სერია A. XXVII ტურის მიმოხილვა: 'მილანის' ზედიზედ მეხუთე მოგება, გატუზოს კი წითელი [VIDEO]

სერია A-ს მორიგი ტური გახსნა “იუვენტუსმა”. პრაქტიკულმა ჩემპიონმა შანსი არ დაუტოვა “უდინეზეს”, ამ გუნდის კარში 4 გოლი შეაგდო და მისგან მხოლოდ ერთი გაუშვა.

მატჩის საუკეთესო მოთამაშე გახდა “იუვეს” ახალგაზრდა ფორვარდი მოისეს კინი, ვინც დუბლი მიითვალა და 11-მეტრიანი მოიპოვა. პენალტი ზუსტად შეასრულა ემრე ჯანმა.

წლებია, კინი უნიჭიერეს შემტევად ითვლება იტალიაში. მისი ნახვის საშუალება ქართველ გულშემატკივარსაც ჰქონდა ორიოდე წლის წინ, როცა თბილისში ევროშესარჩევი ციკლი ჩატარდა 17-წლამდელთა შორის.

ახლა კი “იუვე” იმედიანად ელოდება მადრიდის “ატლეტიკოს” ჩემპიონთა ლიგის პლეი ოფში. ეს იმის მიუხედავად, რომ პირველი თამაში ტურინელებს ძალიან არაკომფორტული ანგარიშით, 0:2 აქვთ წაგებული “ვანდა მეტროპოლიტანო”. ისიც არის, რომ მასიმილიანო ალეგრიმ ძირითადი შემადგენლობის ბევრი ფეხბურთელი დაასვენა, მათ შორის - კრიშტიანო რონალდო და მარიო მანჯუკიჩი. ესეც გარკვეული უპირატესობაა “ბებერი ქალბატონისთვის”.

“მილანმა” ზედიზედ მე-5 მატჩი მოიგო სერია A-ში. ამჯერად, ჯენარო გატუზოს შეგირდებმა “კიევო” დაამარცხეს. საიდუმლო არავისთვისაა, რომ ვერონული კლუბი ცალი ფეხით სერია B-შია და სასწაული უნდა მოხდეს, რომ გადარჩეს.

“მილანმა” ანგარიში ლუკას ბილიას დიდებული საჯარიმო დარტყმით გახსნა. აღსანიშნავია, რომ ეს იყო არგენტინელის პირველი გოლი ოქტომბრის შემდეგ. “კიევომ” ცოტა მოუმატა და პირველი ტაიმის დასრულებამდე ხუთიოდე წუთით ადრე პრერიმ ჰეტემაიმ ანგარიში გაათანაბრა, მაგრამ ფავორიტმა მაინც მოიგო. კშიშტოფ პიონტეკმა მორიგი გოლი შეაგდო და ბომბარდირთა დავაში კრიშტიანო რონალდოს დაეწია (თუმცა გუშინ ორივეს ფაბიო კვალიარელამ გადაუსწრო).
თამაშის ბოლოსკენ “მილანის” მთავარი მწვრთნელი გააძევეს. ის უხეში ფორმებით დაუპირისპირდა “კიევოს” ფორვარდ რიკარდო მეჯორინის. ამ მომენტისთვის უცნობია, რა სასჯელი დაეკისრება გატუზოს. არადა, მომდევნო უქმეებზე მილანური დერბია...

მიუხედავად იმისა, რომ ის გუნდთან ერთად არ იყო გადამწყვეტ მომენტში, “მილანმა” მაინც მოახერხა გამარჯვება და სამეულში ადგილი გაიმყარა.

პოლიტანოსა და გალიარდინის გოლებით “ინტერმა” საშინაო ასპარეზზე 2:0 მოუგო სპალ-ს. ეს დროებითი ხსნა მაინც იყო ლუჩანო სპალეტისთვის. “ინტერის” გამოცდილი დამრიგებლის თავზე უკვე კარგა ხანია, თავს იყრის შავი ღრუბლები. თანაც, ისევ აჯანყებულია გუნდის ლიდერი მაურო იკარდი, რომელიც, მისივე სიტყვებით, მხოლოდ იმ შემთხვევაში მოიხდის ბოდიშს, თუ აუხსნიან, რატომ გაათავისუფლეს კაპიტნობიდან...

