სერია A. XII ტურის მიმოხილვა: კიდევ კარგი, იგუაინი დააკავეს... 'ნაპოლიმ' ბოლომდე იბრძოლა [VIDEO]

სერია A-ს მთავარი შეხვედრა, რომელშიც "მილანი" და "იუვენტუსი" შეიბნენ, ბოლოსთვის მოვიტოვეთ, ჯერ კი დანარჩენი თამაშებით "გავხურდეთ", მით უმეტეს, სათქმელი ნამდვილად არის.

იტალიის ჩემპიონატის მორიგი ტური მართლაც რომ ზედრამატული მატჩით დაიწყო. "ნაპოლიმ" შეხვედრის ბოლოსღა გატეხა შმაგად მებრძოლი "ჯენოას" წინააღმდეგობა. თავდაპირველად მასპინძლები დაწინაურდნენ. კუამეს გოლის შემდეგ კოკისპირული წვიმა დაიწყო. სამსაჯო ბრიგადა იძულებული გახდა, შეხვედრა შეეჩერებინა...

უკვე მიმდინარეობდა მეორე ტაიმი და ბევრს აღარ ეგონა, თუ ნეაპოლელები ამ შეხვედრის გადარჩენას შეძლებდნენ. წვიმის გამო თამაში დაახლოებით 20 წუთით შეწყდა. რომ განახლდა, ნეაპოლელთა ცნობა შეუძლებელი იყო. ეს იმის მიუხედავად, რომ მინდორი აუზს უფრო ჰგავდა, ვიდრე ფეხბურთის მოედანს.
ჯერ შეცვლაზე შესულმა ფაბიან რუისმა გაათანაბრა.

თამაშის დასრულებას 4 წუთი აკლდა, როცა "ჯენოამ" ზეწოლას ვეღარ გაუძლო. ბირაგიმ საკუთარ კარში ჩაჭრა ბურთი. დიდი ალბათობით, აქვე გადაწყდა გენუელთა მთავარი მწვრთნელის, ივან იურიჩის ბედი. მას ახალი სამუშაოს ძიება მოუწევს. ქომაგებმა კი ზედმეტად რადიკალური ბანერი გამოფინეს და... სიკვდილიც კი უსურვეს კლუბის პრეზიდენტ ენრიკო პრეციოზის.

"ჩვენ განსაკუთრებული ხასიათი გამოვავლინეთ და ამან მოგვაგებინა ეს მატჩი", - თქვა ნეაპოლელთა დამრიგებელმა კარლო ანჩელოტიმ, ვინც იმის გამო გააკრიტიკეს, რომ ძირითადში არ დააწყებინა გოლის ავტორ ფაბიან რუისს და დრის მერტენსს.

"ინტერი" "ატალანტასთან" შეხვედრაში შერცხვა. ბერგამოელებმა სეზონის საუკეთესო შეხვედრა ჩაატარეს. "ინტერის" ფანებისთვის სუსტ ნუგეშად ის თუ გამოდგება, რომ მაურო იკარდიმ 11-მეტრიანი შეაგდო. სამაგიეროდ წითელი ბარათი მიიღო მარსელო ბროზოვიჩმა.

"რომამ" საფეხბურთო გაკვეთილი ჩაუტარა "სამპდორიას", მაგრად დაჩაგრა თამაშით, 4 გოლი გაუტანა და მხოლოდ 1 მიიღო. განსაკუთრებით კარგად ითამაშა სტეფან ელ შაარავიმ, ვინც დუბლი მიითვალა და ზოგადადაც გამორჩეული გახლდათ.

აქვე ვთქვათ, რომ "უდინეზეს" ყოფილ მთავარ მწვრთნელ ლუკას ველასკესს "ემპოლისთან" მარცხის შემდეგ კლუბის ხელმძღვანელობის მხრიდან ნდობის ვოტუმი ამოეწურა. უდინელებს კარგი შემადგენლობა ჰყავთ. შედეგისა კი რა გითხრათ...

როგორც მოსალოდნელი იყო, "იუვენტუსმა" ყველა საფეხბურთო კომპონენტში აჯობა "მილანს" და მორიგი ნაბიჯი გადადგა სკუდეტოსკენ. ჯერ იყო და, მარიო მანჯუკიჩმა აჯობა მილანელთა შვეიცარიელ მცველ რიკარდო როდრიგესს, რის შემდეგაც ბურთს თავით ბადეში მიუჩინა ადგილი.

"მილანი" ძირითადად კონტრშეტევებზე თამაშობდა. საუკეთესო შანსი მასპინძელს პირველი ტაიმის დასრულებამდე 4 წუთით ადრე ჰქონდა - ექსიუვენტინო გონსალო იგუაინმა პენალტი ვერ გაიტანა, რომელიც არბიტრმა პაოლო მაცოლენიმ ვიდეორეფერის დახმარებით მას შემდეგ დანიშნა, რაც მეჰდი ბენატიამ ხელით ითამაშა საკუთარ საჯარიმოში. "პიპიტას" დარტყმული ძელს მოხვდა.

