[სიმბოლური ნაკრები] ეროვნული ლიგა. XV ტური. პირველი გოლი და თანაც კლასიკოში! როგორ გადააწყო შალამბერიძემ 9-კაციანი სიონი...

ვნებათაღელვა არ გასულ ტურს კლებია. მართალია, ამჯერად არავის უცდია ფსონების მანიპულირებით გულშემატკივრების აბუჩად აგდება, მაგრამ ერთი-ორგან მაინც ვიხილეთ ისეთი ეპიზოდები, აშკარად შორს რომ არის ჭეშმარიტად სპორტული პაექრობისაგან...

თუმცა, მოდი, ეს ყველაფერი (უპირველეს ყოვლისა, ქვემოქართლურ დერბიში მომხდარ ხელჩართულ ჩხუბს ვგულისხმობთ) ზედმეტ ემოციას (!) დავაბრალოთ და გასული ტურის გამორჩეულ მოთამაშეებზე ვთქვათ რამდენიმე სიტყვა...

უპირველეს ყოვლისა, "სიონისა" და "რუსთავის" დაპირისპირება უნდა ვახსენოთ. უფრო ზუსტად, ბოლნისელთა გუნდის თავკაცის, თეიმურაზ შალამბერიძის მიერ განხორციელებული ეფექტიანი  შეცვლები.

მაშინ, როცა გუნდები მოედანზე 9-9 ფეხბურთელით დარჩნენ და როცა, სტუმრებს ამ დროისთვის... 3-ბურთიანი უპირატესობა ჰქონდათ, "სიონის" მთავარმა მწვრთნელმა თავისი გუნდი ისე გადააწყო, მასპინძლებმა მატჩის ბოლო ექვს წუთში ანგარიშიც გაათანაბრეს და კინაღამ გამარჯვების გოლიც გაიტანეს.

სწორედ ამიტომ, "ლელოს" რჩეულია "სიონის" მთავარი მწვრთნელი თეიმურაზ შალამბერიძე.

...ამ უხვგოლიან და მართლაც დრამატულ (სკანდალურსაც) მატჩს სხვაც გამორჩეული პერსონებიც ჰყავდა - მაგალითად, "სიონის" სწრაფი გარემარბი, 26 წლის დავით კირკიტაძემ, რომელიც II წრეში შედეგიანადაც ათამაშდა და სისტემატურად ხვდება "ლელოს" სიმბოლურ ნაკრებში.

იმის მიუხედავად, რომ "სიონმა" 3 გოლი გაუშვა, მოედანზე ერთ-ერთი გამორჩეული გახლდათ მასპინძელთა 27 წლის ცენტრალური მცველი ნიკა აფაქიძე, რომელსაც, სხვათა შორის, დიდი წვლილი მიუძღვის იმაში, რომ 2017 წელს "რუსთავმა" ეროვნული ლიგის საგზური მოიპოვა...

...ეროვნულ ლიგაში, ალბათ, თითზე ჩამოსათვლელია მკვეთრად გამოხატული ინდივიდუალისტები და ერთ-ერთი მათგანი "რუსთავის" 23 წლის შემტევი ზაზა ციცქიშვილია, რომელსაც ეფექტური ფინტებიც ეხერხება და, რაც მთავარია - ეფექტური გოლებიც!

ასე იყო ამჯერადაც: ეროვნული ლიგის ერთ-ერთმა ყველაზე საინტერესო შემტევმა ზედიზედ მეორე მატჩში გაიტანა გოლი და ასევე ზედიზედ მეორედ (სულ - მესამედ) მოხვდა "ლელოს" სიმბოლურ ნაკრებში.

ციცქიშვილის მსგავსად, ბოლო მატჩებში მართლაც რომ გამორჩეულად ასპარეზობს ეროვნული ლიგის ყველაზე ახალგაზრდა კაპიტანი, 20 წლის ლუკა სილაგაძე. ამ სწრაფმა და მართლაც უნივერსალმა ფეხბურთელმა "სიონთან" მატჩში გოლი და საგოლე პასი მიითვალა...

თუმცა, საგოლე პასებზე თუ მიდგა საქმე, ამ შემთხვევაში გიორგი ნავალოვსკიც არ უნდა გამოგვრჩეს: "ჩიხურასთან" არცთუ იოლ დაპირისპირებაში საქართველოს ნაკრების მარცხენა მცველმა თავისი გუნდის ორივე საგოლე კომბინაციაში უმნიშვნელოვანესი როლი შეასრულა.

