სერია A. III ტურის წინათქმა: ახალი სიგიჟეების მოლოდინში

ახალ სერია A-ში ჯერ მხოლოდ ორი ტურია ჩატარებული და უკვე ვნახეთ არაერთი გიჟური მატჩი. ამ ტურშიც იმავეს მოლოდინი გვაქვს. მით უმეტეს, საამისოდ ყველანაირი წინაპირობა არსებობს და ინტუიცია გვკარნახობს, რომ ნამდვილად არ მოვიწყენთ.

ტური იწყება „ფიორენტინასა“ და „იუვენტუსის“ ჯახით. კარგად ვიცით, როგორი დამოკიდებულებაა ფლორენციაში „იუვეს“ მიმართ. ასე რომ, განახლებული „ფიორენტინა“ არაფერს დათმობს. ძალიან საინტერსოა მათ რიგებში ფრანკ რიბერის ხილვა. მას უკვე ჰქონდა დებიუტი, მაგრამ წესით ნელ-ნელა უნდა მოუმატოს (თუკი შერჩა საამისო ენერგია) და ეს „ფიორენტინაზეც“ პოზიტიურად აისახება.

თავის მხრივ, „იუვენტუსი“ ყველა თამაშზე მოსაგებად გადის. წინა უქმეებზე „ბებერმა ქალბატონმა“ „ნაპოლი“ კი დაამარცხა (4:3), მაგრამ გუნდი ბევრმა გააკრიტიკა დაცვაში დაშვებული შეცდომების გამო. ალბათ, ეს ჯორჯო კიელინის ტრავმის ბრალიც იყო. ვეტერანი მცველი გუნდს კიდევ კარგა ხანს ვერ დაეხმარება.

სამაგიეროდ, გუნდთან ერთად იქნება მთავარი მწვრთნელი მაურიციო სარი, რომელსაც მწვავე პნევმონია ჰქონდა და რამდენიმე დღით ჰოსპიტალიზებულიც იყო. ექიმებმა მას 100 დღით აუკრძალეს აქტიური პროფესიული საქმიანობა, თუმცა სარი გაჯიუტდა, თან თავსაც გაცილებით უკეთ გრძნობს და აღარ აპირებს, დაელოდოს ამ 100 დღის გასვლას...

„ფიორენტინა“-“იუვენტუსის“ გარდა, პროგრამაშია „ნაპოლისა“ და „სამპდორიას“ შეხვედრა. „სამპამ“ ძალიან ცუდად დაიწყო ჩემპიონატი. გუნდი ორიდან ორ შეხვედრაში დამარცხდა. თავის მხრივ, „ნაპოლის“უმაღლესი მიზნები აქვს მიმდინარე ჩემპიონატში. კარლო ანჩელოტის გუნდმა განახლებულ „სან პაოლოზე“ უნდა ითამაშოს, მაგრამ... რად გინდა - გუშინ მწვრთნელმა სტადიონი მოინახულა და აღმოაჩინა, რომ... გასახდელები ჯერ კიდევ გვარიანად მოსაწესრიგებელია. კარლომ აღშფოთება ვერ დამალა...

დღის ბოლო შეხვედრაში კი „ინტერი“ ფავორიტის რანგში დაუხვდება „უდინეზეს“. ჯერჯერობით, ანტონიო კონტეს გაწვრთნილი გუნდი უდანაკარგოდ მიდის და ეცდება, ასევე გააგრძელოს.

კვირის მატჩებიდან უნდა გამოვარჩიოთ „რომას“ დაპირისპირება „სასუოლოსთან“. ერთად ვნახავთ, რა შეჰმატებს დედაქალაქურ კლუბს სომხეთის ეროვნული ნაკრების ლიდერი ჰენრიხ მხითარიანი.

„მილანმა“ სეზონი არაერთგვაროვნად დაიწყო. ამავე დროს, უძლიერესთა შორის დაბრუნებული „ვერონაც“ წაუგებელია. ასე რომ, კარგი თამაში უნდა გამოვიდეს რომეოსა და ჯულიეტას ქალაქში... 

იტალია. სერია A. III ტური

შაბათი, 14 სექტემბერი
ფიორენტინა-იუვენტუსი 17:00
ნაპოლი-სამპდორია 20:00
ინტერი-უდინეზე 22:45

კვირა, 15 სექტემბერი
ჯენოა-ატალანტა 14:30
ბრეშა-ბოლონია 17:00
პარმა-კალიარი 17:00
სპალ-ლაციო 17:00
რომა-სასუოლო 20:00
ვერონა-მილანი 22:45

ორშაბათი, 16 სექტემბერი
ტორინო-ლეჩე 22:45

1. ინტერი 2 2 0 0 6:01 6
2. იუვენტუსი 2 2 0 0 5:03 6
3. ტორინო 2 2 0 0 5:03 6
4. ლაციო 2 1 1 0 4:01 4
5. ჯენოა 2 1 1 0 5:04 4
6. ბოლონია 2 1 1 0 2:01 4
7. ვერონა 2 1 1 0 2:01 4
8. სასუოლო 2 1 0 1 5:03 3
9. პარმა 2 1 0 1 3:02 3
10. ნაპოლი 2 1 0 1 7:07 3
11 ატალანტა 2 1 0 1 5:05 3
12 მილანი 2 1 0 1 1:01 3
13. ბრეშა 2 1 0 1 1:01 3
14. უდინეზე 2 1 0 1 2:03 3
15. რომა 2 0 2 0 4:04 2
16. ფიორენტინა 2 0 0 2 4:06 0
17. სპალ 2 0 0 2 2:04 0
18. კალიარი 2 0 0 2 1:03 0
19. ლეჩე 2 0 0 2 0:05 0
20. სამპდორია 2 0 0 2 1:07 0

ბომბარდირები: 3 - დ. ბერარდი (სასუოლო).

ყოველდღიური სპორტული გაზეთი "ლელო"
202
მკითხველის კომენტარები / 0 /
მსგავსი ამბები
რუბრიკის სხვა სიახლეები
;