საქართველო VS მალტა. რა გვინდა?

დღეს, თბილისის დროით 21 საათზე, საქართველოს ეროვნული ნაკრები ავსტრიის ქალაქ შვაცში ამხანაგურ მატჩს გამართავს მალტის ეროვნულ გუნდთან.

5 ივნისს ვეთამაშებით ლუქსემბურგს, თუმცა ახლა დღევანდელ მატჩზე გავამახვილებთ ყურადღებას.

საქართველოს ნაკრებს სულ მალე მოუწევს ერთა ლიგაში გამოსვლა. შეგვიძლია ჩავთვალოთ, რომ მალტასა და ლუქსემბურგთან შეხვედრები სხვა არაფერია, თუ არა გენერალური რეპეტიცია ერთა ლიგის მატჩებისთვის, რომლის სასტარტო შეხვედრაში ჩვენი გუნდის მეტოქე ყაზახეთის ნაკრები იქნება...

ძველი პრობლემა

ვლადიმირ ვაისი საქართველოს ნაკრების წინა მწვრთნელებისგან გვარიანად კი განსხვავდება, მაგრამ სლოვაკსაც მემკვიდრეობით ერგო ის პრობლემები, რაც მის წინამორბედებსაც აწუხებდათ - მისი ხელმძღვანელობით საქართველოს ნაკრებს ოპტიმალური შემადგენლობით ჯერ არ უთამაშია.

გამონაკლისი რაღა მალტასთან შეხვედრა იქნებოდა? ტრავმების გამო საქართველოს ნაკრებს დააკლდნენ ჯანო ანანიძე, თორნიკე ოქრიაშვილი, ლევან მჭედლიძე, გიორგი ქვილითაია, გიორგი მერებაშვილი...

სანაკრებო შეკრებაზე დაშავდა ლადო დვალიშვილი. საეჭვოა, შეძლებს თუ არა მინდორზე გასვლას გიორგი ჩაკვეტაძე. ნაკრებს უშუალოდ ლუქსემბურგთან შეხვედრაში შეუერთდებიან ყაზახეთში მოასპარეზე ლეგიონერები - კაპიტანი ჯაბა კანკავა, ნიკა კვეკვესკირი და ჯაბა ჯიღაური, ასევე, უნგრული "ბალმაზივაროშის" შემტევი, ბაჩანა არაბული.

დანაკლისი მართლაც რომ ძალიან დიდია. რა თქმა უნდა, თავიდანვე ვიყავით შეგუებული ანანიძის, ოქრიაშვილისა და მერებაშვილის არყოფნას. ქვილითაიას ტრავმა კი მოწმენდილ ცაზე მეხის გავარდნას ჰგავდა - "ქართველი ავტომატი", როგორც მას ხშირად უწოდებდა ავსტრიული პრესა, ბოლო დროს უგოლოდ არ ტოვებდა მინდორს...

ის, ვინც უნდა ვნახოთ

თამამად შეიძლება ითქვას, რომ ქართველი გულშემატკივარი მალტასთან შეხვედრას მოუთმენლად ელის. ცხადია, მეტოქე არ მიეკუთვნება ევროპული ფეხბურთის გრანდებს, მაგრამ ამ შეხვედრას სხვა დატვირთვაც აქვს.

საშუალება გვექნება, საქმეში ვნახოთ ის ფეხბურთელები, რომელთაც ან არასოდეს მოურგიათ ეროვნული გუნდის მაისურა, ან აქამდე მცირე შანსი ეძლეოდათ ქვეყნის პირველ გუნდში თავის გამოსაჩენად.

ზაურ მახარაძეს, ბექა ვაჩიბერაძეს, გიორგი ბერიძესა და ლევან ხარაბაძეს პირველად მიეცემათ ეროვნულ ნაკრებში თამაშის შანსი. რა თქმა უნდა, ვლადიმირ ვაისს ვერავინ დაავალდებულებს, დებიუტანტი ათამაშოს, მაგრამ, რატომღაც, დარწმუნებულები ვართ, რომ ამ ორ შეხვედრაში თითოეულ მათგანს მიეცემა თავის გამოჩენის საშუალება.

