სერია A. XXXII ტურის მიმოხილვა: გატუზოს აღსარება და გადადებული სკუდეტო [VIDEO]

სერია A-ს მორიგი ტური სენსაციით დაიწყო. მართლაცდა, რა შემადგენლობითაც უნდა თამაშობდეს “იუვენტუსი”, ის მაინც ფავორიტია სპალ-თან შეხვედრაში. მასიმილიანო ალეგრი არ მოერიდა ექსპერიმენტებს და შედეგად მიიღო ის, რომ ნამატჩევს მასპინძლებმა 3 ქულით დატოვეს მინდორი...

...არადა, “იუვენტუსს” ქულაც რომ მოეპოვებინა, ჩემპიონობას ინაღდებდა. პირველი ტაიმის დასრულებამდე 15 წუთით ადრე მოიზეს კინმა ჟოაო კანსელოს გადაცემით ანგარიში გახსნა. მეორე ტაიმში მასპინძლები უკეთ ათამაშდნენ და კევინ ბონიფაციმ ანგარიში გაათანაბრა. გამარჯვების გოლი კი ვეტერანმა სერჯო ფლოკარიმ შეაგდო თამაშის დასრულებამდე 16 წუთით ადრე.

“ჩვენ შეგვეძლო, ამ შეხვედრაში ძირითადი შემადგენლობით გამოვსულიყავით და ამ შემთხვევაში ალბათ მოვიგებდით. ამ მოგებით კი გავინაღდებდით სკუდეტოს, მაგრამ ნუ დაგვავიწყდება, რომ ამ მომენტისთვის ჩემპიონთა ლიგა უფრო მნიშვნელოვანია. ჩვენ ხომ “აიაქსთან” გველის შეხვედრა”, - თქვა თამაშის დასრულების შემდეგ “იუვენტუსის” დამრიგებელმა მასიმილიანო ალეგრიმ.

როგორც იქნა, გამოიღვიძა “რომამ”. ჩემპიონთა ლიგაზე მოხვედრის შანსი რომ შეენარჩუნებინა, კლაუდიო რანიერის გუნდს მხოლოდ გამარჯვება აძლევდა ხელს “უდინეზესთან” მატჩში. მასპინძლებმა 3 ქულა მძიმე ბრძოლაში მოიპოვეს, ერთადერთი გოლი ედინ ჯეკომ შეაგდო.

ტურის ცენტრალურ შეხვედრაში “მილანმა” მოუგო “ლაციოს”. თამამად შეიძლება ითქვას, რომ ეს იყო თამაში 6 ქულისთვის. ორივე გუნდი ჩემპიონთა ლიგის საგზურის მოსაპოვებლად იბრძვის. ერთადერთი გოლი მას შემდეგ გავიდა, რაც “ლაციალეს” საჯარიმოში თამაშის წესი დაირღვა შეტევაში ჩართული მატეო მუსაკიოს წინააღმდეგ. 11-მეტრიანი ზუსტად შეასრულა ფრანკ კესიმ. ვიხილეთ გვარიანი გაწევ-გამოწევაც...

“ძალიან ბევრი ვირბინე იმის გამო, რომ ფეხბურთელებს შორის დაძაბულობა განმემუხტა. იმდენი ვირბინე, რომ ბარძაყის კუნთი დამეჭიმა. ფეხბურთელები ერთმანეთს უცენზურო სიტყვებით მიმართავდნენ. მთავარია, ყველაფერი მინდორზე დარჩეს. ადრე ასეთი ჩხუბები ჩემში ადრენალინის მომატებას იწვევდა. ახლა ყველაფერს სხვა თვალით ვუყურებ. ძალიან ბებერი ვარ ჩხუბისთვის. “ლაციოსთან” თამაში ძალიან რთულია. ეს გუნდი ძლიერია ფიზიკურად და ტექნიკურად. ჩვენ მოვიგეთ და მინდა, ბიჭებს მივულოცო! მათ მომავალ შეხვედრებში კლუბის სახელისთვის უნდა იბრძოლონ და არა ჩემთვის”, - თქვა “მილანის” მთავარმა მწვრთნელმა ჯენარო გატუზომ.

