სიონი-დინამო ბთ 3:2 - დვალის ჰეთ თრიკით [VIDEO]

ეროვნული ლიგის პლეი ოფის პირველი თამაში ბოლნისში, "თამაზ სტეფანიაზე" გაიმართა და 2000-მდე მაყურებელიც მიიზიდა. მატჩი სანახაობრივი და დამაინტრიგებელი გამოდგა და 90 წუთი ისე მიილია, გულშემატკივარი არ მოიწყენდა.

ვერ ვიტყვით, რომ კლასი და ოსტატობა აღტაცებას იწვევდა, მაგრამ ფეხბურთელებმა მოსაგებად ყველაფერი გაიღეს. თავიდან ბათუმელები ფრთხილად თამაშობდნენ, ბოლნისელები კი აქტიურობითა და საფეხბურთო აგრესიით გამოირჩეოდნენ. შემთხვევითიც არ იყო, მე-13 წუთზე ანგარიში რომ გახსნეს - გიორგი მიქაბერიძემ შეტევა ჯაბა დვალს გაუგრძელა, რომელმაც საჯარიმოს სიახლოვიდან კარში სუსტად, მაგრამ ზუსტად დაარტყა და მეკარე ანატოლი ტიმოფეევმა ბურთი ვერ მოიგერია - 1:0.

გულშემატკივრებისგან შეგულიანებულმა ბოლნისელებმა 27-ე წუთზე სხვაობა გაზარდეს: ჯარიმა მარცხენა ფლანგზე ზვიად სიხარულიამ შეასრულა, ბურთი კარში თავით ისევ დვალმა გაგზავნა, დუბლი შეასრულა და "სიონის" გულშემატკივრები უზომოდ გახარა - 2:0.

ეს ისეთი ანგარიში იყო, საპასუხო შეხვედრამდე "სიონს" ლიგაში დაბრუნების რეალურ ფავორიტად რომ აქცევდა. მაგრამ ბათუმელები არ გაჩერდნენ და მთელი ძალებით შეუტიეს. 31-ე წუთზე ვაკო თევდორაძის კუთხურის შემდეგ ნიკა მგელაძემ ბურთისთვის ბრძოლა მოიგო და პირდაპირ კარში გაუშვა - "სიონი" მეკარე თორნიკე ზარქუამ გადაარჩინა.

სტუმრებმა 4 წუთის ინტერვალში იყოჩაღეს: 36-ე წუთზე იმავე თევდორაძემ კუთხური შეასრულა, დავით კვირკველია მცველებს გაექცა და თავურით სხვაობა შეამცირა - 2:1.

მე-40 წუთზე ბოლნისელთა მარჯვენა მცველ ლუკა ნოზაძეს ფეხი დაუსრიალდა, ანზორ სუხიაშვილმა თევდორაძე მარცხენა ფლანგზე მოძებნა, ბათუმელთა შემტევი კარისკენ დაიძრა და დაუცველ კუთხეში ზუსტად დაარტყა - 2:2.

სიონი
3
დინამო ბთ
2
ეროვნული ლიგა. პლეი ოფი. პირველი მატჩები
30.11. ბოლნისი. თამაზ სტეფანია
გოლები: 1:0 დვალი (13. მიქაბერიძის პასით), 2:0 დვალი (27. სიხარულიას პასით), 2:1 კვირკველია (36. თევდორაძის პასით), 2:2 თევდორაძე (40), 3:2 დვალი (45+1. კოშკაძის პასით)
სიონი: ზარქუა - ჯაფარიძე, ლ. ნოზაძე, თევზაძე (56. თომაშვილი), გიორბელიძე - ქიქავა, სიხარულია - მანაგაძე, კოშკაძე (89. ჭანკოტაძე), მიქაბერიძე - დვალი
სათადარიგოები: მაქაცარია, ყურაშვილი, უგულავა, ჭეიშვილი, პაპუაშვილი
მწვრთნელი: კობა ჟორჟიკაშვილი
დინამო: ტიმოფეევი - ფარტენაძე (46. შონია), კვირკველია, ქორიძე, სუხიაშვილი - ვარშანიძე, მგელაძე - გ. ქავთარაძე, გრიგალაშვილი (80. ჩოგაძე), ვ. თევდორაძე (90+2. ბ. მახარაძე) - კვასოვი
სათადარიგოები: ტაკიძე, ნაკაშიძე, კეკუა, კვანტალიანი
მწვრთნელი: ასლან ბალაძე
გაფრთხილება: ფარტენაძე (25), თევდორაძე (41), სიხარულია (51), კვასოვი (71), ვარშანიძე (77)
არბიტრი: პ. მაჭარაძე

