სერია A. იუვენტუსს 9 ფეხბურთელი დააკლდება, იკარდი ინტერის ძირითადში ბრუნდება

2, 3 და 4 აპრილს იტალიაში სერია A-ს მორიგი ტურია. რა თქმა უნდა, პირველ რიგში ყურადღების ცენტრშია მატჩები ლიდერების მონაწილეობით. სამშაბათს, "იუვენტუსი" სარდინიაზე "კალიარის" სტუმრობს. ლიდერი საკადრო კრიზისზმა მოიცვა. სხვადასხვა მიზეზით, მასიმილიანო ალეგრის ყოფილის კლუბის წინააღმდეგ შეხვედრაში ძირითადი შემადგენლობის 9(!) ფეხბურთელი დააკლდება.

თამაშოს გამოტოვებენ - მეკარე მატია პერინი, მცველები - ანდრეა ბარძალი და ლეონარდო სპინაცოლა, ნახევარმცველები - სამი ხედირა და ხუან კუადრადო, შემტევები - მარიო მანჯუკიჩი, პაულო დიბალა, დუგლას კოშტა და კრიშტიანო რონალდო.

ეს იმას ნიშნავს, რომ ძირითად შემადგენლობაში მოხვდება "იუვენტუსის" ახალგაზრდა ვარსკვლავი მოიზეს კინი, რომელიც იტალიის ნაკრებშიც მიიწვიეს და იქაც გაიტანა გოლი. კინის გარდა, ალეგრის გუნდის დაკომპლექტება "იუვეს" 23-წლამდელთა გუნდიდანაც მოუწევს, საიდანაც უკვე გამოიძახა 3 ფეხბურთელი.

მნიშვნელოვანი სიახლეა "ინტერში". მაურო იკარდი და ლუჩანო სპალეტი საბოლოოდ შერიგდნენ. ეს დღეები არგენტინელი ფორვარდი გუნდთან ერთად ვარჯიშობდა და მოსალოდნელიც იყო, რომ უახლოეს მატჩებში მოედანზეც გამოჩნდებოდა...

და აი, 3 აპრილს, ჩეზარე პრანდელის "ჯენოასთან" საგარეო შეხვედრაში, იკარდი სულაც ძირითად შემადგენლობაში იქნება. ეს ამბავი სპალეტიმ მედიას პრესკონფერენციაზე  ამცნო. შეგახსენებთ, რომ 26 წლის შემტევს "ინტერის" შემადგენლობაში 13 თებერვლის შემდეგ არ უთამაშია. კონფლიქტის მიზეზი გახდა მისი გათავისუფლება კაპიტნის მოვალეობისგან, რასაც პროტესტით უპასუხა - არ გაჰყვა "ინტერს" ვენის "რაპიდთან" ევროპალიგის მატჩის სათამაშოდ.

ვნახოთ, მშვიდობა საბოლოოდ დამყარდა და თუ მოჩვენებითია...

695
მკითხველის კომენტარები / 0 /
მსგავსი ამბები
რუბრიკის სხვა სიახლეები
;