საქართველო 1:0 მალტა - გამარჯვებულებსაც ასამართლებენ

საქართველო 1:0 მალტა

01.06. ივნისი. შვაცი (ავსტრია).
ზილბერშტადტ არენა
1:0 კაშია (89-პენ)

საქართველო (4-4-1-1): კვასხვაძე - გეგეჭკორი (67. ხოჭოლავა), კაშია, კვირკველია, დვალი -ლობჟანიძე (67. ბერიძე), გვილია, აბურჯანია (77. ნავალოვსკი), ჭანტურიშვილი (71. ხარაიშვილი) - კიტეიშვილი - ზივზივაძე (71. კაჭარავა).

სათადარიგოები: მაკარიძე, ხარაბაძე
მწვრთნელი: ვლადიმირ ვაისი

მალტა (4-5-1): ბონელო - ბირმენი (60. გამბინი), აგიუსი, ფენეჩი (65. გრეჩი), კამილერი - ბრიფა (84. ველა), ეფიონგი (81. დეგაბრიელი), ზერაფა, მბონგი, ბორგი - მიფსუდი (70. ნვოკო).

სათადარიგოები: სულთანა, პიზანი, ჯონსონი, ჰოგი, კოენი, აპაპი
მწვრთნელი: რეი ფარუჯა

გაფრთხილება: გვილია (49), ბორგი (49), მიფსუდი (50), გეგეჭკორი(54)
გაძევება: გვილია (53)
არბიტრი: მ. შუტენგრუბერი (ავსტრია)

საქართველოს ნაკრებმა განახევრებული შემადგენლობით და ერთი გაძევებულით მაინც დაამარცხა მალტა, თუმცა ეს არ იყო ის გამარჯვება, რომლის გამოც ზედმეტი აჟიოტაჟი უნდა ავტეხოთ. რა თქმა უნდა, გვაკლდა არაერთი ფეხბურთელი და სამწვრთნელო შტაბმაც უამრავ ექსპერიმენტს მიმართა, მაგრამ სუსტი მეტოქე მაინც უფრო დამაჯერებლად უნდა დაგვემარცხებინა...

გმირი

ყველა თამაშს ჰყავს თავისი გმირი და, რა თქმა უნდა, ის ამ თამაშსაც ჰყავდა. თბილისის "დინამოს" ახალგაზრდა ნახევარმცველმა ოთარ კიტეიშვილმა ისე ითამაშა, თქვენი მოწონებული - საქართველოს ნაკრებში ცენტრალური ნახევარმცველის პოზიციაზე დიდი კონკურენცია კი არის, მაგრამ ოთარმა თუ ასე გააგრძელა, ის უშანსოდ ნამდვილად არ იქნება.

თავი დავანებოთ იმას, რომ ერთადერთი გოლის მთავარი შემოქმედთაგანიც კიტეიშვილი გახლდათ. ის მთელი შეხვედრის განმავლობაში გამორჩეული იყო ჩვენი გუნდის შემადგენლობაში და რბილი, ტექნიკური სათამაშო მანერით უამრავ პრობლემას უქმნიდა მოწინააღმდეგეს.

რომ არა წითელი ბარათი...

ფეხბურთშიც და ცხოვრებაშიც ასეა - გმირობიდან ანტიგმირობამდე ერთი ნაბიჯია. სანამ უშუალოდ თამაშზე გადავალ, უნდა ვთქვა, რომ ამ სტრიქონების წერა ჩემთვის ძალიან რთულია. სხვა თუ არაფერი, არაერთხელ დამიწერია საქებარი სიტყვები ვაკო გვილიაზე. რთულია-მეთქი ამის წერა, მაგრამ თავს იმით ვიმშვიდებ, რომ მოყვარეს პირში უნდა უძრახო და იმისაც მჯერა, რომ ის, რასაც ახლა ვიტყვი (და პირველ რიგში, რასაც ვაისი ეტყოდა), გვილიაზე საუკეთესოდ იმოქმედებს...

