სერია A. XIV ტურის მიმოხილვა: ომი და მშვიდობა რომში, ანუ სანამ კონტე მოვა... [VIDEO]

სერია A-ს ლიდერმა "იუვენტუსმა" საგარეო გამარჯვება იზეიმა "ფიორენტინასთან". "იებმა" უპრინციპულეს მეტოქესთან თამაში ყოჩაღად დაიწყეს, მაგრამ მერე სათამაშო კლასმა თავისი გაიტანა.

პირველი გოლი ბენტანკურმა შეაგდო, ვინც დიბალას გადაცემა შეირგო. თამაშის დასრულებამდე 20 წუთით ადრე კიელინიმ გაიტანა კუადრადოს გამოზომილი ჩაწოდების შედეგად. წერტილი კი დასვა კრიშტიანო რონალდომ, ვისთვისაც ეს მე-10 გოლი იყო სერია A-ს მიმდინარე ბატალიებში. "ბებერი ქალბატონი" 40 ქულით დამაჯერებლად ლიდერობს იტალიურ მარათონს.

"როცა "ფიორენტინასთან" თამაშობ გასვლაზე, ფრთხილად უნდა იყო. ეს გუნდი საშინაო ასპარეზზე განსაკუთრებული მგზნებარებით იბრძვის გამარჯვებისთვის. ჩვენ დღეს ძალიან კარგად ვითამაშეთ. ჩვენ დიდი ჩემპიონების გუნდი ვართ", - თქვა ნამატჩევს ტურინელთა გურუ მასიმილიანო ალეგრიმ.

ჩემპიონთა ლიგის საგზურისთვის მებრძოლმა "მილანმა" მნიშვნელოვანი შეხვედრა მოიგო შინ, "პარმასთან". თავიდან სტუმრები დაწინაურდნენ, მაგრამ მერე ყველაფერი თავის ადგილას დადგა. ჯერ პატრიკ კუტრონემ ითავა მეგოლეობა გონსალო იგუაინის არყოფნაში, მერე კი ფრენკ კესიმ შეაგდო 11-მეტრიანის ნიშნულიდან.

"ჩვენ ერთხელაც გამოვავლინეთ ხასიათი და თამაშის შემოტრიალება შევძელით. ეს კარგია, მაგრამ თვალი არ უნდა დავხუჭოთ იმ შეცდომებზე, რომელიც გვქონდა", - თქვა მატჩის დასრულების შემდეგ ჯენარო გატუზომ, რომლის გუნდსაც თითოეული ქულა ლამის სისხლის ფასად უჯდება.

"ლაციო" მხოლოდ ფრეს გამორჩა აუტსაიდერ "კიევოსთან". ეს ქულა კი მოიპოვა ჩირო იმობილემ, ვინც გოლად კორეას გადაცემა აქცია. მანამდე კი "მფრინავი ვირები" უბერებელმა პელისიერმა დააწინაურა.

დიდებული სანახაობა ვიხილეთ რომში. ტურის ცენტრალურმა მატჩმა მოლოდინი ბოლომდე გაამართლა. თავიდან "ინტერი" დაწინაურდა. დ"ამბროზიოს პასი გოლად ბალდე კეიტამ გარდასახა. წამებით ადრე კი არბიტრმა ჯანლუკა როკიმ აშკარა 11-მეტრიანი არ დანიშნა მილანელთა კარში.

მეორე ტაიმი "რომამ" ყოჩაღად დაიწყო და ანგარიში გაათანაბრა. ჩენგიზ იუნდერმა დიდებულად "გაისროლა" მას შემდეგ, რაც კრისტანტეს გადაცემა მიიღო. მალევე მაურო იკარდიმ საგოლე თავური უთავაზა კუთხურიდან ჩამოწოდებულ ბურთს და "ინტერი" მეორედ გაიჭრა წინ.

"რომა" მაინც არ გატყდა. არბიტრმა ამჯერად ვიდეორეფერი ჩართო საქმეში და რომაელებს პენალტის შესრულების უფლება უბოძა. უმაღლესი საფეხბურთო სასჯელი ალექსანდრ კოლაროვმა აღასრულა. საბოლოოდ - 2:2.