განსაკუთრებით გვაინტერესებს ზაურ მახარაძის თამაში. მახარაძეს, ვინც უკრაინული საფეხბურთო სკოლის აღზრდილია, უთამაშია ამ ქვეყნის ყველა ასაკობრივ ნაკრებში და არ გამოვრიცხოთ, ის დღეს ძირითად შემადგენლობაში ვიხილოთ, რადგან კიდევ ორი მეკარიდან ერთს, გიორგი მაკარიძეს, არ აქვს სათამაშო პრაქტიკა პორტუგალიურ "რიუ ავეში".

რა გვინდა?

რა თქმა უნდა, გვინდა გამარჯვება. ორი აზრი არ არის - საქართველოს ნაკრების დონის გუნდი მალტას ნებისმიერ შემთხვევაში უნდა უგებდეს. არადა, კუნძულელებისგან სანაკრებო ალიყურებიც გვახსოვს, თუმცა ეს სხვა წერილის თემაა...

რაც მთავარია, უნდა გაგრძელდეს ის პროგრესი, რომელიც დავინახეთ ბოლო ორი სანაკრებო მატჩისას. ეს ყველაზე მთავარია იმასთან ერთად, რომ სამწვრთნელო შტაბმა ბოლომდე დახვეწოს ტაქტიკური ნიუანსები, რომელთა გამოყენებასაც აპირებს ერთა ლიგის გათამაშებაში.

მოკლედ, შედეგთან ერთად, სანახაობასაც ველით, თუმცა არც ის გვავიწყდება, რომ სეზონის ბოლოა და ასეთ დროს ფეხბურთელებს ხშირად ძალები აღარ ჰყოფნით ხოლმე. არ გვგონია, ეს ფაქტორი გადამწყვეტი იყოს, რადგან ქართული ლეგიონი სწორედ სეზონის მეორე ნახევარში შევიდა საუკეთესო ფორმაში.

როცა მალტა ამაყია...

მალტის ნაკრები, ჩვენსავით ერთა ლიგის D დივიზიონში რომ ითამაშებს, ამაყია და საქართველოს უპირველეს გუნდს თავაწეული ხვდება. მალტელთა მთავარი მწვრთნელის პოსტზე პირველი შეხვედრა ჩაატარა რეი ფარუჯამ, ვინც ტომ საინტფელდი შეცვალა. მისი ხელმძღვანელობით, კუნძულელებმა სომხეთის ნაკრებს და ჰენრიხ მხითარიანს არ დაუდეს ტოლი - 1:1.

სომხები ნატურალიზებული ბელგიელის, ივან იაგანის გოლით იგებდნენ, თუმცა პირველი ტაიმის ბოლოს ანდრე აგიუსმა პენალტით წონასწორობა აღადგინა.

ეს მით უფრო გასაკვირია, რომ მალტის ნაკრებში არაერთი საკადრო პრობლემაა. რეი ფარუჯას გარკვეული პრობლემები შეექმნა ამ თამაშების წინ. მალტის ფეხბურთის ფედერაციის ოფიციალური საიტის ცნობით, საქართველოსთან შეხვედრას სამი წამყვანი ფეხბურთელი გამოტოვებს. ტრავმების გამო მინდორზე ვერ გავლენ კვიპროსული "აპოლონის" შემტევი ანდრე შკემბრი და მალტური "ჰიბერნიანის" ორი ნახევარმცველი - ბიორნ კრისტიანსენი და იოჰან ბეზინა.

მალტელთა დანაკლისი ამით არ ამოიწურება. უახლოეს შეხვედრაში მონაწილეობას ვერ მიიღებენ შვეიცარიული "კიასოს" შემტევი ჟან-პოლ ფარუჯა და "ბირკირკარას" ნახევარმცველი კაინ ატარდი.

მალტის ნაკრების სამწვრთნელო შტაბის გადაწყვეტილებით, შემადგენლობას რამდენიმე ფეხბურთელი დაემატა. ესენი არიან "ჰიბერნიანის" თავდამსხმელი იურგენ დეგაბრიელი და ამავე გუნდის ნახევარმცველი დანსტინ ველა.

ზოგადად, მალტის ნაკრების სამწვრთნელო შტაბი ყველანაირად ცდილობს, უმტკივნეულოდ ჩაატაროს თაობათა ცვლის რთული პროცესი. ორი ამხანაგური შეხვედრისთვის ეროვნულ ნაკრებში ახალგაზრდულიდან არაერთი ფეხბურთელია გამოძახებული - ჯეიკ გრეჩი, ჯოზეფ მბონგი, კირიან ნვოკო და მაილს ბირმენი, რომელთაც მალტელები დიდ იმედებს უკავშირებენ - ის შოტლანდიური "რეინჯერსის" ღირსებას იცავს.

