[ფეხბურთელთა სეხნია-ორეულები] მათეუსი გასაგებია, მაგრამ ბავშვს დასაევი სახელად რატომ უნდა დაარქვა?!

ფეხბურთის სიყვარულს რომ საზღვარი არ აქვს, ამას დიდი მტკიცება არ სჭირდება. ფეხბურთის თამაშისას ყველა ბავშვი ცდილობს, რაღაცით თავის კუმირს დაემსგავსოს, არის შემთხვევები, როცა მშობლები (ძირითადად მამები) უფრო შორს მიდიან და საკუთარ შვილებს ამა თუ იმ ფეხბურთელის საპატივცემულოდ არქმევენ სახელს.

ვეცადეთ ცოტა გაგახალისოთ და დღეს გვინდა არაორდიანლური სიმბოლური ნაკრები შემოგთვაზოთ, სადაც გაიცნობთ ისეთ მოთამაშეებს, ვისაც სახელი ამა თუ იმ ვარსკვლავის პატივსაცემად დაარქვეს.

მაშ ასე, დავიწყოთ...

ბრაზილიელი დასაევ მათეუსი (ბრაზილია, თავისუფალი აგენტი)

დაბადების თარიღი: 1993 წლის 25 აპრილი

ბრაზილიელი მეკარის სრული სახელი და გვარია დასაევ მათეუს ფერეირა ფრეიტასი. აღსანიშნავია, რომ ფეხბურთელის მამა ორი მოთამაშით განსაკუთრებით იყო აღფრთოივანებული, პირველი გახლდათ საბჭოთა კავშირის ნაკრების მეკარე რინატ დასაევი, მეორე კი ლეგენდარული გერმანელი ლოთარ მათეუსი. სილვიო ფრეიტასი (ფეხბურთელის მამა) ამბობს, რომ შვილს სახელი მეუღლისაგან მალულად დაარქვა: „მას უნდოდა, რომ შვილისთვის ჯონ ენტონი დაგვერქმია, როდესაც დაბადების მოწმობის ასაღებად წავედი, ცოლისაგან მალულად სახელი „დასაევ მათეუსი“ ჩავაწერინე“.

ამჟამად ბრაზილიელი დასაევი უკლუბოდაა, ცოტა ხნის წინ იგი ბრაზილიის  მეორე დივიზიონის კლუბ „ნაუტიკოში“ ასპარეზობდა.


პაველ... უკაცრავად, ქარიმ ნედვედი (ალ აჰლი, ეგვიპტე)

დაბადების თარიღი: 1997 წლის 8 აგვისტო

დასაევისგან განსხვავებით, ეგვიპტელმა ნედვედმა სახელი თავად შეირჩია. უფრო სწორად, მას ასე „ალ აჰლის“ ახალგაზრდულ გუნდში თამაშისას ეძახდნენ. პატარა ხუჭუჭთმიანი ბიჭი მარჯვენა ნახევარმცველის პოზიციაზე თამაშობდა. ქარიმ ნედვედი ეგვიპტის ახალგაზრდული ნაკრების წევრია. მისი სათამაშო ამპლუა შეიცვალა და უფრო მეტად მარჯვენა მცველად, ხანდახან კი საყრდენ ნახევარმცველად თამაშობს, თუმცა ბავშვობის დროს შერჩეული სახელი დღემდე შემორჩა.


დევიდ ბექჰემი? არა, ახმედ ბექჰემი (ეგვიპტე ვადი დეგლა)

დაბადების თარიღი: 1997 წლის 23 მარტს

ნედვედთან ერთად, „ალ აჰლის“ თავისი ბექჰემიც ჰყავდა. გაურკვეველია, რატომ აირჩია ამპლუით ცენტრალურმა მცველმა ახმედ რამადანმა ეს ფსევდონიმი. ამჟამად იგი „ვადი დეგლაში“ თამაშობს და ეგვიპტის ახალგაზრული ნაკრების წევრია.

ერთი წუთით წარმოიდგინეთ „ალ აჰლისა“ და „ვადი დეგლას“ თამაში, როცა ერთმანეთის პირისპირ ნედვედი და ბექჰემი წარსდგებიან...


