სეოკ-ში ოლიმპიელები დააფასეს -'საქართველო ერთ-ერთი მოწინავე სპორტული ქვეყანაა ევროპაში'

გუშინ საქართველოს ეროვნულ ოლიმპიურ კომიტეტში საზეიმო მიღება გაუმართეს მინსკიდან დაბრუნებულ ოლიმპიურ დელეგაციას, რომელმაც 21-30 ივნისს იქ მეორე ევროპულ თამაშებში იასპარეზა და უჩვეულო წარმატებითაც გამოვიდა:

მოიპოვა 30 მედალი (6 ოქრო, 10 ვერცხლი და 14 - ბრინჯაო), რითაც ევროპის არაერთი წარმატებული ქვეყანა ჩამოიტოვა უკან და 50 მონაწილეს შორის მე-7 ადგილზე გავიდა. 

გუშინდელ ღონისძიებას ესწრებოდა მინსკში მყოფი ყველა მონაწილე, მათი მწვრთნელები, მსაჯები, ექიმები, თუმცა მათთან ერთად იყვნენ ფედერაციების წარმომადგენლები, ვეტერანი სპორტსმენები, საზოგადოების ცნობადი სახეები, პარლამენტარები, რომლებიც არ ყოფილან მინსკში, მაგრამ მოვიდნენ სპორტსმენებთან მოსალოცად.

ღონისძიებას სეოკ-ის პრეზიდენტი ლერი ხაბელოვი უძღვებოდა, ხოლო ესწრებოდნენ საქართველოს განათლების, მეცნიერების, კულტურისა და სპორტის მინისტრი მიხეილ ბატიაშვილი თავის მოადგილეებთან და სამინისტროს სხვადასხვა სამსახურების წარმომადგენლებთან ერთად. 

შეხვედრა ხაბელოვმა გახსნა, ვინც მიესალმა სპორტსმენებს და განაცხადა: “ჩვენ კიდევ ერთხელ დავამტკიცეთ, რომ შეგვიძლია, კონკურენცია გავუწიოთ ევროპის წამყვან სპორტულ ქვეყნებს და ვიბრძოლოთ მაღალი ადგილებისთვის. მინსკში გამოსვლით დავამტკიცეთ, რომ საქართველო ერთ-ერთი მოწინავე სპორტული ქვეყანაა ევროპაში.

ვსარგებლობ შემთხვევით და მადლობას გიხდით ყველას გაწეული ნაყოფიერი შრომისთვის, განსაკუთრებული მადლობა კი ჩვენს სპორტსმენებს, რომლებმაც თავდადებით იბრძოლეს მინსკში სპორტის გულშემატკივართა გასახარებლად”.

ხაბელოვმა ასევე გაიხსენა ამ თამაშებისთვის მოსამზადებელი პერიოდი, როცა ოლიმპიურმა კომიტეტმაც და სახელმწიფომაც სამინისტროს მეშვეობით დიდი შრომა გასწიეს, რომ ფედერაციებს პრობლემები არ შექმნოდათ და სპორტსმენებს სრულყოფილი მოსამზადებელი ეტაპი გაევლოთ. მისი თქმით, არც სახელმწიფო ივიწყებს მათ მიღწევას; პირიქით - ღირსეულად აფასებს და სპორტსმენებს მადლობას სოლიდური პრემიებით გადაუხდის.

დასასრულს, ხაბელოვმა ტოკიოს ოლიმპიადისთვის მზადებაზეც ისაუბრა და თქვა, რომ ეს თამაშები კარგი პრელუდიაა დიდი ოლიმპიადისთვის, ხოლო მინსკში ნამყოფ სპორტსმენთა დიდ ნაწილს სულ მალე ტოკიოს თამაშების სალიცენზიო შეჯიბრებები ელოდება. მან გამოთქვა იმედი, რომ ჩვენი ათლეტები წარმატებით გამოვლენ ჯერ სალიცენზიო შეჯიბრებებში, მერე კი - თავად ოლიმპიადაზე. 

შეხვედრის მონაწილეებს წარმატება მიულოცა მიხეილ ბატიაშვილმაც და გაიხსენა იქაური პერიპეტიები, რადგან თითქმის თავიდან ბოლომდე ესწრებოდა ამ თამაშებს. მანაც ხაზგასმით აღნიშნა, რაოდენ დიდ წარმატებას მიაღწიეს ჩვენებმა მინსკში და რაოდენ რთული იყო თითოეული მედლისთვის ბრძოლა. ასევე გამოთქვა იმედი, რომ ჩვენი სპორტსმენები ტოკიოს თამაშებსაც წარმატებით ჩაატარებენ. 

მეორე ევროპული თამაშების მონაწილეებს წარმატება მიულოცეს ვეტერანმა სპორტსმენებმა, მსოფლიოს ორ-ორგზის ჩემპიონებმა გურამ საღარაძემ და ლუკა კურტანიძემ, პარლამენტარმა და ოლიმპიურმა ჩემპიონმა შოთა ხაბარელმა, ვეტერანმა კომენტატორმა ჯამლეტ ხუხაშვილმა და სხვებმა, სპორტსმენთა სახელით კი მასპინძლებს მადლობა ამ თამაშების ჩემპიონმა ძიუდოში და გახსნის ცერემონიალზე საქართველოს დელეგაციის მედროშე გურამ თუშიშვილმა გადაუხადა.

ღონისძიებაზე ასევე მიულოცეს თავისუფალი სტილით ქვიშის თამაშების ლიცენზიების მოპოვება. ეს ახალი სპორტული ღონისძიებაა, რომელიც წლეულს პირველად ჩატარდება და მას აშშ-ის ქალაქი სან დიეგო უმასპინძლებს. 

346
მკითხველის კომენტარები / 0 /
მსგავსი ამბები
რუბრიკის სხვა სიახლეები
;