სიახლე: ვერის ბაღის დარბაზში ბასკონიას აკადემია გაიხსნება

"ბასკონიას" კემპი 14 აპრილს დასრულდა. დახურვის ცერემონიალს საქართველოს კალათბურთის ფედერაციისა და "ბასკონიას" ხელმძღვანელებთან ერთად სპორტისა და კულტურის მინისტრის მოადგილე, შალვა გოგოლაძე დაესწრო. იგი კემპის მონაწილეებს მიესალმა და სასიხარულო ამბავი ამცნო:

"უკვე გარკვეულია, რომ სახელმწიფოს მიერ ვერის ბაღის საკალათბურთო კომპლექსი კალათბურთის ეროვნულ ფედერაციას გადაეცემა. უახლოეს მომავალში ამ დარბაზში "ბასკონიას აკადემია" გაიხსნება და ნებისმიერ ქართველ მოზარდს შეეძლება ესპანელ სპეციალისტებთან მთელი სეზონის განმავლობაში ვარჯიში".

კალათბურთის მოყვარულთათვის მეტად სასიამოვნო ამბავია. "ბასკონიას აკადემია" უკვე სექტებრიდან დაიწყებს ფუნქციონირებას. ამ საკითხზე ახლო მომავალში ვრცლად მოგითხრობთ, მანამდე კი შეგვიძლია სიხარულით აღვნიშნოთ, რომ ვერის ბაღს დიდი კალათბურთი უბრუნდება - სუპერლიგის მატჩები ვერაზე გაიმართება.

ეს სწორედ ის ადგილია, სადაც ლეგენდარული ოთარ ქორქიას საქომაგოდ დადიოდა ხალხი, 1960 წელს კი ჩემპიონთა თასის ნახევარფინალური მატჩი გაიმართა რიგის სკა-სა და თბილისის "დინამოს" შორის.

მაშინ დარბაზს შუშის გადახურვა ჰქონდა. შემდეგ ლითონის სახურავით შეიცვალა, თუმცა ხელის შევლება მაინც სჭირდება. "ხელის შევლება" რბილი ნათქვამია - 2015 წელს გამართული ევროპის ახალგაზრდული ფესტივალისთვის კი შერემონტდა, მაგრამ კვლავ ბევრი რამაა მოსაწესრიგებელი.

695
მკითხველის კომენტარები / 0 /
მსგავსი ამბები
რუბრიკის სხვა სიახლეები