[სიმბოლური ნაკრები] ეროვნული ლიგა. VII ტური. შეუდარებელი შინდაგორიძე და შენგელია, მშრალი ჰამზიჩი, დუბლი შეცვლაზე და რომ არა კოხრეიძე...

* ზედიზედ მესამე მატჩია, "ჩიხურა" გოლს არ უშვებს და ამ სამ მატჩში მოპოვებული 7 ქულა, თანაგუნდელებთან ერთად, 31 წლის ბოსნიელი მეკარის, დინო ჰამზიჩის დიდი დამსახურებაცაა...

* ანალოგიური შედეგი აქვს "ტორპედოსაც", სადაც არა მხოლოდ ამ კლუბის, არამედ, საერთოდ, ეროვნული ლიგის ერთ-ერთი საუკეთესო მცველი, 26 წლის მამუკა კობახიძე მართლაც რომ დამაჯერებლად ასპარეზობს...

* 28 წლის ლევან კაკუბავამ თავისი ახალი გუნდის მაისურით პირველი გოლიც გაიტანა და დაცვაშიც საიმედოდ მოქმედებდა...

* იგივე უნდა ითქვას 20 წლის ლუკა ლაკვეხელიანზეც - ერთ ეპიზოდში გუნდი აშკარა გოლს რომ გადაარჩინა...

* ჩემპიონატის დაწყებიდან 7 ტურია გასული და ორი ფეხბურთელი უკვე მეოთხედ მოხვდა "ლელოს" სიმბოლურ ნაკრებში: "საბურთალოს" 26 წლის მარჯვენა გარემარბი ლაშა შინდაგორიძე და თბილისის "დინამოს" 23 წლის შემტევი ლევან შენგელია...

* ერთმატჩიანი დისკვალიფიკაციის შემდეგ მშვენიერი დაბრუნება ჰქონდა ბათუმის "დინამოს" ენერგიულ საყრდენ ნახევარმცველს, 26 წლის გიული მანჯგალაძეს, რომელმაც ამ ტურში ეფექტურად შესრულებული "სტანდარტულითაც" დაგვამახსოვრა თავი...

* ზედიზედ მესამე ტურია, "ჩიხურას" ახალწვეული, 26 წლის ბიძინა მახარობლიძე მისთვის უჩვეულო, ცენტრფორვარდის პოზიციაზე ასპარეზობს და შედეგიანადაც...

* თავის ახალ გუნდში პირველი გოლ(ებ)ი გაიტანა რომან ჭანტურიამ, თანაც, ბათუმის "დინამოს" 23 წლის ახალწვეულმა ცენტრფორვარდმა უმაღლეს ლიგაში თავისი პირველი დუბლი შეცვლაზე შესულმა შეასრულა...

* რომ არა ტურის ბოლო მატჩში გიორგი კოხრეიძის გაბრწყინება, "ტურის ფეხბურთელად" რიჩარდ ლუკას დავასახელებდით: "ტორპედოს" 21 წლის ბრაზილიელმა შემტევმა, როგორც იქნა, ისე ითამაშა, მისგან რომ ელოდნენ სეზონის დაწყებიდან მოყოლებული. თუმცა, გიორგი კოხრეიძის ჩინებულმა ბურთაობამ ყველა და ყველაფერი გადაწონა!..

2033
მკითხველის კომენტარები / 0 /
მსგავსი ამბები
რუბრიკის სხვა სიახლეები
;