სიხარულიძე ლატვიაში, ქართველებთან - 'ჩეხეთში თამაშის პერსპექტივას ვერ ვხედავდი'

ირაკლი სიხარულიძე ლატვიურ "რიგასში" გადავიდა. 27 წლის თავდამსხმელმა იქაური ვირშლიგის (უმაღლესი ლიგა) ლიდერ კლუბთან კონტრაქტი სეზონის ბოლომდე გააფორმა.

თუმცა, ხელშეკრულება ოფციონის წესითაა შედგენილი და სურვილის შემთხვევაში, სეზონის ბოლოს მხარეებს მისი 2019 წლის ბოლომდე გაგრძელება შეუძლიათ.

2017 წელს სიხარულიძე თბილისის "ლოკომოტივის" ლიდერი იყო და ეროვნული ლიგის საუკეთესო ბომბარდირიც გახდა 25 გოლით. შარშანვე, სადებიუტო შეხვედრა ჩაატარა ეროვნულ ნაკრებში და გოლიც გაიტანა. წელს კი ჩეხეთის უმაღლესი დივიზიონის "სლოვაცკოში" გადაბარგდა, თუმცა ერთხელაც არ უთამაშია. საბოლოოდ, სიხარულიძე ჩეხეთიდან წამოვიდა კონტრაქტის ორმხრივად გაწყვეტის საფუძველზე.

მას ლატვიაში დავუკავშირდით და კომენტარი ვთხოვეთ: "მთავარი მიზეზი, რა თქმა უნდა, ის იყო, რომ "სლოვაცკოში" თამაშის შანსი არ მეძლეოდა. ლატვიაში გადასვლა აქედან გამომდინარე ვამჯობინე. ჩეხეთში დარჩენის შემთხვევაშიც ვერ ვხედავდი პერსპექტივას, რადგან აქამდე ერთი შანსიც არ მომცემია. ლატვიაში წასვლით კი იმის წინაპირობას ვხედავ, რომ ყველაფერი ჩემზე იქნება დამოკიდებული და სათამაშო პრაქტიკა მექნება", - გვითხრა სიხარულიძემ.

ის მოხვდა კლუბში, რომელიც მიმდინარე სეზონს ჩინებულად ატარებს - ლატვიის ვირშლიგაში 13 ტურის შემდეგ "რიგას ფს-მა" 34 ქულა დააგროვა, პირველ ადგილზეა და უახლოეს მდევრებს - "რიგასა" და "ლიეპაიას", შესაბამისად, 6 და 9 ქულით უსწრებს.

გუნდის ლიდერები ქართველები არიან - მარცხენა მცველი ლაშა შერგელაშვილი და ბექა ვაჩიბერაძე. ორივე მათგანმა 13-ვე შეხვედრა ჩაატარა. საინტერესოა, რომ ვაჩიბერაძემ 4 გოლი გაიტანა - უფრო მეტი, ვიდრე "რიგას ფს-ისა" და ლატვიის ნაკრების თავდამსხმელმა რობერტს სავალნიეკსმა (2 გოლი).

ყოველდღიური სპორტული გაზეთი "ლელო"
349
მკითხველის კომენტარები / 0 /
მსგავსი ამბები
რუბრიკის სხვა სიახლეები