ისიც მგონია - რომ არა წითელი ბარათი, ადვილი შესაძლებელი იყო, სწორედ ის გვეხილა მატჩის მთავარ გმირად. გვილია, უბრალოდ, შესანიშნავი იყო პირველ ტაიმში. მისი პასების, თამაშის ორგანიზების ცქერა ერთ რამედ ღირდა და მალტას ადრევე რომ ვერ მოვუთავეთ საქმე, ამაში ყველაზე ნაკლები ბრალი სწორედ გვილიას მიუძღვის.

თუმცა, ვერაფრით ამიხსნია, რა დაემართა მას მეორე ნახევარში, როგორ მოახერხა დროის უმოკლეს მონაკვეთში ორი ყვითელი ბარათის მიღება და შედეგად - მოედნის დატოვება? ბოლომდე დარწმუნებული ვარ - გვილია შესაბამის დასკვნებს გამოიტანს მომხდარიდან და ასეთ რამეს აღარ გაიმეორებს.

გადამწყვეტი მომენტი

ყველა თამაშს აქვს ხოლმე გადამწყვეტი ეპიზოდები და, რა თქმა უნდა, ამ თამაშსაც ჰქონდა. მაგრამ ცოტა შორიდან მოვუვლი. მეჩვენება, რომ საქართველოს ნაკრების მთავარი მწვრთნელი მაინცდამაინც არ ენდობა ნიკა კაჭარავას.

არ ვიცი, სხვა როგორ ფიქრობს, მაგრამ ჩემი აზრით, ვლადიმირ ვაისმა ამჯერადაც დააგვიანა მისი საქმეში ჩართვა. ძველი და მრავალნაცადი ანდაზაა, რომ სჯობს გვიან, ვიდრე არასდროს - შეცვლაზე შესული კაჭარავა თამაშის ერთ-ერთი მთავარი გმირი გახდა. სწორედ მან გაუთამაშა "კედელი" კიტეიშვილს, რომელიც მალტელმა მცველმა საჯარიმოში წესების დარღვევით შეაჩერა...

ლიდერი

კარგია, რომ ამ შემადგენლობით მოთამაშე საქართველოს ნაკრებსაც ჰყავდა ლიდერი. ეს უდავოდ გურამ კაშიაა. კონკრეტულ სათამაშო სიტუაციებში ის აუღელვებლად და სწორად კარნახობდა ყველაფერს თავის პარტნიორებს.

შემთხვევითი არ არის, რომ სწორედ კაშიამ ითავა 11-მეტრიანის შესრულება, რომელმაც გამარჯვება მოუტანა ჩვენს ეროვნულ გუნდს. ამ დროს ყველა ვერ გაბედავდა ასე ცივსისხლიანად უმაღლესი საფეხბურთო სასჯელის აღსრულებას...

კარგია, რომ საქართველოს ნაკრებში არის ნამდვილი ლიდერი, ძალიან დიდი გამოცდილებით. კაშიას ეს თვისება, მისი სათამაშო ინტელექტი გამოსადეგი იქნება ერთა ლიგისთვის.

ლოდები არა, კენჭები...

საქართველოს ნაკრების მთავარი მწვრთნელი საქმის მცოდნე კაცია. ეგაა, ძალიან გვეშინია, ერთა ლიგაშიც არ გაგვყვეს ზნე, რომელიც ვაისის გუნდს უმრავლეს შეხვედრებში თან სდევს. ალბათ, მკითხველი კარგად ხვდება, რასაც ვგულისხმობ - როგორც სხვა დროს არაერთხელ, საქართველოს ნაკრებმა ამჯერადაც მხოლოდ ერთი ტაიმი ითამაშა სასურველ დონეზე, მეორეში კი აშკარად ჩავარდა.

