სიმბოლურები, გოლები, სკანდალები და რეკორდი [VIDEO]

განვლილი საფეხბურთო კვირა ქართველი ფეხბურთელებისთვის მრავალფეროვანი გამოდგა.

რამდენიმემ გოლი გაიტანა, ზოგიერთი ტურის სიმბოლურ ნაკრებში დაასახელეს, იყო შეცდომაც, რის გამოც ჩვენებურის გუნდმა წააგო, ერთი ჩვენებური სერიოზულ შარში გაეხვია, მეორემ კი კლუბის რეკორდი დაამყარა.

ვფიქრობთ, საინტერესო უნდა იყოს გასული კვირის ყველაზე მნიშვნელოვანი მოვლენების მიმოხილვა. ზოგიერთი სანაკრებო ჭრილშიც საინტერესოა.

4 გოლი და ქართველთა
ლიდერობა

ესპანური ლა ლიგა 2-ის 35-ე ტურში "სარაგოსამ" "რაიო ვალეკანოსთან" 1:2 წააგო. წაგებულებიდან ერთადერთი გოლი გიორგი პაპუნაშვილმა გაიტანა - შეცვლაზე შესულმა ქართველმა ეს 89-ე წუთზე, კურიოზულ ვითარებაში მოახერხა და ამაში მეტოქის მეკარეც დაეხმარა.

ქართული გოლი ვენურ დერბიშიც გავიდა. ავსტრიის ბუნდესლიგის 30-ე ტურში "აუსტრიამ" გიორგი ქვილითაიას "რაპიდს" უმასპინძლა და 0:4 დამარცხდა. საქართველოს ნაკრების თავდამსხმელი მოედანზე 72-ე წუთზე გამოჩნდა და ერთ წუთში მეტოქის კარი აიღო.

ალბანეთში "კუკესიმ" შინ უშუალო კონკურენტი, ტირანის "პარტიზანი" 4:0 დაამარცხა. მატჩის მეორე გოლი ირაკლი ძარიამ გაიტანა.

ქართველმა თავი ესტონურ ლიგაშიც გამოიჩინა - "ფლორა" 1:2 დამარცხდა "ლევადიასთან" და მესამე ადგილზეა. წაგებულთაგან ეს ერთადერთი გოლი ქართველმა ნახევარმცველმა ზაქარია ბეგლარიშვილმა პენალტით გაიტანა.

გოლები არ გაუტანიათ, მაგრამ ლატვიის ვირსლიგაში (უმაღლესი ლიგა) ქართველების "რიგას ფს" გალიდერდა - ლაშა შერგელაშვილმა და ბექა ვაჩიბერაძემ "იელგავასთან" მოგებული (3:0) მატჩი სრულად ჩაატარეს. ცხადია, ლატვიის ჩემპიონატი განსაკუთრებული დონით არ გამოირჩევა, მაგრამ ლიდერ გუნდში ნაკრების წევრისა და კანდიდატის თამაში მაინც მნიშვნელოვანია.

ხუთნი სიმბოლურში

Football24.ua-მ უკრაინის პრემიერლიგის 27-ე ტურის სიმბოლურ ნაკრებში სანდრო კობახიძე შეიყვანა ამით და "ვორსკლას" ქართველ ნახევარმცველს ლუგანსკის "ზორიასთან" გასვლაზე მოგებაში (3:0) შეტანილი წვლილი დაუფასეს.

ყაზახეთის პრემიერლიგაში ჯაბა კანკავას გარჯა აღიარეს (კანკავასა და კობახიძეზე უფრო ვრცლად მე-4 გვერდზე წაიკითხავთ). განვლილ 5 ტურში საქართველოს ნაკრების კაპიტანი უკვე მეორედ მოხვდა სიმბოლურ ნაკრებში.

გიორგი ლორიას მახაჩყალის "ანჟი" რუსული პრემიერლიგის 26-ე ტურში სანქტ-პეტერბურგში "ზენიტთან" 0:1 დამარცხდა. ამის მიუხედავად, ცჰამპიონატ.ცომ-მა 26-ე ტურის სიმბოლურ ნაკრებში საქართველოს ნაკრების მეკარე შეიყვანა - ინტერნეტგამოცემის ახსნით, ქართველმა მეკარემ დაღესტნელები უფრო დიდი ანგარიშით მარცხისგან იხსნა.

ალბანეთის სუპერლიგის 29-ე ტურის შემდეგ სიმბოლურ ნაკრებში მოხვდა ირაკლი ძარიაც, თან ის ორმა გამოცემამ, "ვიპსპორტმა" და "პანორამამ" დააფასა. ალბანეთის სუპერლიგაში ჩატარებულ 11 შეხვედრაში 29 წლის ქართველს ეს აღიარება მეოთხედ ხვდა წილად.

საბა კვირკველია რუსულ სიმბოლურს გაუშინაურდა და 26 ტურში იქ უკვე მეცხრედ მოხვდა. ბოლო უქმეებზე მისმა "ლოკომოტივმა" თანაქალაქელი "დინამო" 4:0 გაანადგურა. საქართველოს ნაკრების ცენტრალური მცველი საუკეთესოებში რუსფოოტბალლ.ინფო-მ შეიყვანა.

