[სერია A. ანალიზი. ფაქტები+VIDEO] რონალდოს მეათასე მატჩი და...

...საქმეში ჩაერია კორონავირუსი და სერია A-ს მორიგი ტური გვარიანად შეიკვეცა. გადაიდო რამდენიმე მატჩი, მათ შორის, ერთ-ერთი ლიდერის - „ინტერის“ დაპირისპირება „სამპდორიასთან“...

ტური კი „ნაპოლიმ“ გახსნა და მორიგი მატჩიც მოიგო. ჩემპიონთა ლიგაში „ბარსელონასთან“ ჯახის წინ ჯენარო გატუზოს მიერ გაწვრთნილი გუნდი შესანიშნავ ფორმაშია. „ნაპოლი“ ჩამორჩა, თუმცა ჯერ ლორენცო ინსინიემ შეასრულა ზუსტად 11-მეტრიანი, მერე კი ფაბიან რუისმა შეაგდო ულამაზესი გოლი.

„რა ვუთხარი შესვენებაზე ბიჭებს? მხოლოდ ის, რომ უკეთესად უნდა ეთამაშათ. მეორე ტაიმში მართლაც უკეთესები ვიყავით, თუმცა მოსაგებად დიდი ბრძოლა გადაგვხდა. „ბრეშა“ მაგრად დაგვიდგა... რაც შეეხება „ბარსელონასთან“ თამაშს, მეტოქე საუკეთესოა, მაგრამ ჩვენ ჩვენი კოზირები გვაქვს“, - თქვა გატუზომ.

„იუვენტუსს“ ერთხელაც გაუჭირდა, მაგრამ გასვლაზე მაინც მოუგო სპალ-ს. კრიშტიანო რონალდო მისთვის საიუბილეო მატჩს ისე როგორ ჩაატარებდა, არ გაეტანა - მან ხუან კუადრადოს პასით გამოიჩინა თავი. მერე აარონ რემზიმაც შეაგდო, რასაც სპალ-ის მიერ ზუსტად შესრულებული 11-მეტრიანი მოჰყვა. იუვემ“ ზედმეტი გართულების გარეშე დაასრულა თამაში, მაგრამ ამ გამარჯვებას დამაჯერებელს მაინც ვერ ვუწოდებთ.

ფაქტები

* სპალ-თან მატჩი მე-1000 იყო კრიშტიანო რონალდოს კარიერაში.

* რონალდომ მიჯრით მე-11 შეხვედრაში შეძლო თავის გამოჩენა.

* „იუვენტუსმა“ სერია A-ში სპალ-ი სტუმრად პირველად დაამარცხა.

* „ნაპოლიმ“ მიჯრით მესამე მატჩში იმარჯვა.

* ბოლო 20 წლის განმავლობაში „ბრეშას“ „ნაპოლისთვის“ არ მოუგია.

„საგოლე მომენტების უკეთესად გამოყენება გვმართებდა. ჩემპიონთა ლიგაში სწორედ ასე უნდა მოვიქცეთ. ისე კი თავიდან ბოლომდე ვაკონტროლებდით თამაშის მსვლელობას“, - თქვა თამაშის დასრულების შემდეგ მაურიციო სარიმ.

„მილანს“ უნდა მოეგო „ფიორენტინასთან“ გასვლითი შეხვედრა, თუმცა მხოლოდ ქულას დასჯერდა. ზლატან იბრაჰიმოვიჩს გაუუქმეს გოლი, რომელიც წესით უნდა ჩათვლილიყო. ანტე რებიჩმა მაინც დააწინაურა „მილანი“ და „იები“ კაცნაკლულები დარჩნენ, თუმცა მასპინძლებმა პენალტით წონასწორობის აღდგენა შეძლეს.

„ზლატანმა ერთხელაც დაამტკიცა, რომ „მილანისთვის“ დიდი ძალაა. თუ ის გუნდში დარჩება, „მილანი“ ჩემპიონთა ლიგაზე გავა“, - თქვა თამაშის დასრულების შემდეგ პაოლო მალდინიმ. „მილანის“ ქომაგები დაამწუხრა მეკარე ჯანლუიჯი დონარუმას ტრავმამ...

„ლაციომ“ გასვლაზე უხვგოლიანი მატჩი მოუგო „ჯენოას“ და „იუვენტუსთან“ კვლავ ქულა აშორებს.

494
მკითხველის კომენტარები / 0 /
მსგავსი ამბები
რუბრიკის სხვა სიახლეები
;