სკამი, როგორც ასეთი... უნდა შეიცვალოს თუ არა მთავარი მწვრთნელი თბილისის 'დინამოში'?

ქართული საკლუბო ფეხბურთის ფლაგმანი თბილისის "დინამო" ბოლო დროს ძალიან არასტაბილურად თამაშობს.

თითქოს ეროვნულ ჩემპიონატში გუნდის მთავარი კონკურენტის, "საბურთალოს" დამარცხებას აღმავლობა უნდა მოჰყოლოდა, მაგრამ... მოხდა პირიქით. გუნდმა რამდენიმე გაუთვალისწინებელი ქულა დაკარგა, სულ ბოლოს კი გორში "დილასთან" წააგო...

კრიზისი ნებისმიერი გუნდის ცხოვრებაში ჩვეულებრივი ამბავია, მაგრამ "დინამოს" ჩავარდნა ცოტა გაუგრძელდა. სხვა თემაა თამაშის ხარისხი. მაგალითად, გორში გუნდის გარჯა ვერანაირ კრიტიკას ვერ უძლებდა. რა თქმა უნდა, ქართული საფეხბურთო თემი ბევრს მსჯელობს გუნდში არსებულ ვითარებაზე. არის კამათი იმის თაობაზეც, უნდა დატოვოს თუ არა პოსტი კახა კაჭარავამ...

ამ ინფორმაციის უტყუარობაზე თავს ნამდვილად ვერ დავდებთ, მაგრამ შევიტყვეთ, რომ ბოლნისის "სიონთან" ფრედ დასრულებული მატჩის შემდეგ კაჭარავა სერიოზულად დაფიქრებულა გადადგომაზე, მაგრამ... დღეს ის კვლავ "დინამოს" მთავარი მწვრთნელია.

უნდა დატოვოს თუ არა კახა კაჭარავამ თბილისის "დინამოს" მთავარი მწვრთნელის პოსტი? ჩვენი წერილი ამ კითხვაზე პასუხის გაცემის ცდაა. რა თქმა უნდა, ჩვენს მოსაზრებას ეყოლება მოწინააღმდეგეც, მაგრამ ეს ჩვეულებრივი ამბავია, რადგან ფეხბურთს ძალიან უხდება კამათი და აზრთა სხვადასხვაობა.

დაღლილი დინამო, ანუ მწვრთნელი
ჯადოქარი ვერ იქნება

რა თქმა უნდა, ნებისმიერი გუნდის თამაშის ხარისხსა და შედეგზე პასუხისმგებელია მთავარი მწვრთნელი. რაც ფეხბურთი არსებობს, იმ დროიდან ეს აქსიომაა. და მაინც, უნდა გავუწიოთ ანგარიში იმ გარემოებებს, რომელთა ერთობლიობაც "დინამოს" ასეთ ასპარეზობას განაპირობებს.

ამ ბოლო დროს "დინამოს" მიერ გამართული თითქმის ყველა მატჩი ვნახე და შეიძლება თამამად ითქვას - გუნდს არც ძველი ტაქტიკისთვის გადაუხვევია და არც რევოლუციური ცვლილებები მომხდარა სათამაშო სქემაში. უბრალოდ, შეუიარაღებელი თვალითაც კარგად ჩანს, რომ "დინამო" დაიღალა.

ჩემი აზრით, თუნდაც მაშინ, როცა "დინამოს" წარმატებული პერიოდი ედგა, გუნდი თამაშების უმრავლესობას მეტი მოძრაობისა და სწორი გადაადგილებების ხარჯზე იგებდა საქართველოს ჩემპიონატში, თორემ ძალიან გაგვიჭირდება იმის მტკიცება, რომ ამ ფორმაციის "დინამო" მეტოქეთა უმრავლესობაზე ერთი თავით მაღლა დგას სათამაშო კლასით...