ფეხბურთში ყველაფერი ანგარიში და სტატისტიკა არ არის. ჩვენი გუნდი, პრაქტიკულად, არ ჩანდა მეორე ნახევარში და ისე მოხდა, რომ ამ პერიოდში მალტელთა კართან აშკარა საგოლე მომენტი საერთოდ არ შექმნილა.

რა თქმა უნდა, მწვრთნელი დამოუკიდებელია თავის არჩევანში. მედია კი იმისთვისაა, რომ დასკვნები გამოიტანოს. მიმაჩნია, რომ ვაისმა დააგვიანა ცვლილებები. გარდა ამისა, მან მიმართა არაერთ ექსპერიმენტს თუ ტაქტიკურ გადაადგილებას.

საერთოდ, ამხანაგური შეხვედრები იმისთვისაა, რომ მწვრთნელმა რაღაც ახალი მოსინჯოს, მაგრამ მიმაჩნია, რომ ამ მატჩში ცოტა ბევრი მოგვივიდა. გუნდი ვერ ასწრებდა ერთ სქემასთან შეგუებას, რომ ის უკვე იცვლებოდა.

რა თქმა უნდა, ეს არ არის ლოდები ვაისის ბოსტანში, ეს კენჭებია, მაგრამ მაინც რთულად ასახსნელია თუნდაც ის, თუ რატომ მანამდე არ დაიტვირთნენ სათადარიგოთა სკამზე მყოფი მარცხენა მცველები. ლაშა დვალმა ამ პოზიციაზე ძალიან საიმედოდ ითამაშა, მაგრამ ის ამპლუით ცენტრალური მცველია და შეტევაში ვერ მოვთხოვთ ლატერალისთვის დამახასიათებელ სიმწვავესა და სისწრაფეს...

ლაკმუსის ქაღალდი

მალტის ნაკრებთან მატჩი თუნდაც იმიტომ იყო აუცილებელი, რომ საქართველოს ნაკრების ზოგიერთ კანდიდატს საფუძვლიანი წარმოდგენა ჰქონოდა თავის თამაშზე, თავის შესაძლებლობებზე. ახლა კონკრეტული გვარ-სახელების ჩამოთვლას მოვერიდებით. იმედია, დასკვნებს თავად ვაისი გამოიტანს და მჯერა - ლოგიკურსაც. სამაგიეროდ იმას კი სუფთა სინდისით დავწერ, რომ ზოგიერთი იმ ფეხბურთელის ადგილი, რომელიც ჩვენ მალტასთან ვიხილეთ, საქართველოს ნაკრებში არ არის.

ყოველდღიური სპორტული გაზეთი "ლელო"
944
მკითხველის კომენტარები / 1 /
გიზოგ
0
მომწონს, პერსონალურად კაცისთვის საჯაროდ იმის მალტასთან ჩატარებული თამაშით უაღრესად უკმაყოფილო დავრჩი, როგორც ფეხბურთელების ისე მწვრთნელის. საკმარისი აღმოჩნდა ბოლო რამდენიმე დადებითი შედეგი დაახლოები მალტასნაირ სუსტ გუნდებთან და მწვრთნელს სადავეები გაექცა. გუნდში არ იგრძნობოდა უდისციპლინობა, რაც სათამაშო დისციპლინაზეც აისახა. ვეთანხმები ჟურნალისტს თქმა, რომ სუსტი ხარ და ნაკრებისთვის არ ვარგიხარო რბილად, რომ ვთქვათ არაკორექტულია. მით უმეტეს ნაკრებში მოთამაშეები თავიანთი ინიციატივით კი არ მოდიან, არამედ მათ იწვევენ. თანაც არც უფლის ნათქვამი არ უნდა დაგვავიწყდეს, რომ მოხელის მიერ დაწუნებული ქვა შენობის საფუძველი გახდაო.
მსგავსი ამბები
რუბრიკის სხვა სიახლეები
;