სენსაციური ცნობა: ნეიმარი მადრიდის "რეალში"?

გუშინ მეტად საინტერესო და სენსაციური ცნობა გავრცელდა - მადრიდის "რეალს" ნეიმარის ყიდვა სურს. ყველამ ვიცით, ბრაზილიელი აქამდე "ბარსელონაში" ბრწყინავდა, ახლა კი "პარი სენ ჟერმენისთვის" გააქვს გოლები.

ტრანსფერის მთავარი მოსურნე "რეალის" პრეზიდენტი ფლორენტინო პერესია. მას ჯერაც ვერ მოუნელებია, რომ 2013 წელს "ბარსასთან" ნეიმარისთვის ბრძოლა წააგო და "სანტოსისგან" ვერ იყიდა მსოფლიო ფეხბურთის ერთ-ერთი მთავარი ვარსკვლავი.

"ელ მუნდო დეპორტივოს" ინფორმაციით, "რეალის" წარმომადგენლები უკვე შეხვდნენ ნეიმარის მამას. ერთ-ერთი იდეის თანახმად, ბრაზილიელმა "სამეფო კლუბის" ფორმა 2021 წელს უნდა მოირგოს. ანუ მაშინ, როცა "რეალსა" და კრიშტიანო რონალდოს შორის კონტრაქტი დასრულდება. ამასთან, მადრიდელები არც იმის წინააღმდეგნი არიან, რომ ბრაზილიელი უფრო ადრეც აიყვანონ.

ცხადია, ეს ინფორმაცია შეიტყვეს საფრანგეთშიც. "პარი სენ ჟერმენის" პრეზიდენტმა ნასერ ალ ხელაიფიმ თურმე ხელქვეითებს უკვე დაავალა, ყველანაირი კომფორტი შეუქმნან ბრაზილიელს, რათა სხვაგან არ გაექცეს თვალი.

ყოველდღიური სპორტული გაზეთი "ლელო"
2293
მკითხველის კომენტარები / 0 /
მსგავსი ამბები
რუბრიკის სხვა სიახლეები
;