ახლა კი ეს უპირატესობაც სადღაც გაქრა. როგორც წესი, ამ დროს ძალიან ხშირად მწვრთნელს ადანაშაულებენ. მიიჩნევენ რა, რომ მან სწორად ვერ დაგეგმა მოსამზადებელი პერიოდი, მაგრამ აქ განსაკუთრებულ შემთხვევასთან გვაქვს საქმე - როცა გუნდის უმრავლესობას პირტიტველა ჭაბუკები შეადგენენ, ძალიან რთულია, მთელი სეზონის განმავლობაში, გადატვირთული გრაფიკის პირობებში, სტაბილურობა შეინარჩუნო. რთული კი არა, ეს პრაქტიკულად შეუძლებელია!..

მწვრთნელი კი ჯადოქარი ვერ იქნება. კაჭარავამ გააკეთა ის, რაც ამ დროს უნდა გაეკეთებინა, მაგრამ...

სელექციის საკითხი

ეროვნულ ჩემპიონატში "დინამოს" გადატვირთული სათამაშო ჟამი რომ დაუდგა, კახა კაჭარავამ ერთადერთ მართებულ გადაწყვეტილებას მიმართა და შემადგენლობის როტაცია დაიწყო. ამ ნაბიჯმა დიდად ვერ გაამართლა, არადა აქამდეც ცხადი იყო და ახლაც ცხადია, რომ "დინამოს" ძალიან გაუჭირდებოდა სეზონის 13-14 ფეხბურთელით ჩამთავრება.

ამ შემთხვევაშიც ძალიან რთულია მწვრთნელის დადანაშაულება. პირდაპირ და შეულამაზებლად შეიძლება დაიწეროს, რომ "დინამოს" სათადარიგოთა სკამი და შემადგენლობის სიღრმე ისეთი ვერაა, როგორიც უნდა იყოს. ამ კომპონენტში საქართველოს ყველაზე ტიტულოვანი კლუბი, სულ მცირე, ორ მეტოქეს ჩამორჩება საქართველოში - "საბურთალოსა" და ქუთაისის "ტორპედოს".

მთავარი მწვრთნელი გუნდში ვერ მოიყვანს ფეხბურთელს, მთავარმა მწვრთნელმა გუნდში მოყვანილი ფეხბურთელი უნდა ათამაშოს. ბოლო დროს "დინამოს" სელექცია ვერანაირ კრიტიკას ვერ უძლებს. ერთადერთი, ლევან შენგელიამ გაამართლა და, სიმართლე ითქვას, დიდი ალბათობით ისიც არ იქნებოდა "დინამოში", ტრავმის გამო უკლუბოდ რომ არ დარჩენილიყო...

როცა თავს ზემოთ ძალა არაა...

მშენებელი - სხვისი არ ვიცი და, მე სხვა სიტყვას ვერ ვუძებნი კაჭარავას მოქმედებას ვერც წლების წინ, როცა ის სულ სხვა ფორმაციის "დინამოებს" წვრთნიდა და ვერც ახლა. სათვალავიც კი ამერია, რამდენი ფორმაციის ახალი გუნდი "ააშენა" კაჭარავამ "დინამოში".

მისი პროდუქტია ის გუნდიც, რომელსაც ახლა ვხედავთ. გარედან ასე ჩანს - ამ გუნდს სადღეისოდ არ შეუძლია იმაზე მეტის ჩვენება, რასაც აჩვენებს. სხვა საქმე იქნებოდა, "დინამოში" 3-4 გამოცდილი, სატურნირო ბრძოლაში გამობრძმედილი ლეგიონერი რომ იყოს. ისინი საკუთარ თავზე აიღებდნენ ბევრ რამეს, ასე კი...
ეჭვი არ მეპარება: თუნდაც ორი სეზონის შემდეგ ის ბიჭები, რომლებიც დღეს "დინამოს" ხერხემალს წარმოადგენენ, არც შუა სეზონში დაიღლებიან და მათი საშემსრულებლო ოსტატობაც გაცილებით მაღალი იქნება, მაგრამ ახლა ასეთი ვითარებაა...

სად არის კიტეიშვილის შემცვლელი?

ყველა ვთანხმდებოდით იმაზე, რომ ოთარ კიტეიშვილს უცხოეთში უფრო მაღალ დონეზე უნდა გაეგრძელებინა კარიერა. ბოლო დროს ის აშკარად გადაზრდილი ჩანდა საქართველოს ჩემპიონატისთვის. ეს მარტივი ჭეშმარიტებაა, მაგრამ რა ვუყოთ იმას, რომ "დინამოს" გამოკვეთილი ლიდერი ლამის მარტო იგებდა არაერთ თამაშს?