"რკინიგზელებმა "დინამოს" შანსი არ დაუტოვეს და ოთხბურთიანი სხვაობით გაანადგურეს. თან ისე, რომ მომენტიც არ შეაქმნევინეს. "დინამო" ვითარების შეცვლას ცდილობდა, მაგრამ "ლოკომოტივის" ცენტრალურმა მცველებმა მეტოქეს სერიოზული მომენტის შექმნის შანსი არ მისცეს. ხორვატი ვედრან ჩორლუკაც კარგი იყო, მაგრამ ზედმეტად ჯარიმდებოდა. რკინიგზელებში ყველაზე საიმედოდ საბა კვირკველია გამოიყურებოდა" - წერს გამოცემა.

ხუთი ფეხბურთელი სხვადასხვა ქვეყნის სიმბოლურ ნაკრებში საკმაოდ კარგი მაჩვენებელია. თანაც, მათ შორის არიან მეკარე, მცველი და სამი ნახევარმცველი.
უკრაინის პრემიერლიგის 27-ე ტურის ცენტრალურ მატჩში დათა ხოჭოლავას "შახტარმა" უშუალო კონკურენტ კიევის "დინამოსთან" წააგო - 0:1.

ეს ერთადერთი გოლი კიეველებმა ქართველი მცველის შეცდომით გაიტანეს. ამის მიუხედავად, გულშემატკივრების გამოკითხვაში 25 წლის მცველი დონეცკელთა შემადგენლობაში მაინც საუკეთესოდ დაასახელეს.

კვირის სკანდალი

7 აპრილს, დონეცკის "ოლიმპიკმა" ოდესის "ჩერნომორეცთან" 1:3 წააგო და უკრაინაში გარიგებული თამაშების გამო, მორიგი სკანდალი აგორდა. მაშინ მედიაში გაჩნდა მინიშნებები, რომ ეს სუფთა მატჩი არ იყო, რადგან დონეცკელთა მცველები ერთმანეთის მიყოლებით ბავშვურ შეცდომებს უშვებდნენ.

"ოლიმპიკის" პრეზიდენტმა ვლადისლავ გელზინმა ხელი ორი მოთამაშისკენ გაიშვირა - ერთი მათგანი თემურ ფარცვანიაა, მეორე კი - კონგოელი ვლადის ემერსონი.

ისინი უკრაინის პრემიერლიგის ბოლო ტურში "ოლექსანდრიასთან" (0:0) შეხვედრის განაცხადშიც ვერ მოხვდნენ. მომხდარზე ჯერ ფარცვანიას კომენტარი არ გაუკეთებია.

გამეორებული რეკორდი

გურამ კაშიამ არნემის "ვიტესის" რეკორდი გაიმეორა. ქართველი მცველი ჰოლანდიურ კლუბში 2010 წელს თბილისის "დინამოდან" გადავიდა, ერედივიზიეს ბოლო ტურში კი როტერდამის "სპარტასთან" მისი ფორმით 242-ე შეხვედრა ჩაატარა.

აქამდე 242 მატჩი მხოლოდ ტეო იანსენს ჰქონდა ჩატარებული, რომელიც ბოლო წლებში არნემელთა სპორტული დირექტორი გახლდათ. ამგვარად, კაშიამ იანსენის რეკორდი გაიმეორა. შემდეგ ტურში, თუ ხელი არაფერმა შეუშალა და "ალკმაართან" სათამაშოდ მოედანზე გავა, კაშია "ვიტესის" ყველა დროის რეკორდსმენი გახდება.

"ძალიან ამაყი ვარ, რომ რეკორდსმენთა სიაში მოვხვდი. ფეხბურთი ყოველთვის ჩემი ცხოვრება იყო, გულმოდგინედ ვშრომობ, რომ შემდეგშიც ისევე ვითამაშო, როგორიც შემიძლია.

ეს მძიმე შრომა ყოველდღიურად ფასდება. თითქმის მთელი ჩემი კარიერა აქ, "ვიტესში" გავატარე. ჰოლანდიურ კლუბში ჩემი ეს მიღწევა ძალიან მემაყება! 8 სეზონში 8 მწვრთნელის ხემძღვანელობით თამაშების 99%-ის ჩატარება მოვახერხე! გარკვეულწილად, ეს არის ჩემი მენტალიტეტის დამსახურება! მადლობა ჩემს და "ვიტესის" გულშემატკივარს!" - ასე გამოეხმაურა რეკორდის გამეორებას საქართველოს ნაკრების მცველი საკუთარ ფეისბუქგვერდზე.

ერთა ლიგის მოახლოებამდე სანაკრებო ჭრილში ფეხბურთელების განხილვა პულსზე ხელის დაჭერასავით არის. მთლიანობაში, ქართული ლეგიონისთვის წლევანდელი სეზონი ცუდად არ დაიწყო და იმედიანად ვიყოთ - ჩვენნაირი ფეხბურთელები ყაზახებს და ლატვიელებს ნამდვილად არ ჰყავთ. მთავარია, საუკეთესოები სანაკრებო მატჩებისთვის ფორმაში იყვნენ.

ყოველდღიური სპორტული გაზეთი "ლელო"
1215
მკითხველის კომენტარები / 0 /
მსგავსი ამბები
რუბრიკის სხვა სიახლეები
;