საჩხერის ჩიხურა განადგურდა, - საბურთალომ გამარჯვება გაანიავა

საჩხერის "ჩიხურამ" თურქულ შეკრებაზე პირველი საკონტროლო შეხვედრა გამართა და მტკივნეული მარცხი იწვნია.

საქართველოს თასის მფლობელის მეტოქე ესტონეთის ვიცე-ჩემპიონი ტალინის "ლევადია" გახლდათ.

ესტონელები პირველ ტაიმში დაწინაურდნენ, მაგრამ საჩხერელებმა წონასწორობა მალე აღადგინეს. თუმცა ტაიმის დასრულებამდე "ლევადიამ" კიდევ 2 გოლი გაიტანა და შესვენებამდე "ჩიხურა" უკვე 1:3-ს აგებდა.

მეორე ნახევარში ესტონელებმა საჩხერელთა კარის აღება კიდევ ორჯერ მოახერხეს და საბოლოოდ 5:1 გაიმარჯვეს. საჩხერელთაგან ერთადერთი გოლი თემურ მარკოზაშვილმა ახლო მანძილიდან დარტყმით გაიტანა.

ჩიხურა: ჰამზიჩი (მწყერაშვილი), ჩიტეიშვილი (ცერცვაძე), კაშია, მირცხულავა, ჩიკვაიძე, დობროვოლსკი (ჩიხლაძე), კაკუბავა, მარკოზაშვილი (ბუღრიძე), კახაბრიშვილი (გაბედავა), პედრო გუგა (ლექვთაძე), ბუხაიძე.

შემდეგ საკონტროლო მატჩს "ჩიხურა" დღეს, პოლონურ "პოდბესკიძიესთან" გამართავს. ეს ის გუნდია, სადაც იანვარში ქუთაისის "ტორპედოს" ყოფილი ნახევარმცველი გუგა ფალავანდიშვილი ჩაირიცხა.

დაკარგული  გამარჯვება

"საბურთალო" თურქულ შეკრებაზე ფრეების რეკორდს ამყარებს. გიორგი ჭიაბრიშვილის გაწვრთნილებმა ზედიზედ მესამე ამხანაგური მატჩი დაასრულეს ზავით - ამჯერად, "საბურთალო" სერბეთის პირველი ლიგის ლიდერ ვრანის "დინამოს" დაუპირისპირდა.

თბილისური კლუბის პრესსამსახურის ცნობით, პირველ ნახევარში ანგარიშის გახსნა გიორგი კოხრეიძეს შეეძლო, მაგრამ მისი თავური ძელს მოხვდა. მე-40 წუთზე კი გეგა დიასამიძემ ლამაზი გოლი გაიტანა - ტექნიკური დარტყმით მეკარეს ბურთი თავზე გადაუგდო.

მეორე ნახევარშიც ბურთს საბურთალოელები აკონტროლებდნენ. 86-ე წუთზე თბილისელებმა სწრაფი იერიში განახორციელეს - დავით ვოლკოვმა მეკარესთან პირისპირ დატოვა გურამ გოშთელიანი და ამ უკანასკნელმა ბურთი კარში ერთი შეხებით გაგზავნა - 2:0.

თითქოს, "საბურთალოს" მატჩის ლოგიკურ დასასრულამდე მიყვანა არ უნდა გაჭირვებოდა, მაგრამ დარჩენილ 4 წუთში სერბებმა სხვაობა ჯერ მინიმუმამდე შეამცირეს, ბოლოს კი, კუთხურის შემდეგ, წონასწორობაც აღადგინეს.

ისევე, როგორც წინა სპარინგში უკრაინულ "სტალთან" (3:3), "საბურთალომ" მოგება ამჯერადაც ბოლო წუთებზე გაუშვა ხელიდან.

საბურთალო: სომხიშვილი, მალი, მარგველაშვილი, ცნობილაძე, ნადარაია, ალთუნაშვილი (66. ჯინჯოლავა), თარხნიშვილი, დიასამიძე (61. ვოლკოვი), ჩაბრაძე, გვარაძე, კოხრეიძე (61. გოშთელიანი).

ყოველდღიური სპორტული გაზეთი "ლელო"
1186
მკითხველის კომენტარები / 0 /
მსგავსი ამბები
რუბრიკის სხვა სიახლეები
;