გრეგუარ დეფრელისა და ფაბიო კვალიარელას (ერთხელაც დაამტკიცა, რომ წლები ვერაფერს აკლებს და დიდებულ ფორმაშია) გოლებით “სამპდორიამ” გენუის დერბი მოუგო “ჯენოას”.

ცენტრალური მცველის, კალიდუ კულიბალის დუბლითა და არკადიუშ მილიკის გოლით “ნაპოლიმ” გასვლაზე მოუგო დაძირულ “კიევოს” და “იუვენტუსს” საჩემპიონო ზეიმი, სავარაუდოდ, მომავალი კვირისთვის გადაუდო.
ალეკო კაკაურიძე

სპალ-იუვენტუსი 2:1
გოლები: 0:1 კინი (30), 1:1 ბონიფაცი (49), 2:1 ფლოკარი (74)

რომა-უდინეზე 1:0
გოლი: 1:0 ჯეკო (67)

მილანი-ლაციო 1:0
გოლი: 1:0 კესი (79-პენ)

ტორინო-კალიარი 1:1
გოლები: 1:0 ძაძა (52), 1:1 პავოლეტი (78)
გაძევება: ძაძა (73. ლაციო), ლუკ. პელეგრინი (82. კალიარი), ბარელა (90+5. კალიარი)

სამპდორია-ჯენოა 2:0
გოლები: 1:0 დეფრელი (3), 2:0 კვალიარელა (53-პენ)
გაძევება: ბირასკი (51. ჯენოა)

სასუოლო-პარმა 0:0
გამოუყენებელი პენალტი: ჩერავოლო (40. პარმა)

კიევო-ნაპოლი 1:3
გოლები: 0:1 კულიბალი (16), 0:2 მილიკი (64), 0:3 კულიბალი (81), 1:3 ჩესარი (90)

ფროზინონე-ინტერი 1:3
გოლები: 0:1 ნაინგოლანი (19), 0:2 პერიშიჩი (35-პენ), 1:2 კასატა (61), 1:3 ვესინო (90+4)

ფიორენტინა-ბოლონია 0:0

ორშაბათი, 15 აპრილი
ატალანტა-ემპოლი 22:30

თ მ ფ წ ბ ქ
1. იუვენტუსი 32 27 3 2 65:22 84
2. ნაპოლი 32 20 7 5 61:28 67
3. ინტერი 32 18 6 8 50:26 60
4. მილანი 32 15 10 7 46:30 55
5. რომა 32 15 9 8 57:45 54
6. ატალანტა 31 15 7 9 64:41 52
7. ტორინო 32 12 14 6 41:29 50
8. ლაციო 31 14 7 10 44:33 49
9. სამპდორია 32 14 6 12 53:41 48
10. ფიორენტინა 32 8 16 8 46:39 40
11. სასუოლო 32 8 13 11 46:51 37
12. კალიარი 32 9 10 13 31:44 37
13. სპალ 32 9 8 15 30:45 35
14. პარმა 32 9 8 15 33:50 35
15. ჯენოა 32 8 10 14 35:51 34
16. უდინეზე 31 8 8 15 30:44 32
17. ბოლონია 32 7 10 15 31:47 31
18. ემპოლი 31 7 7 17 40:59 28
19. ფროზინონე 32 5 8 19 26:59 23
20. კიევო* 32 1 11 20 22:67 11
* - კიევოს დაკლებული აქვს 3 ქულა

ბომბარდირები: 22 - კვალიარელა (სამპდორია); 21 - პიონტეკი (მილანი); 20 - დ. საპატა (ატალანტა); 19 - რონალდო (იუვენტუსი); 17 - მილიკი (ნაპოლი).

გამოტოვებული მატჩი

17 აპრილი: ლაციო-უდინეზე

მომდევნო ტური
20 აპრილი: პარმა-მილანი, ბოლონია-სამპდორია, კალიარი-ფროზინონე, ემპოლი-სპალ, ჯენოა-ტორინო, ლაციო-კიევო, უდინეზე-სასუოლო, იუვენტუსი-ფიორენტინა, ინტერი-რომა
22 აპრილი: ნაპოლი-ატალანტა

ყოველდღიური სპორტული გაზეთი "ლელო"
328
მკითხველის კომენტარები / 0 /
მსგავსი ამბები
რუბრიკის სხვა სიახლეები
;