ზოგადად, როცა ესა თუ ის კლუბი ლიდერს ელევა, ეს სპონტანურად არ ხდება. რა თქმა უნდა, "დინამოში" ძალიან კარგად იცოდნენ, კიტეიშვილი წასვლას რომ აპირებდა. თავისთავად, გუნდს უნდა ეფიქრა მისი შემცვლელის დროულად მოძიებაზე.

რა თქმა უნდა, ოთარის სრულფასოვანი შემცვლელის მოძიება ძალიან რთული იქნებოდა. ის გუნდის ორგანული ნაწილი იყო და ბოლომდე ერწყმოდა მას, მაგრამ რაღაც დოზით უნდა მომხდარიყო მისი ჩანაცვლება.

კი, გაამართლა ლევან შენგელიას ტრანსფერმა, მაგრამ ის მაინც არ შეგვიძლია ჩავთვალოთ კიტეიშვილის შემცვლელად, თუნდაც მისი ამპლუიდან გამომდინარე. შენგელიას ხელეწიფება კონკრეტული სათამაშო ეპიზოდის დაგვირგვინება, ტექნიკურია და აქვს აფეთქებები, მაგრამ მას ვერ მოვთხოვთ გუნდის თამაშის წაყვანას.

ხომ შეიძლებოდა, კიტეიშვილის წასვლით დარჩენილი ვაკუუმი თუნდაც ნორმალური ლეგიონერით შევსებულიყო?!

წყალგამყოფი დინამოსთვის

შევთანხმდეთ - კონკრეტულ მომენტში "დინამოსთვის" კვალიფიციური კადრის მოძიება რთული იქნება. ფეხბურთელთა უმრავლესობა, რომელიც დღეს უკლუბოდაა დარჩენილი, შორსაა ოპტიმალური სათამაშო ფორმისგან.

სამაგიეროდ, ბევრი აღარ დარჩა იქამდე, სანამ ზამთრის სატრანსფერო ფანჯარა გაიხსნება. იქ კი "დინამომ" გვარიანად უნდა იაქტიუროს, რადგან სხვა გზა უბრალოდ აღარ არის. თუ გუნდში რამდენიმე კარგი ლეგიონერი არ გამოჩნდა, ისე თბილისურ გრანდს ძალიან გაუჭირდება მაღალი მიზნებისთვის ბრძოლა თვით საქართველოს ჩემპიონატშიც კი.

აგერ ზამთარი და აგერ - "დინამოს" შეფობა. ფაქტია, პრობლემების სათავე მთავარი მწვრთნელი არ არის...

ყოველდღიური სპორტული გაზეთი "ლელო"
1553
მკითხველის კომენტარები / 2 /
ბასკეტი
0
კაჭარავა კი არა ფიფიაა დიდი ხანია წასასვლელი დინამოდან...
თბილისელი
0
ადმინ მართალი ხართ, უბრალოდ არაფერი ჩანს საშველი, ჩაკვე, კაკაბა, ქვილითა, ლობჟანა, კიტე, პარუნა და პაპუ. ეს გუნდი რომ დარჩენილიყო ტორპედოს კიარა ევროპა ლიგზეც გავიდოდნენ და არც იქ შეირცხვედნენ თავს დარწმუნებული ვარ, ესეთ სტატიებს ჩემის აზრით იმიტომ არ აქვს აზრი ადმინ რომ დინამოს ხელმძღვანელობა პირდაპირ დაგვცინის, ხო ტქვა ფიფიამ აფრიკულ ბაზარზე უნდა გადავინაცვლოთო ვნახოდ ვის მოიყვნენ თორე ზემოაღნიშნული ფეხბურთელებიდან კიარა ამ სეზონის საუკეთესო ფეხბუღტელებიც დატოვებენ დინამოს დარწმუნებული ვარ და ისევ თავიდან მოუწევს კაჭარავს მშენებლობა გუნდის
მსგავსი ამბები
რუბრიკის სხვა სიახლეები
;