საჭადრაკო ევროპა: კრეტაზე რუსებთან

მოჭადრაკეთა ევროპის გუნდურ ჩემპიონატში, რომელსაც კუნძული კრეტა მასპინძლობს, გუშინ მე-4 ტურში საქართველოს ქალთა ნაკრები ასპარეზობის რეიტინგფავორიტ რუსეთის გუნდს შეხვდა.

პირველ დაფაზე ევროპის წლევანდელი ჩემპიონი ნანა ძაგნიძე მსოფლიოს და ევროპის ექსჩემპიონ ალექსანდრა კოსტენიუკს დაუზავდა.

მეოთხე დაფაზე ლელა ჯავახიშვილმა ოლგა გირიას აჯობა, მაგრამ საკუთარი გუნდი მარცხისგან ვერ იხსნა, რადგან მეორე-მესამე დაფებზე ნინო ბაციაშვილმა და ბელა ხოტენაშვილმა, შესაბამისად, ევროპის ორ-ორგზის ჩემპიონებთან - კატერინა ლაგნოსა და ვალენტინა გუნინასთან დათმეს პარტიები. საქართველოს ნაკრებმა 1.5:2.5 წააგო.

ამავე ტურში მეწინავე ჯგუფის წარმომადგენელთა პაექრობები ასე დასრულდა: ესპანეთი-პოლონეთი 2:2, ჰოლანდია-იტალია 1:3, საბერძნეთი-სომხეთი 1.5:2.5, საფრანგეთი-ისრაელი 2.5:1.5, უნგრეთი-უკრაინა 1:3.

ოთხი ტურის შემდეგ 8 ქულით ერპიროვნულად რუსეთის ნაკრები ლიდერობს. მას თითო ქულით ჩამორჩებიან ესპანეთი და პოლონეთი, რომლებიც მეორე-მესამე ადგილებს იყოფენ. ექვს ნაკრებს, მათ შორის - საქართველოს, 6-6 ქულა აქვს.

ვაჟთა ტურნირში საქართველოს ვაჟთა ნაკრები რუმინელებს დაუზავდა - 2:2 (კონსტანტინ ლუპულესკუ-ბაადურ ჯობავა 1:0, ემილიან პარლიგრასი-მიხეილ მჭედლიშვილი 0:1, ანდრაშ საბო-დავით ჯოჯუა 0.5:0.5, ვლადისლავ ნევედნიჩი-ლუკა პაიჭაძე 0.5:0.5).

დანარჩენი მატჩები: რუსეთი-უნგრეთი 1.5:2.5, გერმანია-პოლონეთი 2:2, ისრაელი-ხორვატია 1.5:2.5, სომხეთი-ჰოლანდია 2.5:1.5, თურქეთი-უკრაინა 2.5:1.5, ჩეხეთი-სერბეთი 2:2.

ოთხი ტურის შემდეგ: უნგრეთი, ხორვატია, სომხეთი-7-7, რუსეთი, გერმანია, პოლონეთი, ბელარუსი, თურქეთი-6-6. საქართველო 5 ქულით მეთერთმეტეა.

V ტური
ქალები. სომხეთი-საქართველო, რუსეთი-ესპანეთი, იტალია-პოლონეთი, უკრაინა-საფრანგეთი, თურქეთი-სლოვენია.

ვაჟები. საქართველო-ისრაელი... უნგრეთი-სომხეთი, ხორვატია-გერმანია, პოლონეთი-ბელარუსი, რუსეთი-თურქეთი, აზერბაიჯანი-ჩეხეთი, სერბეთი-საფრანგეთი, ჰოლანდია-რუმინეთი.

ყოველდღიური სპორტული გაზეთი "ლელო"
1709
მკითხველის კომენტარები / 0 /
მსგავსი ამბები
რუბრიკის სხვა სიახლეები
;