ამერიკელი ზიკო ბეილი (აშშ, „ცინცინატი“)

დაბადების თარიღი: 2000 წლის 27 აგვისტო

ამ ახალგაზრდა ფეხბურთელზე ბევრი არაფერია ცნობილი. იგი „ლოს ანჯელეს გალაქსის“ აღზრდილია, ცოტა ხანი ბედი ევროპაშიც მოსინჯა (შვედურ „კალმარსა“ და ნორვეგიულ „ჰელსინგორში“), 2020 წლის იანვარში კი დაბრუნდა ამერიკაში და ამჟამადა MLS-ის კლუბ „ცინცინატიში“ ასპარეზობს.

უცნობია, მშობლებმა რატომ შეურჩიეს ეს სახელი შვილს. იმედია, მოვა დრო და როდესაც 19 წლის ზიკო ბეილი ცნობილი გახდება, თავისი სახელის საიდუმლოსაც მაშინ გაამხელს.


მარადონა... უზბეკეთიდან (მარადონა საფაროვი, უზბეკეთი, შერდორი)

დაბადების თარიღი: 1994 წლის 15 იანვარი

ეგვიპტელი ბექჰემისა და ბრაზილიელი დასაევის შემდეგ, თითქოს რაღა უნდა გაგვკვირვებოდა,  მაგრამ აგერ, ბატონო, ინებეთ, უზბეკი... მარადონა!

ბევრი ფიქრი რად უნდა რომ, ფეხბურთელის მამა, თავის დროზე, ლეგენდარული დიეგო მარადონას გულშემატკივარი იყო და შვილსაც ამიტომ დაარქვა მისი სახელი. მარადონა ახლა უზბეკეთის მესამე დივიზიონის კლუბ „შერდორში“ თამაშობს.

ალბათ დაგვეთანხმებით, რომ ამ სახელის პატრონს ნამდვილად მეტი მოეთხოვება...


კაბო ვერდე, რეალი და... ბალაკი (კონსტანტინუ ლოპეში, კაბო ვერდე, რეალი)

დაბადების თარიღი: 1987 წლის 9 ივნისი

ამ ცოტა ხნის წინ მიხაელ ბალაკის ინტერვიუ გამოქვეყნდა, სადაც იგი ჰყვებოდა, რომ შესაძლებლობა ჰქონდა „რეალში“ ეთამაშა, მაგრამ ეს ტრანსფერი არ შედგა. თუმცა ბალაკი „რეალში“ მაინც თამაშობს, ოღნდ, კაბე ვერდეში. კონსტანტინუ ლოპეში პორტუგალიის მესამე დივიზიონის კლუბ კელუშის „რეალის“ ღირსებას იცავს.

როგორც ჩანს, კაბო ვერდეში ბალაკი დიდი პოპულარობით სარგებლობს. კიდევ ერთი კაბოვერდელია კიკი ბალაკი, რომელიც ასევე პორტუგალიის მესამე დივიზიონის კლუბ „სინტრენშეს“ ღირსებას იცავს.


ხუან დიეგო მოლინა მარტინესი, ან უბრალოდ, სტოიჩკოვი (ესპანეთი, ალკორკონი)

დაბადების თარიღი: 1993 წლის 5 ნოემბერი

ხუან დიეგო მოლინა მარტინესი, ან უბრალოდ, სტოიჩკოვი ესპანეთის სეგუნდა დივიზიონის ერთ-ერთი საუკეთესო მეგოლეა. ესპანურ გამოცემა Marca-სთვის მიცემულ ინტერვიუში მან თავისი ზედმეტსახელის შესახებ ისაუბრა: „მამაჩემი ბარსელონაში პატარა კაფე-ბარის მფლობელია და ამავე დროს, „ბარსას“ დიდი ქომაგიცაა. ერთხელ ბარში ხრისტო სტოიჩკოვი ესტუმრა. ლეგენდარულმა ბულგარელმა მამაზე იმდენად დიდი შთაბეჭდილება მოახდინა, რომ შინ დაბრუნებულმა დედას უთხრა, უნდოდა შვილისთვის სახელი სტოიჩკოვის საპატივცემულოდა დაერქმია. დედა წინააღმდეგი იყო და ხუანი დამარქვეს, თუმცა მამაჩემი მაინც „სტოიჩკოვს“ მეძახდა.


