სერია A. III ტურის მიმოხილვა: ნაპოლი მარტივად მოამთავრა, ფიორე იუვეს დაუზავდა [VIDEO]

სერია A-ს მესამე ტური ძალიან საინტერესო გამოდგა. მთავარი მოვლენა მოხდა ფლორენციაში, სადაც „იუვენტუსმა“ ქულები დაკარგა „ფიორენტინასთან“.

„ბებერი ქალბატონი“ ამ შეხვედრაში საკუთარ თავს არ ჰგავდა. ტურინელებმა მთელი შეხვედრის განმავლობაში ძალიან სუსტად ითამაშეს და მოწინააღმდეგის კართან მხოლოდ რამდენიმე ნახევარმომენტი შექმნეს.

სამაგიეროდ, შეტევაში ძალიან მწვავე იყო „ფიორენტინა“. ვინჩენცო მონტელას გუნდს აქამდე ორი მატჩი წაეგო და მინდორზე გაშმაგებული გავიდა. ფრანკ რიბერის მეთაურობით „იები“ შმაგად უტევდნენ და ცოტა რომ გამართლებოდათ, უსათუოდ მოიგებდნენ.

„როცა მეტოქე კომპაქტურად გვეთამაშება, უნდა ვისწავლოთ მეტი მუშაობა. ჩვენ დღეს ვერ დავდგით დაუვიწყარი წარმოდგენა, მაგრამ ეს თამაში საკმარისი კი იყო ფრისთვის. რაც შეეხება ჩვენს დაშავებულ ფეხბურთელებს, მირალემ პიანიჩსა და დუგლას კოშტას, არ ვიცი, შეძლებენ თუ არა ისინი „ატლეტიკოსთან“ შეხვედრამდე გამოჯანმრთელებას“, - თქვა ნამატჩევს „იუვენტუსის“ დამრიგებელმა მაურიციო სარიმ, ვინც ავადმყოფობის შემდეგ გუნდს პირველად უთავკაცა.

„ჩვენ დღეს შესანიშნავად ვითამაშეთ და, ჩემი აზრით, მეტს ვიმსახურებდით. რაც შეეხება რიბერის, ის ჩემპიონური მენტალიტეტის მატარებელი ფეხბურთელია. ჩვენ მომავალში უთუოდ მოვუმატებთ“, - ეს უკვე მონტელას სიტყვებია.

„ფიორენტინას“ პრეზიდენტი როკო კომისო კი უფრო შორსაც წავიდა: „მე ვფიქრობ, რიბერი კრიშტიანო რონალდოზე უკეთესი ფეხბურთელია“, - თქვა მან.
რა თქმა უნდა, „იუვეს“ წაფორხილებით ისარგებლა „ნაპოლიმ“ და „სამპდორიას“ მოუგო.

ეუსებიო დი ფრანჩესკოს გუნდს საშინელი სტარტი აქვს - „სამპამ“ ყველა თამაში წააგო, მათ შორის, გარემონტებულ „სან პაოლოზეც“, არადა, დი ფრანჩესკომ თქვა, რომ ეს მისი გუნდის საუკეთესო თამაში იყო ამ სეზონში...

მატჩის გმირად მოგვევლინა ბელგიელი დრის მერტენსი, ვინც დუბლი მიითვალა. ბოლო გოლზე მას ასისტენტობა ესპანელმა ვეტერანმა, ფერნანდო ლორენტემ გაუწია.

„ჩვენი რამდენიმე ფეხბურთელი გამოჯანმრთელდა და ახლა გვაქვს ვარირების საშუალება. ეს ძალიან მნიშვნელოვანია. დღეს ბევრს ვუტევდით და მიზანს მივაღწიეთ, მაგრამ დაცვაში უფრო სუფთად უნდა ვითამაშოთ“, - ეს „ნაპოლის“ მწვრთნელის, კარლო ანჩელოტის სიტყვებია.

ალბათ, ჩემპიონატის კიდევ ერთ ფავორიტად უნდა შევრაცხოთ „ინტერი“, რომელიც ანტონიო კონტეს ხელმძღვანელობით ჯერჯერობით უდანაკარგოდაა. „ნერაძურიმ“ სტეფანო სენსის ერთადერთი გოლის წყალობით შინ მოუგო „უდინეზეს“. აღსანიშნავია, რომ „ინტერი“ მეტობაში იყო 35-ე წუთიდან, როცა უდინელთა ლიდერმა როდრიგო დე პაულმა, რატომღაც, მეტოქეს სახეში ხელი უთავაზა...

„ყველა თამაში დიდი ბრძოლაა. დღეს ჩვენ ვიბრძოლეთ. გუნდმა მაგრად მოინდომა. ეგაა, დაშვებულ შეცდომებს უნდა მივხედოთ. მომენტების რეალიზაცია რომ ყოფილიყო, უფრო დიდი ანგარიშით მოვიგებდით“, - თქვა თამაშის შემდეგ კონტემ.

