"სენტ ეტიენიდ" "სამტრედიაში" - სენეგალელი სიდიმან სანია ქართულ კლუბში ითამაშებს

"სამტრედიაში" კიდევ ერთი ლეგიონერი ჩაირიცხა - ამიერიდან გუნდის ღირსებას სიდიმან (სიდი) სანია დაიცავს. 28 წლის ფეხბურთელი წარმოშობით სენეგალელია და საყრდენი ნახევარმცველის პოზიციაზე თამაშობს.

სანია სენეგალური კლუბის, "ასც ეგოს" აკადემიაში იზრდებოდა, 18 წლიდან კი ფრანგული "სენტ ეტიენის" დუბლშემადგენლობაში გამოდიოდა. ის იქ 2009-13 წლებში ირიცხებოდა და მთავარ გუნდშიც ვარჯიშობდა, თუმცა მისი ფორმა მხოლოდ ორ ოფიციალურ შეხვედრაში მოირგო.

საფრანგეთშივე, მან ძალები მოსინჯა "რუაშიც". ამას გარდა, სანიას უთამაშია ნორვეგიაში ("სოგნდალი"), საბერძნეთში ("არისი"), ბოლოს კი პორტუგალიის სეგუნდა ლიგის (რანგით მეორე ლიგა) "უნიაო მადეირაში" გამოდიოდა.

სამტრედიული კლუბის პრესსამსახურის ცნობით, სენეგალელ ფეხბურთელთან ერთწლიანი კონტრაქტი გაფორმდა. სანია უკვე საქართველოშია და კლუბთან ერთად აქტიურ ვარჯიშს დღეიდან შეუდგება.

პორტუგალიურ "უნიაო მადეირასთან" სანიამ კონტრაქტი 18 იანვარს გაწყვიტა და თავისუფალი აგენტი გახდა. ეს ამ ტრანსფერში ყველაზე საინტერესო დეტალია: სენეგალელი მადეირელი გულშემატკივრების ერთ-ერთი რჩეული იყო, მაგრამ კონტრაქტი მაინც გაწყდა.

როგორც პორტუგალიური გამოცემა "მადეირა ფუტბოლი" ამტკიცებს, სიდი სანია საშობაო არდადეგებზე სამშობლოში დაგეგმილზე მეტხანს გაჩერდა, რის გამოც "მადეირას" ხელმძღვანელობამ დისციპლინარული სასჯელი დააკისრა. როგორც ჩანს, ფეხბურთელსა და კლუბს შორის უთანხმოება სწორედ ამან გამოიწვია.

"იუთუბზე" მრავლად არის მისი თამაშების ვიდეოკოლაჟი, საიდანაც ჩანს, რომ სანია ფიზიკურად ძალიან ძლიერია. ამავე დროს, საკმაოდ ტექნიკურიცაა, ხოლო "სტანდარტების" შესრულების დროს სახიფათო ფეხბურთელია.

უყვარს და იცის ბურთის ფლობა, თამამია, წინ უშიშრად მიდის და ბურთის უაზროდ მოცილებას ერიდება, თან პასს არ აყოვნებს, სულ ცდილობს, შეტევის ტემპი არ დააგდოს. სხვათა შორის, მოედანს კარგად ხედავს და საკმაოდ დახვეწილი პასებითაც გამოირჩევა.

დოსიე

სიდი სანია
დაიბადა 1990 წლის 4 თებერვალს დაკარში, სენეგალი
სიმაღლე: 181 სმ
პოზიცია: საყრდენი ნახევარმცველი
პროფესიული კარიერა
2008-09 ასც ეგო 22(7)
2009-10 სენტ ეტიენი 2 42(0)
2010-11 სენ ეტიენი 2(0)
2013 სონგდალი 28(3)
2014-15 არისი 0(0)
2016-17 რუა ნუონი 26 (2)
2017-18 მადეირა 15 (0)

ყოველდღიური სპორტული გაზეთი "ლელო"
1068
მკითხველის კომენტარები / 0 /
მსგავსი ამბები
რუბრიკის სხვა სიახლეები
;