“ნაპოლი” გასვლაზე აგებდა “სასუოლოსთან”, მაგრამ ლორენცო ინსინიემ გვიანი დარტყმით ქულა გადაურჩინა კარლო ანჩელოტის გუნდს. თამაში ძალიან თვალსასეირო გამოდგა და სადაც სამართალია, გოლები კიდევ უნდა გასულიყო...


იუვენტუსი-უდინეზე 4:1
გოლები: 1:0 კინი (11), 2:0 კინი (29), 3:0 ემრე ჯანი (67-პენ), 4:0 მატუიდი (71), 4:1 ლაზანია (85)

პარმა-ჯენოა 1:0
გოლი: 1:0 კუცკა (78)

კიევო-მილანი 1:2
გოლები: 0:1 ბილია (31), 1:1 ჰეტემაი (41), 1:2 პიონტეკი (57)

ბოლონია-კალიარი 2:0
გოლები: 1:0 პულგარი (34-პენ), 2:0 სორიანო (77)

ფროზინონე-ტორინო 1:2
გოლები: 1:0 პაგანინი (42), 1:1 ბელოტი (56), 1:2 ბელოტი (78)

ინტერი-სპალ 2:0
გოლები: 1:0 პოლიტანო (67), 2:0 გალიარდინი (77)

სამპდორია-ატალანტა 1:2
გოლები: 0:1 დ. საპატა (50), 1:1 კვალიარელა (67-პენ), 1:2 გოსენსი (77)

სასუოლო-ნაპოლი 1:1
გოლები: 1:0 ბერარდი (52), 1:1 ინსინიე (86)

ფიორენტინა-ლაციო 1:1
გოლები: 0:1 იმობილე (23), 1:1 მურიელი (61)

ორშაბათი, 11 მარტი
რომა-ემპოლი 23:30

1. იუვენტუსი 27 24 3 0 59:17 75
2. ნაპოლი 27 17 6 4 48:21 57
3. მილანი 27 14 9 4 41:23 51
4. ინტერი 27 15 5 7 40:22 50
5. რომა 26 12 8 6 49:36 44
6. ტორინო 27 11 11 5 35:23 44
7. ატალანტა 27 13 5 9 56:38 44
8. ლაციო 26 12 6 8 37:28 42
9. სამპდორია 27 11 6 10 44:35 39
10. ფიორენტინა 27 8 13 6 42:33 37
11. პარმა 27 9 6 12 29:40 33
12. სასუოლო 27 7 11 9 36:42 32
13. ჯენოა 27 7 9 11 32:42 30
14. კალიარი 27 6 9 12 23:39 27
15. უდინეზე 26 6 7 13 22:36 25
16. სპალ 27 5 8 14 23:41 23
17. ემპოლი 26 5 7 14 33:51 22
18. ბოლონია 27 4 9 14 22:40 21
19. ფროზინონე 27 3 8 16 20:51 17
20. კიევო* 27 1 10 16 20:53 10
* - კიევოს დაკლებული აქვს 3 ქულა

ბომბარდირები: 20 - ფაბიო კვალიარელა (სამპდორია); 19 - კრიშტიანო რონალდო (იუვენტუსი), კშიშტოფ პიონტეკი (ჯენოა/მილანი); 17 - დუვან საპატა (ატალანტა); 14 - არკადიუშ მილიკი (ნაპოლი); 13 - ჩირო იმობილე (ლაციო); 12 - ფრანჩესკო კაპუტო (ემპოლი).

მომდევნო ტური
15 მარტი: კალიარი-ფიორენტინა
16 მარტი: სასუოლო-სამპდორია, სპალ-რომა, ტორინო-ბოლონია
17 მარტი: ჯენოა-იუვენტუსი, ატალანტა-კიევო, ემპოლი-ფროზინონე, ლაციო-პარმა, ნაპოლი-უდინეზე, მილანი-ინტერი

674
მკითხველის კომენტარები / 0 /
მსგავსი ამბები
რუბრიკის სხვა სიახლეები
;