საქართველო ხუთი დებიუტანტით, რაგბი ევროპის ჩემპიონატზე

საქართველოს ნაკრები რაგბი ევროპის ჩემპიონატის პირველ მატჩს სტუმრად, კლუჟში გამართავს რუმინეთის ეროვნულ გუნდთან.

„ბორჯღალოსნების“ მთავარმა მწვრთნელმა მილტონ ჰეიგმა რაგბი ევროპის ჩემპიონატის საწყისი ორი ტურისთვის გაფართოებულ შემადგენლობაში 29 მორაგბეს უხმო, რომელთაგან ხუთი დებიუტანტია.

რუმინელებთან და მეორე ტურის მატჩში ესპანეთის ნაკრებთან ეროვნულ კვართს, სავარაუდოდ, პირველად მოირგებენ, გოგა ხუროშვილი (არმაზი), დავით გიგაური (ბუქარესტი), გრიგორ ქერდიყოშვილი (ლელო), გიორგი ჯავახია და ბექა საღინაძე (ორივე - ორიაკი). ამასთან ერთად, გამოძახებულთა შორის რამდენიმე ისეთი მოთამაშეცაა, რომლებსაც ერთიდან ოთხ მატჩამდე აქვთ ნათამაშები. ესენია: ზურაბ ძნელაძე (ლოკომოტივი), თედო აბჟანდაძე, მირიან მოდებაძე (ორივე - აია), გურამ გოგიჩაშვილი (რასინგი) და ბექა გიგაშვილი (გრენობლი).

სხვადასხვა მიზეზებით გამოძახებულთა შორის არ არიან: მიხეილ ნარიაშვილი, კონსტანტინე მიქაუტაძე (ორივე - მონპელიე), ზურაბ ჟვანია (ვოსფსი), კარლენ ასიეშვილი (ბრივი), დავით ქუბრიაშვილი (გრენობლი), ანტონ ფეიქრიშვილი (აია), შალვა სუთიაშვილი (ანგულემი), ოთარ გიორგაძე (ბრივი), ვიქტორ კოლელიშვილი (კლერმონი), ბექა ბიწაძე (ნარბონი), ლაშა ლომიძე (დონკასტერი), ლაშა ხმალაძე (ბათუმი), დავით კაჭარავა (ენისეი), თამაზ მჭედლიძე (აჟენი), ანზორ სიჭინავა (ბათუმი) და მერაბ კვირიკაშვილი (ლელო).

„რეალურად, ეს ბოლო ტურნირია მსოფლიო თასის გათამაშების წინ და უმნიშვნელოვანესი შესაძლებლობა, რომ იაპონიაში გამგზავრებამდე გუნდში პოზიციებზე სიღრმეები შევქმნათ. გარდა ამისა, კარგი შესაძლებლობაა მოთამაშეთა სარაგბო უნარების დასახვეწად.

საინტერესოა ახალგაზრდების გამოცდა საერთაშორისო ტურნირზე, მათზე დაკვირვება, როგორც მოედანზე, ასევე მის მიღმა, რაც არანაკლებ მნიშვნელოვანია. ჩვენი აზრით, მათ შეუძლიათ მაღალ დონეზე თამაში და აუცილებლად უნდა ითამაშონ რუმინეთისა და ესპანეთის მსგავსი გუნდების წინააღმდეგ, რათა შეიძინონ გამოცდილება და საკუთარი შესაძლებლობების ირწმუნონ. თუ ისინი ამ ეტაპს წარმატებით გაივლიან, მწვრთნელებს მეტი მოტივაცია გვექნება მსოფლიო თასისთვის მზადებისას საწვრთნელ შეკრებაზე მათ გამოსაძახებლად“. - თქვა საქართველოს ნაკრების მთავარმა მწვრთნელმა მილტონ ჰეიგმა.

ამასობაში რუმინეთის ნაკრების დროებითმა თავკაცმა მარიუს ტინკუმ „სტეჟარის“ გაფართოებული შემადგენლობა დაასახელა, რომელშიც მხოლოდ რუმინეთის ჩემპიონატში მოთამაშეები შეიყვანა. რუმინელები დღეს პორტუგალიაში გაემგზავრებიან საწვრთნელ შეკრებაზე. 30 იანვარს კი პორტუგალიის ეროვნულ გუნდს დაუპირისპირდებიან საწვრთნელ მატჩში. „სტეჟარის“ საქართველოს ნაკრებთან მატჩისთვის რამდენიმე ლეგიონერი დაემატება საფრანგეთიდან და ინგლისიდან.
9 თებერვალს, რუმინეთთან მატჩი კლუჟში, თბილისის დროით 16 საათზე დაიწყება.

საქართველოს ნაკრები

პირველი ხაზი: თორნიკე მატარაძე (ნევერი), გურამ გოგიჩაშვილი (რასინგი), შალვა მამუკაშვილი (ენისეი), გიორგი ჭყოიძე (ლელო), გოგა ხუროშვილი (არმაზი), ლევან ჩილაჩავა (მონპელიე), გიორგი მელიქიძე (სტად ფრანსე), ბექა გიგაშვილი (გრენობლი);
მეორე ხაზი: გიორგი ნემსაძე (ოსფრიზი), ნოდარ ჭეიშვილი (კორნიშ პირატსი), დავით გიგაური (ბუქარესტი), გრიგორ ქერდიყოშვილი (ლელო);
მესამე ხაზი: გიორგი თხილაიშვილი (ბათუმი), ბექა გორგაძე (ბორდო), გიორგი ცუცქირიძე, გიორგი ჯავახია, ბექა საღინაძე (სამივე - ორიაკი);

№9: ვასილ ლობჟანიძე (ბრივი), გელა აფრასიძე (მონპელიე), გიორგი ბეგაძე (ლოკომოტივი);
№10: თედო აბჟანდაძე (აია), ლაშა მალაღურაძე (ვვა);
№12-13: მერაბ შარიქაძე (ორიაკი), გიორგი კვესელაძე (არმაზი), გიორგი კოშაძე (ხარები);
№11-14: ზურაბ ძნელაძე, გიორგი აფციაური (ორივე-ლოკომოტივი), მირიან მოდებაძე (აია);
№15: სოსო მათიაშვილი (ლელო).

რაგბი ევროპის ჩემპიონატი

I ტური

9 თებერვალი
რუმინეთი-საქართველო
ბელგია-გერმანია

10 თებერვალი
ესპანეთი-რუსეთი

ყოველდღიური სპორტული გაზეთი "ლელო"
593
მკითხველის კომენტარები / 0 /
მსგავსი ამბები
რუბრიკის სხვა სიახლეები
;