აღსანიშნავია, რომ არბიტრმა ტექნიკური ზონიდან გააძევა "ინტერის" მწვრთნელი ლუჩანო სპალეტი, რომელიც ერთ დროს სწორედ "რომას" ედგა სათავეში.
ვრცელდება ინფორმაცია, რომ დღეს შესაძლოა თანამდებობა დაატოვებინონ "ჯალოროსის" მთავარ მწვრთნელ ეუსებიო დი ფრანჩესკოს და მის ნაცვლად გუნდი ანტონიო კონტეს ჩააბარონ. შეგახსენებთ, კონტე უმუშევარია მას შემდეგ, რაც "ჩელსი" დატოვა.


სპალ-ემპოლი 2:2
გოლები: 1:0 კურტიჩი (5), 1:1 კაპუტო (24), 1:2 კრუნიჩი (43), 2:2 კურტიჩი (66)
გაძევება: ციონეკი (49. სპალ)

ფიორენტინა-იუვენტუსი 0:3
გოლები: 0:1 ბენტანკური (31), 0:2 კიელინი (69), 0:3 რონალდო (79-პენ)

სამპდორია-ბოლონია 4:1
გოლები: 1:0 პრე (10), 1:1 პოლი (17), 2:1 კვალიარელა (25), 3:1 რამირესი (41), 4:1 კვალიარელა (68)

მილანი-პარმა 2:1
გოლები: 0:1 ინგლეზე (49), 1:1 კუტრონე (55), 2:1 კესი (71-პენ)



ფროზინონე-კალიარი 1:1
გოლები: 1:0 კასატა (14), 1:1 ფარიასი (77)
გაძევება: ბარელა (85. კალიარი)

ტორინო-ჯენოა 2:1
გოლები: 0:1 კუამე (36), 1:1 ანსალდი (45+2), 2:1 ბელოტი (45+5-პენ)
გაძევება: რომულო (28. ჯენოა)

კიევო-ლაციო 1:1
გოლები: 1:0 პელისიერი (25), 1:2 იმობილე (66)

რომა-ინტერი 2:2
გოლები: 0:1 კეიტა (37), 1:1 იუნდერი (51), 1:2 იკარდი (66), 2:2 კოლაროვი (73-პენ)



სასუოლო-უდინეზე 0:0

თ მ ფ წ ბ ქ
1. იუვენტუსი 14 13 1 0 31:8 40
2. ინტერი 14 9 2 3 27:12 29
3. ნაპოლი 13 9 2 2 26:13 29
4. მილანი 14 7 4 3 24:18 25
5. ლაციო 14 7 3 4 20:16 24
6. ტორინო 14 5 6 3 19:16 21
7. რომა 14 5 5 4 24:18 20
8. სასუოლო 14 5 5 4 21:19 20
9. პარმა 14 6 2 6 15:18 20
10. სამპდორია 14 5 4 5 21:17 19
11. ატალანტა 13 5 3 5 25:17 18
12. ფიორენტინა 14 4 6 4 18:13 18
13. კალიარი 14 3 7 4 13:17 16
14. ჯენოა 14 4 3 7 19:29 15
15. სპალ 14 4 2 8 13:23 14
16. უდინეზე 14 3 4 7 12:18 13
17. ემპოლი 14 3 4 7 17:25 13
18. ბოლონია 14 2 5 7 12:22 11
19. ფროზინონე 14 1 5 8 11:29 8
20. კიევო* 14 0 5 9 11:31 2
* - კიევოს დაკლებული აქვს 3 ქულა

ბომბარდირები: 10 - კშიშტოფ პიატეკი (ჯენოა), კრიშტიანო რონალდო (იუვენტუსი); 9 - ჩირო იმობილე (ლაციო); 8 - მაურო იკარდი (ინტერი); 7 - ლორენსო ინსინიე (ნაპოლი), დრის მერტენსი (ნაპოლი), ფრანჩესკო კაპუტო (ემპოლი), ფაბიო კვალიარელა (სამპდორია).

მომდევნო ტური
7 დეკემბერი: იუვენტუსი-ინტერი
8 დეკემბერი: ნაპოლი-ფროზინონე, კალიარი-რომა, ლაციო-სამპდორია
9 დეკემბერი: სასუოლო-ფიორენტინა, ემპოლი-ბოლონია, პარმა-კიევო, უდინეზე-ატალანტა, ჯენოა-სპალ, მილანი-ტორინო

ყოველდღიური სპორტული გაზეთი "ლელო"
546
მკითხველის კომენტარები / 0 /
მსგავსი ამბები
რუბრიკის სხვა სიახლეები
;