სერია A. XXXV ტურის მიმოხილვა: 'იუვე' რონალდომ იხსნა, 'რომამ' და 'ინტერმა შანსები შეიცოტავეს [VIDEO]

სერია A-ს მორიგი ტური ტურინული დერბით გაიხსნა. “იუვენტუსი” საკუთარ მოედანზე “ტორინოს” ეთამაშა და სკუდეტოგანაღდებული - წაგებას გადაურჩა. “ბებერი ქალბატონი” კრიშტიანო რონალდოს თავურმა იხსნა.

“ტორინო” ჩემპიონთა ლიგაზე გასასვლელად იბრძვის. მათთვის ამ სამ ქულას “ოქროს ფასი” ჰქონდა. მოიგებდნენ კიდეც, რომ არა რონალდოს კიდევ ერთი გოლი.

თამაშის შემდეგ “იუვენტუსის” თავკაცმა მასიმილიანო ალეგრიმ თქვა: “რონალდო დიდებული იყო. ის უნიკალური ფეხბურთელია და, დარწმუნებული ვარ, კიდევ რამდენიმე წელი სულ თავისუფლად ითამაშებს. მისმა გოლმა მარცხი აგვარიდა. რა თქმა უნდა, გვქონდა შეცდომები, მაგრამ ვფიქრობ, წაგებას არ ვიმსახურებდით”.

“ინტერმა”, ჰაერივით რომ სჭირდებოდა ქულები, სტუმრად 0:0 ითამაშა “უდინეზესთან”. თავის მხრივ, უდინელები უძლიერესთა შორის ადგილის შესანარჩუნებლად იბრძვიან. “ნერაძურის” რამდენიმე მომენტი კი ჰქონდა, მაგრამ ვერ შეაგდო.

ჩემპიონთა ლიგაზე გასვლას ძალიან მიუახლოვდა “ატალანტა”. ბერგამოელებმა მორიგი დიდებული მატჩი ჩაატარეს და “ლაციოს” რომში აუგეს ანდერძი. მორიგი გოლი შეაგდო დუვან საპატამ. ასევე გაიტანეს კასტანიემა და “ლაციალეს” მცველმა ვოლასმა (საკუთარ კარში).

“რომას” ჰაერივით სჭირდებოდა 3 ქულა და იგებდა კიდეც “ჯენოასთან” გასვლით შეხვედრას, მაგრამ სულ ბოლოს რომეროს გოლმა რომაელები ძალიან დაამწუხრა და შეიძლება, ჩემპიონთა ლიგაზე ვეღარც გავიდნენ. ერთადერთი გოლი სტუმართაგან ელ შაარავიმ შეაგდო. სხვათა შორის, “ჯენოამ” მთლად ბოლო წამზე პენალტი ვერ გამოიყენა.

ლევან მჭედლიძის “ემპოლიმ” (ოღოდ, მჭედლიძის გარეშე) შინ 1:0 მოუგო “ფიორენტინას” და სერია A-ში დარჩენის შანსები შეინარჩუნა.

ყოველდღიური სპორტული გაზეთი "ლელო"
448
მკითხველის კომენტარები / 0 /
მსგავსი ამბები
რუბრიკის სხვა სიახლეები
;