მათეუს ბებეტოს-ძე (ბრაზილია, სპორტინგი)

დაბადების თარიღი: 1994 წლის 7 ივლისი

1994 წლის მსოფლიოს ჩემპიონატზე, ბრაზილიის ნაკრების ფეხბურთელები გოლს საკმაოდ ორიგინალურად აღნიშნავდნენ (თითქოს პატარა ბავშვს არწევდნენ). ბრაზილიელები ასე ულოცავდნენ შვილის შეძენას იმ ნაკრების ერთ-ერთ გამორჩეულ ფეხბურთელ ბებეტოს. გაგიკვირდებათ და, ბებეტომ გერმანიის ნაკრების ლეგენდარული ფეხბურთელის ლოთარ მათეუსის პატივსაცემად, ახალშობილს მათეუსი დაარქვა (სრული სახლია მათეუს დე ანდრადე გამა დე ოლივეირა), რომელიც აჟამად პორტუგალიის „სპორტინგში“ თამაშობს და ცოტა ხნის წინ ბრაზილიის ახალგაზრდული ნაკრებშიც გამოიძახეს.


მაჰმუდ ახმად ჰასანი, იგივე ტრეზეგე (ეგვიპტე, ასტონ ვილა)

დაბადების თარიღი: 1994 წლის 1 ოქტომბერი

მაჰმუდ ახმად ჰასანს „ალ აჰლის“ ახალგაზრდულ გუნდში ასპარეზობისას სხვებისგან გამორჩეული თამაშის მანერა ახასიათებდა. ამპლუით ცენტრალური თავდამსხმელი საკმაოდ მოქნილი იყო და თავითაც კარგად თამაშობდა. მას მწვრთნელმა ტრეზეგე შეარქვა. თამაშის სტილის გარდა, მწვრთნელი მაჰმუდს ფიზიკურადაც ამსგავსებდა ფრანგ ფორვარდს. ტრეზეგე ეგვიპტოს ნაკრების წევრია, საკლუბო დონეზე კი „ასტონ ვილას“ ღირსებას იცავს.


კაბო ვერდე გვაოცებს. აგერ, პლატინიც (ლუიშ ალმადა სუარეში, კაბო ვერდე, პოლიტექნიკა)

დაბადების თარიღი: 1986 წლის 16 აპრილი

რუმინეთის „პოლიტექნიკაში“ კაბო ვერდელი ლუიშ ალმადა სუარეში თამაშობს, რომელმაც კარიერის დასაწყისში საკმაოდ საინტერესო ფსევდონიმი აირჩა და საკუთარ თავს „პლატინი“ უწოდა. მან კაბო ვერდეს ნაკრებში 24 თამაში ჩაატარა. ფეხბურთელები ხუმრობდნენ, რომ პლატინის გვერდით თამაშობდნენ.


რეასკო, სახელად ჯორკაეფი (ეკვადორი, დორადოსი)

დაბადების თარიღი: 1999 წლის 18 იანვარს

მსოფლიოს 1998 წლისა და ევროპის 2000 წლის ჩემპიონი იური ჯორკაეფი საფრანგეთის ნაკრების ერთ-ერთი ლიდერი იყო. მას ბევრი თაყვანისმცემელი ჰყავდა, თუმცა განსაკუთრებულ პატივის, როგორც ჩანს, ეკვადორელები სცემდნენ. სწორედ მის პატივსაცემად დაარქვეს სახელი ეკვადორელ ჯორკაეფ რეასკოს, რომელიც ამჟამად მექსიკურ „დორადოსში“ იჯარით თამაშობს: „მამაჩემი საფრანგეთის ნაკრების ქომაგია. მას ძალიან მოსწონდა იური ჯორკაეფის თამაში, სახელიც მის საპატივცემულოდ დამარქვა. საფრანგეთის ნაკრებში იურის თამაშების ჩანაწერები ნანახი მაქვს. გარეგნობის რა მოგახსენოთ, მაგრამ ვფიქრობ, თამაშის სტილით მას რაღაცით ვგავარ“ - ამბობს რეასკო.


2551
მკითხველის კომენტარები / 1 /
Fy
0
ადმინ საბჭოეთში, რომ დაიბადა ის თუა დასაევის დანაშაული არ ვიცი და როგორც მეკარე არაფერი დაეწუნებოდა.დ სახელების დარქმევა კი ყველა შემთხსვევაში სისულელეა და არამარტო დასაევის შემთხვევაში.დ
მსგავსი ამბები
რუბრიკის სხვა სიახლეები
;