მეორე ტაიმში თავისი გოლი შეაგდო კრიშტიანო რონალდომ. აღსანიშნავია, რომ ეს იყო პორტუგალიელი სუპერვარსკვლავის პირველი გოლი "სან სიროზე". თამაშის ბოლოს არბიტრის სიტყვიერი შეურაცხყოფისთვის მეორე ყვითელი ბარათი მიიღო იგუაინმა. მას რონალდო ამშვიდებდა, როცა არგენტინელი აშკარად გამოვიდა წყობიდან. კიდევ კარგი, დააკავეს, თორემ არბიტრს კარგი დღე არ დაადგებოდა და ვინძლო, კრიშტიანოსაც არ ასცდენოდა შარი...

ფროზინონე-ფიორენტინა 1:1
გოლები: 0:1 ბენასი (47), 1:1 პინამონტი (89)

ტორინო-პარმა 1:2
გოლები: 0:1 ჟერვინიო (9), 0:2 ინგლეზე (25), 1:2 ბაზელი (37)

სპალ-კალიარი 2:2
გოლები: 1:0 პეტანია (3), 2:0 ანტენუჩი (71), 2:1 პავოლეტი (73), 2:2 იონიცა (76)

ჯენოა-ნაპოლი 1:2
გოლები: 1:0 კუამე (20), 1:1 რუისი (62), 1:2 ბირასკი (86-საკ. კარში)



ატალანტა-ინტერი 4:1
გოლები: 1:0 ჰატებური (9), 1:1 იკარდი (47-პენ), 2:1 მანჩინი (62), 3:1 ჯიმშიტი (88), 4:1 გომესი (90+4)
გაძევება: ბროზოვიჩი (90+2. ატალანტა)

რომა-სამპდორია 4:1
გოლები: 1:0 ჟეზუში (19), 2:0 შიკი (59), 3:0 ელ შაარავი (72), 3:1 დეფრელი (89), 4:1 ელ შაარავი (90+3)

კიევო-ბოლონია 2:2
გოლები: 0:1 სანტანდერი (5), 1:1 მეჯორინი (20-პენ), 2:1 ობი (45), 2:2 ორსოლინი (56)

ემპოლი-უდინეზე 2:1
გოლები: 1:0 ზაიცი (41), 2:0 კაპუტო (51), 2:1 პუსეტო (81)
გამოუყენებელი პენალტი: დე პაული (80. უდინეზე)

სასუოლო-ლაციო 1:1
გოლები: 0:1 პაროლო (8), 1:1 ფერარი (15)

მილანი-იუვენტუსი 0:2
გოლები: 0:1 მანჯუკიჩი (8), 0:2 რონალდო (81)
გამოუყენებელი პენალტი: იგუაინი (41. მილანი)
გაძევება: იგუაინი (84. მილანი)

თ მ ფ წ ბ ქ
1. იუვენტუსი 12 11 1 0 26:8 34
2. ნაპოლი 12 9 1 2 26:13 28
3. ინტერი 12 8 1 3 22:10 25
4. ლაციო 12 7 1 4 18:14 22
5. მილანი 12 6 3 3 21:16 21
6. რომა 12 5 4 3 22:15 19
7. სასუოლო 12 5 4 3 20:17 19
8. ატალანტა 12 5 3 4 23:14 18
9. ფიორენტინა 12 4 5 3 18:10 17
10. ტორინო 12 4 5 3 17:15 17
11. პარმა 12 5 2 5 12:15 17
12. სამპდორია 12 4 3 5 16:15 15
13. კალიარი 12 3 5 4 12:16 14
14. ჯენოა 12 4 2 6 17:26 14
15. სპალ 12 4 1 7 11:19 13
16. ბოლონია 12 2 4 6 11:18 10
17. უდინეზე 12 2 3 7 11:18 9
18. ემპოლი 12 2 3 7 12:21 9
19. ფროზინონე 12 1 4 7 10:25 7
20. კიევო* 12 0 3 9 10:30 0
* - კიევოს დაკლებული აქვს 3 ქულა

ბომბარდირები: 9 - კშიშტოფ პიატეკი (ჯენოა); 8 - კრიშტიანო რონალდო (იუვენტუსი), ჩირო იმობილე (ლაციო); 7 - ლორენსო ინსინიე (ნაპოლი), დრის მერტენსი (ნაპოლი), მაურო იკარდი (ინტერი)

მომდევნო ტური
24 ნოემბერი: უდინეზე-რომა, იუვენტუსი-სპალ, ინტერი-ფროზინონე
25 ნოემბერი: პარმა-სასუოლო, ბოლონია-ფიორენტინა, ემპოლი-ატალანტა, ნაპოლი-კიევო, ლაციო-მილანი, ჯენოა-სამპდორია
26 ნოემბერი: კალიარი-ტორინო

ყოველდღიური სპორტული გაზეთი "ლელო"
687
მკითხველის კომენტარები / 0 /
მსგავსი ამბები
რუბრიკის სხვა სიახლეები
;