ისე კი, ყველას უნდა გვახარებდეს ის ფაქტი, რომ 32 წლის ნავალოვსკი აშკარად ოპტიმალურ ფორმაში ხვდება მოახლოებულ სანაკრებო მატჩებს. სხვისი რა მოგახსენოთ და, ჩვენი აზრით, ბოლო 5 წლის განმავლობაში საქართველოს ნაკრებში მარცხენა მცველის პოზიციაზე სწორედ ნავალოვსკია, ფაქტობრივად, უკონკურენტო!..

...XV ტურის სიმბოლურ ნაკრებზე ვლაპარაკობთ და, მხოლოდ ახლაღა "შევამჩნიეთ", რომ თანმიმედოვრობა დაგვირღვევია. როგორც წესი, მეკარით უნდა დაგვეწყო და ახლა ვთქვათ ჩვენ რჩეულზე - ისევე, როგორც I წრის მატჩში, "ქართულ კლასიკოში" ამჯერადაც, ფაქტობრივად, უშეცდომო გახლდათ ხოსე პერალესი. თბილისის "დინამოს" 26 წლის ესპანელმა მეკარემ გუნდი რამდენიმე ეპიზოდში ხომ გადაარჩინა, ასევე "გაუხანგრძლივა" მთავარი მწვრთნელის პოსტზე ყოფნა თანამემამულე ჩისკო მუნიოსს...

"კირკიტაძ(ეებ)ის თემა" არამხოლოდ ქართულ პოლიტიკაშია აქტუალური - ზემოთ, დავით კირკიტაძეზე (ფეხბურთელზე, რა თქმა უნდა...) ვილაპარაკეთ. ახლა კი ამ გვარის კიდევ ერთი წარმომადგენელი უნდა ვახსენოთ, მით უფრო, რომ "ლოკომოტივის" 22 წლის მარჯვენაფლაგელი (გნებავთ - მცველიც, ნახევარმცველიც და გარემარბიც) თორნიკე კირკიტაძე სულაც მიმდინარე სეზონის ერთ-ერთ აღმოჩენად შეგვიძლია დავასახელოთ...

ისევე, როგორც ახალი მწვრთნელის,  ლევან კორღალიძის დამოძღვრილი "ლოკომოტივია" II წრის "გუნდი-აღმოჩენა" და ამ წარმატებულ სერიაში არცთუ მოკრძალებული წვლილი შეაქვს კიდევ ერთ ახალგაზრდა უნივერსალს, 19 წლის თორნიკე ძებნიაურს, რომელიც ერთნაირად კარგად თამაშობს საყრდენი ნახევარმცველისა და ცენტრალური მცველის პოზიციაზე. ამ სეზონში ძებნიაური პირველად მოხვდა "ლელოს" სიმბოლურ ნაკრებში, ისევე, როგორც "ჩიხურას" ახალგაზრდა საყრდენი ნახევარმცველი, 22 წლის დემურ ჩიხლაძე, რომელიც წლეულს საჩხერელთა გუნდის ერთ-ერთ წამყვან ფეხბურთელად ჩამოყალიბდა.

...გასული ტურის, უმთავრესი მოვლენა, რა თქმა უნდა, მორიგი "ქართული კლასიკო" იყო, რომლის ბედიც ლევან შენგელიას ეფექტურმა გოლმა გადაწყვიტა. აღსანიშნავია, რომ 23 წლის გარემარბმა თითქმის თვენახევრიანი "მშრალი" სერია შეწყვიტა. თბილისის "დინამომაც" სწორედ მისი გოლით შეძლო უპრინციპულესი მეტოქის დამარცხება და ერთობ წარუმატებელი სერიის (ზედიზედ 3 მარცხი) შეწყვეტაც.

დაბოლოს, არამხოლოდ XV ტურის სიმბოლური ნაკრების, არამედ, საერთოდ ეროვნული ლიგის ყველაზე ასაკოვან ფეხბურთელზეც. "ტორპედოს" უბერებელ მარჯვენა გარემარბ გრიგოლ დოლიძეზე მოგახსენებთ - ქართული საკლუბო ფეხბურთის მართლაც დამსახურებულ ვეტერანზე. 36 წლის დოლიძემ მიმდინარე ეროვნულ ლიგაში პირველი გოლი გაიტანა და, თანაც - "ქართულ კლასიკოში"!..

1644
მკითხველის კომენტარები / 0 /
მსგავსი ამბები
რუბრიკის სხვა სიახლეები
;