სულ ბოლოს მალტის ნაკრებში კიდევ ორ ახალ ფეხბურთელს უხმეს - "ჰამრუნის" მეკარე სტივ სულთანას და "ვიქტორია ჰოთსპურსის" უკანახაზელი ფერდინანდ აპაპი.

სულთანა მესამე მეკარე იქნება. აპაპის შანსები კი უფრო სოლიდურია, რადგან ტრავმის გამო ნაკრებს მოულოდნელად გამოაკლდა იტალიური "არეცოს" მცველი ზეკ მუსკატი.

"ჩვენ ბოლომდე უნდა დავიხარჯოთ. სომხეთთან შეხვედრამ გვიჩვენა, რომ თუ მოვინდომებთ, ძალიან ბევრი რამ გამოგვივა. წინ საქართველოსთან შეხვედრაა და დიდი იმედი მაქვს, შევძლებთ იმ შედეგის მიღწევას, რომელსაც ვესწრაფვით. გვინდა, გულშემატკივრებმა ჩვენით იამაყონ. ახალგაზრდა ფეხბურთელებმა საკუთარი თავი ძალიან კარგად წარმოაჩინეს. მათ ყველას აჩვენეს, რომ შეიძლება, გამოცდილების დეფიციტი ჰქონდეთ, მაგრამ თავდადება არ აკლიათ.

გამოცდილი მოთამაშეების გვერდით ისინი ძალიან ბევრს ისწავლიან. ასე რომ, იმედიანად ვართ", - თქვა ფარუჯამ საქართველოს ნაკრებთან შეხვედრის წინ.
სომხეთთან ამხანაგურ შეხვედრაში მალტის ნაკრებმა ასეთი შემადგენლობით ითამაშა:

მალტა: ჰოგი, აპაპი, აგიუსი, ბორგი, ბრიფა (72. გრეჩი), ეფიონგი, ფენეჩი, მიფსუდი, ნვოკო (65. ბირმენი), პისანი (76. მბონგი), ზერაფა (81. კოენი).
მალტასთან მატჩის შემდეგ საქართველოს ნაკრები უკვე ლუქსემბურგთან გასამართავი ამხანაგური შეხვედრისთვის მოემზადება, რომელიც 5 ივნისს გაიმართება.
ალეკო კაკაურიძე

საქართველო

მეკარეები - გიორგი მაკარიძე (რიუ ავე, პორტუგალია), როინ კვასხვაძე (ტორპედო), ზაურ მახარაძე (ზორია, უკრაინა);

მცველები - გურამ კაშია (ვიტესი, ჰოლანდია), ლევან გეგეჭკორი (რუსთავი), სოლომონ კვერკველია (ლოკომოტივი, რუსეთი), დავით ხოჭოლავა (შახტარი, უკრაინა), ლაშა დვალი (პოგონი, პოლონეთი), გიორგი ნავალოვსკი (სკა ენერგია, რუსეთი), ლაშა შერგელაშვილი (რიგას ფს, ლატვია), ლევან ხარაბაძე (დინამო თბ);

ნახევარმცველები - ჯაბა კანკავა, ნიკა კვეკვესკირი (ორივე - ტობოლი, ყაზახეთი), გიორგი აბურჯანია (სევილია ატლეტიკო, ესპანეთი), ოთარ კიტეიშვილი (დინამო თბ), ვაკო გვილია (ლუცერნი, შვეიცარია), ბექა ვაჩიბერაძე (რიგას ფს, ლატვია), საბა ლობჟანიძე (რანდერსი, დანია), გიორგი ბერიძე (ტრენჩინი, სლოვაკეთი), გიორგი ჩაკვეტაძე (გენტი, ბელგია), ვახტანგ ჭანტურიშვილი (ტრნავა, სლოვაკეთი), გიორგი ხარაიშვილი (გიოტებორგი, შვედეთი);

თავდამსხმელები - ნიკა კაჭარავა (კორონა, პოლონეთი), ბუდუ ზივზივაძე (დინამო, თბილისი), ბაჩანა არაბული (ბალმაზივაროში, უნგრეთი).

ყოველდღიური სპორტული გაზეთი "ლელო"
1514
მკითხველის კომენტარები / 0 /
მსგავსი ამბები
რუბრიკის სხვა სიახლეები
;