მოულოდნელად წააგო „ლაციომ“. რომაელები ჩირო იმობილეს მიერ ზუსტად შესრულებული 11-მეტრიანის წყალობით ამარცხებდნენ სპალ-ს, მაგრამ ჯერ ანდრეა პეტანიამ შეაგდო, მერე კი ჟასმინ კურტიჩმა გაიტანა დამატებულ დროში.

შეტევაში დიდებულად მოთამაშე „რომა“ 4 ბურთით დაწინაურდა „სასუოლოსთან“ შეხვედრაში. ამ ოთხიდან ერთი გოლი „ჯალოროსის“ სომეხმა ახალწვეულმა, ჰენრიხ მხითარიანმა გაიტანა. „სასუოლო“ გონს მოვიდა და ორ ბურთამდე შეამცირა სხვაობა, თუმცა მეტი ვერაფერი შეძლო.

ერთ დროს, ფაბიო კაპელოს „მილანისთვის“ 1:0 საყვარელი ანგარიში იყო. ეტყობა, ეს დრო ბრუნდება, თუმცა მარკო ჯამპაოლოს კაპელომდე ბევრი უკლია. „როსონერიმ“ კშიშტოფ პიონტეკის პენალტით მოიგო, მაგრამ... ვაი ამ მოგებასო, ამაზეა ნათქვამი...

ფიორენტინა-იუვენტუსი 0:0

ნაპოლი-სამპდორია 2:0
გოლები: 1:0 მერტენსი (13), 2:0 მერტენსი (67)



ინტერი-უდინეზე 1:0
გოლი: 1:0 სენსი (44)
გაძევება: დე პაული (35. უდინეზე)

ჯენოა-ატალანტა 1:2
გოლები: 0:1 მურიელი (64-პენ), 1:1 კრიშიტო (90+1-პენ), 1:2 დ. საპატა (90+5)

ბრეშა-ბოლონია 3:4
გოლები: 1:0 ა. დონარუმა (10), 2:0 ა. დონარუმა (19), 2:1 ბანი (36), 3:1 ჩისტანა (52), 3:2 პალასიო (56), 3:3 დენსვილი (60), 3:4 ორსოლინი (80)
გაძევება: დესენა (48. ბრეშა)

პარმა-კალიარი 1:3
გოლები: 0:1 ჩეპიტელი (23), 0:2 ჩეპიტელი (39), 1:2 ბარილა (58), 1:3 სიმეონე (77)

სპალ-ლაციო 2:1
გოლები: 0:1 იმობილე (17-პენ), 1:1 პეტანია (63), 2:1 კურტიჩი (90+2)

რომა-სასუოლო 4:2
გოლები: 1:0 კრისტანტე (12), 2:0 ჯეკო (19), 3:0 მხითარიანი (22), 4:0 კლუივერტი (33), 4:1 ბერარდი (53), 4:2 ბერარდი (72)

ვერონა-მილანი 0:1
გოლი: 0:1 პიონტეკი (68-პენ)

ორშაბათი, 16 სექტემბერი
ტორინო-ლეჩე 22:45

1. ინტერი 3 3 0 0 7:01 9
2. ბოლონია 3 2 1 0 6:04 7
3. იუვენტუსი 3 2 1 0 5:03 7
4. ნაპოლი 3 2 0 1 9:07 6
5. ტორინო 2 2 0 0 5:03 6
6. ატალანტა 3 2 0 1 7:06 6
7. მილანი 3 2 0 1 2:01 6
8. რომა 3 1 2 0 8:06 5
9. ლაციო 3 1 1 1 5:03 4
10. ჯენოა 3 1 1 1 6:06 4
11. ვერონა 3 1 1 1 2:02 4
12. სასუოლო 3 1 0 2 7:07 3
13. კალიარი 3 1 0 2 4:04 3
14. პარმა 3 1 0 2 4:05 3
15. სპალ 3 1 0 2 4:05 3
16. ბრეშა 3 1 0 2 4:05 3
17. უდინეზე 3 1 0 2 2:04 3
18. ფიორენტინა 3 0 1 2 4:06 1
19. ლეჩე 2 0 0 2 0:05 0
20. სამპდორია 3 0 0 3 1:09 0

ბომბარდირები: 5 - დ. ბერარდი (სასუოლო).

მომდევნო ტური
20 სექტემბერი: კალიარი-ჯენოა
21 სექტემბერი: უდინეზე-ბრეშა, იუვენტუსი-ვერონა, მილანი-ინტერი
22 სექტემბერი: სასუოლო-სპალ, ბოლონია-რომა, ლეჩე-ნაპოლი, სამპდორია-ტორინო, ატალანტა-ფიორენტინა, ლაციო-პარმა

ყოველდღიური სპორტული გაზეთი "ლელო"
451
მკითხველის კომენტარები / 0 /
მსგავსი ამბები
რუბრიკის სხვა სიახლეები
;