერიმენტული შემადგენლობით დაუპირისპირდა უელსს და ფრედ ითამაშა. გია ცეცაძის მიერ გაწვრთნილმა გუნდმა ბევრი შეცდომა დაუშვა და ეს შეხვედრის საბოლოო შედეგშიც აისახა...

...არადა, ახალგაზრდა ქართველებმა თამაში შესანიშნავად დაიწყეს - ბურთს აკონტროლებდნენ და სწრაფი გოლიც გაიტანეს. გიორგი კოხრეიძემ კარგად იბრძოლა, ბურთი ბექა მიქელთაძეს მოუვიდა და მანაც უძლიერესი დარტყმით აიღო უელსის ნაკრების კარი. ეს მე-12 წუთზე მოხდა.

მიქელთაძემ ერთხელაც გვანახა, რომ კარგი დარტყმა აქვს. ბრიტანელმა მცველებმა ის წამით დატოვეს უყურადღებოდ და "რუსთავის" შემტევმაც ისეთი გოლი შეაგდო, თქვენი მოწონებული!

იქვე აშკარად გადავრჩით. უელსელთა შეტევის შემდეგ თავის გამოჩენის შანსი მარკ ჰარისს ჰქონდა, თუმცა სტუმარმა ფეხბურთელმა როგორღაც "მოახერხა" და ორიოდე მეტრიდან ცარიელ კარში ზუსტად ვერ გადაგზავნა ბურთი.

საქართველოს ნაკრები მეტოქეზე უკეთ კომბინირებდა. კოხრეიძემ ერთ-ერთი შეტევა კარში დარტყმით დაასრულა, თუმცა უელსელთა კიპერს ვერ აჯობა. ეს იყო და მეტოქემ გაათანაბრა - სტუმართა კონტრშეტევის შემდეგ ბურთი ხელზე მოხვდა ანდრო გიორგაძეს. ტრიბუნიდან ისე ჩანდა, თითქოს, ეს საჯარიმო მოედნის ფარგლებს გარეთ მოხვდა. არბიტრმა გიორგი ყრუაშვილმა კი 11-მეტრიანი დანიშნა გიორგი ჩოჩიშვილის კარში, რომელიც მორელმა ზუსტად შეასრულა.

საქართველოს ნაკრები ამ გოლმა არ დააბნია. მიქელთაძემ ერთხელაც დაარტყა და ბურთი ხარიხას შეაწყვიტა. იქვე, ბრიტანელებმა მეორეც გაგვიტანეს. გია ცეცაძის შეგირდები ხელოვნური თამაშგარე მდგომარეობის შექმნას ცდილობდნენ, მაგრამ შეცდნენ და ჰარისმა დაგვსაჯა.

ტაიმის ბოლოს საქართველოს ნაკრებს კარგი მომენტი ჰქონდა. თამაზ ცეცხლაძემ უძლიერესი დარტყმით სცადა გატანა, თუმცა ოდნავ სიზუსტე დააკლდა. არადა, რეალური შესაძლებლობა იყო გოლის გასატანად.

მეორე ტაიმის სტარტზე ისევ გადავრჩით. სტუმართა სწრაფი კონტრშეტევის შემდეგ, რაც მათი მთავარი იარაღი იყო, იმავე ჰარისს მიეცა კარგი შანსი. უელსელთა შორის ერთ-ერთმა საუკეთესომ შორეულ კუთხეს კი დაუმიზნა, მაგრამ ოდნავ ააცილა.

მეორე ტაიმში საქართველოს ნაკრებმა შედარებით უკეთ ითამაშა. ძალიანაც ნუ გავკიცხავთ ჩვენს გუნდს - ცეცაძემ რამდენიმე ახალი ტაქტიკური სქემა გამოიყენა და ცხადია, ამ ყველაფრის დახვეწა დროს მოითხოვს.

დარჩენილ დროში მომენტები მასპინძლებსაც ჰქონდათ და სტუმრებსაც. საუკეთესო შანსი შეექმნა ვატო არველაძეს, თუმცა დარტყმა დააგვიანა. უელსელებმა კი ერთ-ერთი შეტევისას ცარიელ კარში ვერ შეაგდეს.

საქართველოს ნაკრებმა მაშინ გაათანაბრა, თამაშის დასრულებამდე ბევრი რომ აღარ რჩებოდა. ირაკლი ბუღრიძეს უელსელმა მცველმა კარში არ დაარტყმევინა და ეს წესების დარღვევით გააკეთა. 11-მეტრიანი ქართველთაგან საუკეთესომ, მიქელთაძემ, შეასრულა და ზუსტადაც - 2:2.

მოკლედ, სასარგებლო სპარინგი იყო, სადაც საქართველოს ნაკრების სამწვრთნელო შტაბმა, უეჭველია, ბევრი რამ ჩაინიშნა საკუთარ ბლოკნოტებში.
ფრე, ალბათ, ლოგიკური შედეგი იყო იმ შეხვედრაში, რომლის მოგებაც ორივე გუნდს შეეძლო. ოთხშაბათს უელსთან კიდევ ერთ ამხანაგურ შეხვედრას ჩავატარებთ.

მატჩის შემდეგ

გია ცეცაძე: "მეორე ტაიმში უფრო დალაგებულად ვითამაშეთ, ვიდრე პირველში. კარგ გუნდს ვეთამაშეთ და ამისთვის მადლობა საქართველოს ფეხბურთის ფედერაციას.

შეცდომები იყო, თუმცა, ჩემი აზრით, ეს არის ის კონტინგენტი, რომელსაც შეუძლია, საქართველოს სიხარული მოუტანოს. ვარჯიშებზე ყველა ბოლომდე ასრულებს დავალებას... რაც შეეხება გიორგი არაბიძეს, ის ჩვენი გუნდის მუდმივი წევრია. არ გამოვიძახეთ ორმხრივი შეთანხმების საფუძველზე. კარგ გუნდში გადადის და ეს სასიხარულოა. ჩვენთან ერთად იყო შეკრებაზე, უბრალოდ, მიდის, რათა თავისი საქმე მოაგვაროს".

808
მკითხველის კომენტარები / 0 /
მსგავსი ამბები
რუბრიკის სხვა სიახლეები
;