[სიმბოლური ნაკრები, VIDEO] ეროვნული ლიგა. XIV ტური. ლაშა შინდაგორიძე მეშვიდედ 'ლელოს' სიმბოლურ ნაკრებში! ყველას ერთ ქვაბში ვერ მოვხარშავთ...

თამამად შეიძლება ითქვას, რომ ქართულ ფეხბურთში საგანგებო მდგომარეობაა - ახალი სკანდალი, ახალი შფოთი...

ფეხბურთის ფედერაციის პრეზიდენტის პრესკონფერენციამ, ალბათ, ყველა დაარწმუნა, რომ "საგანგებო მდგომარეობა" მთლად უმართებულო შეფასება არ უნდა იყოს. ლევან კობიაშვილის ფრაზებში იკითხებოდა, რომ ფეხბურთის ფედერაციამ უფრო მეტი იცის, ვიდრე ამბობს...

მაგრამ ერთია, შენთვის რაღაც "იცოდე" და მეორეა - ფაქტები. ვფიქრობთ, ფეხბურთის ფედერაციას ეს ფაქტებიც აქვს და ვინ იცის, უფრო დიდი სკანდალი წინ გველოდება...

ცხადია, ჩვენც ბევრ რამეს ვხედავთ, ბევრი რამ გვესმის, მაგრამ მედია აპრიორი ხელს ვერავის დაადებს, მაშინაც კი, თუ ხედავს, რომ მეკარე ბურთზე ხტება, მაგრამ ხელს არ სწევს მის მოსაგერიებლად...

"ძალიან საეჭვო", "უცნაური" - ასეთ შეფასებებს ხშირად წაიკითხავთ ჩვენს მიმოხილვებში, მაგრამ ამის იქით ვერ წავალთ. ვისაც სურს და ევალება, შეუძლია, დაინტერესდეს...

"საგანგებო მდგომარეობა" და ჩვენი ტრადიციული მიმოხილვა დღეს რაღაც ვერ გამოდის ერთად. არის მომენტი, როცა თავში არაფერი მოდის სხვა, გარდა იმისა, რაც მოხდა. ხოლო რაც მოხდა, ამას ეს ორი დღეა ვწერთ და ისე ვატყობთ, კიდევ მოგვიწევს წერა...

მაგრამ ყველას ერთ ქვაბში ვერ მოვხარშავთ. თუ ვიღაცამ ნამუსზე ხელი აიღო, ვფიქრობთ, უფრო ბევრნი არიან ისინი, ვინც პატიოსნად თამაშობენ და ღირსები არიან, გამოვარჩიოთ.

ასეთი ამბები რომ გესმის კაცს, ძალაუნებურად ფიქრობ - აქვს კი აზრი ამ მიმოხილვებს, ამ სიმბოლურ ნაკრებებს?! ვფიქრობთ, აქვს. და აქვს სწორედაც იმათ გამო, ვინც მართლა პატიოსნად ღვრის ოფლს ჩვენს მოედნებზე...

დღეს კი, იმედია, გვაპატიებს მკითხველი, თუ XIV ტურს მხოლოდ სიმბოლური ნაკრებით შევაჯამებთ:

ლაშა შინდაგორიძე: მე კი არა, საბურთალომ მოიგო!

ლაშა შინდაგორიძე მეშვიდედ მოხვდა მიმდინარე ჩემპიონატის ტურის სიმბოლურ ნაკრებში. ეროვნული ლიგის გასულ უქმეებზე მან კარიერის ერთ-ერთი საუკეთესო თამაში ჩაატარა - "საბურთალოს" თავდამსხმელმა თბილისის "დინამოსთან" პრინციპულ შეხვედრაში ერთმანეთზე ლამაზი გოლებით დუბლი შეასრულა და თავისი გუნდის გამარჯვებაში (2:0) ლომის წილი დაიდო.

25 წლის შემტევი ამ დუბლით სათავეში ჩაუდგა (9 გოლი) ბომბარდირთა დავას და თითო გოლი უსწრებს ჯაბა უგულავასა ("სიონი") და ბუდუ ზივზივაძეს ("ტორპედო"), რომელმაც ასევე დუბლი შეასრულა "რუსთავთან" მატჩში.

შინდაგორიძემ თბილისური დერბი შეაფასა და საკუთარ გოლებზეც ილაპარაკა: "მეტოქე თბილისის "დინამო" იყო და აქედან გამომდინარე, რთულ თამაშს ველოდით. პირველ ტაიმში გოლები არ გასულა და იყო იმის ალბათობაც, რომ მატჩი ფრედ დასრულებულიყო. თუმცა, მეორე ნახევარში ტემპს მოვუმატეთ და ღირსეულ გამარჯვებას მივაღწიეთ.

რაც შეეხება ჩემს გოლებსა და ბომბარდირობას, რა თქმა უნდა, სასიამოვნოა, რომ "საბურთალომ" ჩემი დუბლით მოიგო, მაგრამ ეს მთლიანად ფეხბურთელების დამსახურებაა. მიხარია, რომ ბომბარდირთა დავას ვლიდერობ, თუმცა მთავარია, გუნდმა პროგრესი გააგრძელოს და სასურველი შედეგი აჩვენოს", - ამბობს შინდაგორიძე.

804
მკითხველის კომენტარები / 0 /
მსგავსი ამბები
რუბრიკის სხვა სიახლეები
;