საქართველო-ყაზახეთი. როგორი შემადგენლობით ვითამაშებთ დღეს? [VIDEO]

დღეს საქართველოს ნაკრები ერთა ლიგის ბოლო მატჩს ჩაატარებს. მეტოქე ყაზახეთია, რომელსაც მიმდინარე ტურნირის სასტარტო შეხვედრაში "ასტანა არენაზე" 2:0 მოვუგეთ. თუმცა ეს აპრიორი არ ნიშნავს, რომ ვლადიმირ ვაისის გუნდს თბილისშიც გარანტირებული გვაქვს გამარჯვება - არავითარ შემთხვევაში!

ჯერ ერთი, ანდორასთან მატჩმა ალბათ დაგვაბრუნა მიწაზე, ეიფორია დასრულდა და შეგვახსენა მარტივი ჭეშმარიტება - დღევანდელ ფეხბურთში თამაშს "ცალი ფეხით" ვერ მოიგებ და რომ ძალიან ბევრი ნაკრები საფეხბურთო ფსკერს თავს აღწევს.

ძალიან კარგია, რომ პროგრესირებად ნაკრებებს შორის საქართველოცაა და თუნდაც ჩვენი დღევანდელი მეტოქე. დიახ, ყაზახეთსაც აქვს პროგრესი, მაგრამ აქვს პრობლემებიც, ისევე, როგორც - ჩვენ. გამარჯვების უეჭველი ფორმულა ალბათ არ არსებობს, მაგრამ არსებობს გამარჯვებისთვის აუცილებელი პირობების მთელი წყება და ერთ-ერთი მათგანია 100-პროცენტიანი კონცენტრაცია.

უნდა შევიგნოთ ერთი რამ - საქმე ბოლომდე მიყვანილი არ არის. ჯგუფის მოგება და C ლიგაში დაწინაურება ძალიან კარგია, მაგრამ არანაკლებ მნიშვნელოვანი მიზანია, ქულების იმ რაოდენობას მოვუყაროთ თავი, რომელიც საშუალებას მოგვცემს ნახევარფინალს თბილისში ვუმასპინძლოთ და თუ რამხელაა უპირატესობაა საშინაო კედლები, თავისი სავსე ტრიბუნებით, ახლა ამის ახსნას არ დავიწყებთ.

დიდი იმედი გვაქვს იმისიც, რომ საქართველოს ნაკრების მწვრთნელს არ მოუწევს ზედმეტი ახსნა-განმარტება ფეხბურთელებისთვის იმაზე, თუ რა მნიშვნელობისაა დღევანდელი მატჩი.

სამწუხაროდ, ამ თამაშსაც პრობლემებით ვხვდებით. ადრე გამოკლებულ ფეხბურთელებს (ლევან მჭედლიძე, ჯანო ანანიძე, თორნიკე ოქრიაშვილი, გიორგი ქვილითაია, გიორგი პაპუნაშვილი) ახლა გიორგი ნავალოვსკი, ოთარ კიტეიშვილი და ბაჩანა არაბულიც დაემატნენ. მადლობა ღმერთს, გიორგი ჩაკვეტაძე მაინც გადაურჩა ტრავმას და ჯაბა კანკავაც, დიდი ალბათობით, ითამაშებს.

ვცადოთ და ვივარაუდოთ, რა შემადგენლობას დააყენებს ვაისი დღევანდელ მატჩში ყველა იმ შეცდომის გათვალისწინებით, რაც ანდორასთან თამაშში ვიხილეთ.

მწვრთნელმა გააკრიტიკა მეკარე გიორგი ლორია გაშვებულის გოლი გამო და მართალიც იყო (აქ არ ვგულისხმობთ საჯარო კრიტიკას. ამაში მართალი იყო თუ არა, ეს სხვა თემაა). დიახ, ლორია შეცდა, მაგრამ ეს არ ნიშნავს, რომ ის ცუდი მეკარეა. პირიქით, ძალიანაც კარგია, მაგრამ ფაქტს ვერ გავექცევით - უთამაშებლობამ მას დაღი დაასვა. ხოლო თუ რას ნიშნავს, მეკარისთვის სათამაშო პრაქტიკის არქონა, ესეც არ უნდა საჭიროებდეს ახსნას.

ამიტომ, აქ რისკის გაწევა არ ღირს. ვაისმა მიანიშნა და ალბათ ასეც იქნება - გადახედავს ლორიას პოზიციას და კარს როინ კვასხვაძეს მიანდობს. "ტორპედოს" მეკარე გაცილებით გამოცდილია სანაკრებოდ, განსხვავებით ლაზარე კუპატაძისგან.

დაცვაში აღდგება გურამ კაშიასა და საბა კვირკველიას ტანდემი. მარჯვნივ დარჩება ოთარ კაკაბაძე, ხოლო მარცხნივ ტრავმირებულ ნავალოვსკის, დიდი ალბათობით, ჯიმი ტაბიძე შეცვლის. ვაისმა თქვა, რომ მისით კმაყოფილია. თუმცა არ დაგვავიწყდეს - გუნდშია ლაშა დვალიც, რომელსაც სისტემატური პრაქტიკა აქვს პოლონურ "პოგონში" და, შესაძლოა, მისი კანდიდატურაც განიხილებოდეს მარცხენა მცველის პოზიციაზე.

იმედია, მატჩისთვის მზად იქნება კაპიტანი კანკავაც, რომელიც ჩვეულ პოზიციას დაიკავებს ნიკა კვეკვესკირთან ერთად საყრდენ წყვილში.

ანდორასთან მატჩის შემდეგ ვაისი უკმაყოფილო იყო შეტევის ხაზის მოქმედებითაც. ალბათ, ცვლილებები აქაც იქნება. მართალია, გუნდში გამოიძახეს გამოცდილი ლადო დვალიშვილი, მაგრამ საეჭვოა, ის ძირითად შემადგენლობაში ვიხილოთ. უფრო მოსალოდნელია, ფორვარდის როლში გამწესდეს ვაკო ყაზაიშვილი, ვიდრე თუნდაც ნიკა კაჭარავა, რომელიც ასევე ვერ არის სასურველ ფორმაში.

გავრისკავთ და ვივარაუდებთ, რომ ვაისი მეტოქეს სიურპრიზს შესთავაზებს და სასტარტოში დააყენებს ლუკა ზარანდიას (უფრო ნაკლები ალბათობით - გიორგი ხარაიშვილს), ცენტრში იქნება ჩაკვეტაძე, ხოლო მარცხნივ გიორგი მერებაშვილი, რომელსაც სლოვაკის ხელში არა ერთხელ უთამაშია სასტარტო შემადგენლობაში.

ასე რომ, ძირითადი შემადგენლობა, სავარაუდოდ ასეთ სახეს მიიღებს: კვასხვაძე - კაკაბაძე, კაშია, კვირკველია, ტაბიძე (ან დვალი) - კანკავა, კვეკვესკირი - ზარანდია, ჩაკვეტაძე, მერებაშვილი - ყაზაიშვილი.

1469
მკითხველის კომენტარები / 0 /
მსგავსი ამბები
რუბრიკის სხვა სიახლეები
;