45-ე წუთზე ბათუმელებს დაწინაურებაც შეეძლოთ: თევდორაძის კიდევ ერთი კარგად შესრულებული კუთხურის შემდეგ იაროსლავ კვასოვს ორიოდე მეტრიდან გატანის რეალური შანსი მიეცა, მაგრამ ზარქუამ მის თავურზე მშვენიერი რეაქცია გამოავლინა.

ბოლნისელებმა კი ნახევარმომენტითაც ისარგებლეს: მეკარე ტიმოფეევმა ბურთი ცუდად შეიტანა თამაშში, მოედნის ცენტრში გადაცემა ალეკო კოშკაძემ ჩაჭრა და საჯარიმოს სიახლოვეს უმალვე დვალი მოძებნა, რომელმაც ვაჟა ქორიძე ჩამოიცილა და მოჭრილი დარტყმით მეკარეს ბურთი "ცხრიანში ჩაუსვა" - 3:2.

მეორე ტაიმში მოედნის ცენტრში თამაშის გასაძლიერებლად ბათუმელთა თავკაცმა ასლან ბალაძემ მარჯვენა მცველის, მირზა ფარტენაძის ნაცვლად კაპიტანი, საყრდენი ნახევარმცველი თემურ შონია შეიყვანა. მაგრამ სტუმრებმა თამაშში გარდატეხის შეტანა ვერ მოახერხეს, ტემპიც დაეცა და მატჩის მიწურულს ორივე გუნდი ფრთხილობდა - ბოლნისელებს მოგება აწყობდათ, ბათუმელები კი, როგორც ჩანდა, მინიმალური ანგარიშით წაგებაზეც ყაბულს იყვნენ და აღარ რისკავდნენ.

ეპიზოდურად ისევ ბოლნისელები თუ აქტიურობდნენ. მაგალითად, 65-ე წუთზე სიხარულია "მაკრატელათი" ეფექტურად ცდილობდა გატანას და მიზანს ააცილა.

ბოლნისელებს მეოთხე გოლის გატანის რეალური შანსი 74-ე წუთზე ჰქონდათ - გურამ გიორბელიძის ფლანგური გადაცემის შემდეგ დვალმა ერთი შეხებით სცადა შეტევის დაგვირგვინება - ბურთი აეჭრა და საჯარიმოში ლაშა მანაგაძეს მიუგორდა, რომელმაც ძლიერად დაცხო და ხარიხა შეაზანზარა, დამატებაზე კი კოშკაძეს მცველები გადაეფარნენ და ვითარება განმუხტეს.

ბათუმელებმა ყველა მწვავე კონტრშეტევა 90-ე წუთზე განახორციელეს და ანზორ სუხიაშვილისა და გიორგი ქავთარაძის მიერ განვითარებული შეტევის დაგვირგვინება თემურ ჩოგაძეს შეეძლო, მაგრამ კარის წინ ფეხიდან ბურთი გიორგი ჭანკოტაძემ ააცალა და ბოლნისელები გადაარჩინა.

ამგვარად, საპასუხო შეხვედრის წინ ეროვნულ ლიგაში მოხვედრის შანსს ორივე გუნდი ინარჩუნებს.

 

ყოველდღიური სპორტული გაზეთი "ლელო"
602
მკითხველის კომენტარები / 0 /
მსგავსი ამბები
რუბრიკის სხვა სიახლეები